ଧାମନଗର,୧।୧୧(ସନ୍ତୋଷ କୁମାର ମହାପାତ୍ର): ମୋ ସରକାର କାର୍ଯ୍ୟକ୍ରମ ଦ୍ୱାରା ଲୋକଙ୍କୁ ବିଭିନ୍ନ ସେବା ଯୋଗାଇଦେବା, ପ୍ରତ୍ୟେକ ବିଭାଗ ଏହାର ସମୀକ୍ଷା କରି ଅବସ୍ଥାରେ ଉନ୍ନତି ଆଣିବାକୁ ମୁଖ୍ୟମନ୍ତ୍ରୀ କହିଛନ୍ତି। ଏପରିକି ଯେଉଁ ଅଧିକାରୀମାନେ ଏଥିରେ ଖିଲାପ କରିଛନ୍ତି, ସେମାନେ ଦଣ୍ଡିତ ହେବାର ପୂର୍ବରୁ ସୂଚନା ଅଛି। ଭଦ୍ରକ ଜିଲା ଧାମନଗର ବ୍ଲକ କାର୍ଯ୍ୟାଳୟ ପରିସରରେ ଥିବା ମୋ ସରକାର କକ୍ଷ ଲୋକଙ୍କ କାମରେ ଲାଗୁନି। ବ୍ଲକ ଅଫିସ୍ ପରିସରରେ ୧ ବର୍ଷରୁ ଊଦ୍ଧର୍ବ ହେଲା ଏହି କକ୍ଷ ସ୍ଥାପନ କରାଯାଇଥିଲେ ମଧ୍ୟ କୌଣସି କାର୍ଯ୍ୟ କରାଯାଉ ନାହିଁ କି କେହି ଅଧିକାରୀ ସେଥିପାଇଁ ନିଯୁକ୍ତି ହୋଇନାହାନ୍ତି। ବ୍ଲକର ଦୂର ଦୁରାନ୍ତରୁ ଆସୁଥିବା ସାଧାରଣ ଲୋକଙ୍କ ସମସ୍ୟା ସମାଧାନ ଦିଗରେ ମୋ ସରକାର କକ୍ଷ କାମରେ ଆସୁନାହିଁ। ଲୋକଙ୍କ ସମସ୍ୟାର ସମାଧାନ ପାଇଁ ଜଣେ ଅଧିକାରୀଙ୍କୁ ସେଠାରେ ନିଯୁକ୍ତି କରାଯିବା କଥା। ଏକ ଭଙ୍ଗା ଟେବୁଲ, ଚେୟାର ଦୁଇଟି ପଡ଼ିଥିବା ବେଳେ କକ୍ଷଟି ଅପରିଷ୍କାର ହୋଇପଡ଼ିଛି। ଏନେଇ ବିଡିଓ ବନବିହାରୀ ଦିଣ୍ଡା କହିଛନ୍ତି, ଆବଶ୍ୟକ କର୍ମଚାରୀ ନ ଥିବାରୁ ସେଠାରେ କେହି ବସୁ ନାହାନ୍ତି। ଯେଉଁମାନଙ୍କର ଅଭିଯୋଗ ଦେବାର ଅଛି, ସେମାନେ ବ୍ଲକ କାର୍ଯ୍ୟାଳୟକୁ ଆସି ଲିଖିତ ଭାବେ ଦେଇପାରିବେ। ଆହୁରି ମଧ୍ୟ ଅଭିଯୋଗ ଦେବା ପାଇଁ ଜନଶୁଣାଣି ପୋର୍ଟାଲ ଅଛି। ସେଠାରେ ମଧ୍ୟ ଅନ୍ଲାଇନରେ ଅଭିଯୋଗ କରିପାରିବେ।