କଥାରେ ଅଛି କୁକୁର ମଣିଷର ସବୁଠାରୁ ବିଶ୍ୱସ୍ତ ସାଥୀ। ହେଲେ ପାଳିଥିବା ମଣିଷର ମୃତ୍ୟୁରେ ମ୍ରିୟମାଣ ହୋଇ କୁକୁର ନିଜେ ଜୀବନ ହାରିବା ଭଳି ଘଟଣା ହୁଏତ ଶୁଣି ନ ଥିବେ। ଏଭଳି ଏକ ଘଟଣା ଘଟିଛି ଉତ୍ତରପ୍ରଦେଶର କାନପୁରରେ।
୧୨ ବର୍ଷ ପୂର୍ବେ କାନପୁରର ମଲ୍ଲିକାପୁରମ୍ରେ ରହୁଥିବା ଡା. ଅନିତା ରାଜ ସିଂ ଏକ କୁକୁରକୁ ଉଦ୍ଧାର କରି ଘରକୁ ଆଣିଥିଲେ।
ସେତେବେଳେ ପରିତ୍ୟକ୍ତ କୁକୁରଟିର ଅବସ୍ଥା ଭଲ ନ ଥିଲା। ସଂକ୍ରମିତ ହେବା ଯୋଗୁ ତାର ଚିକିତ୍ସା କରିଥିଲେ ଅନିତା। ପରେ ତାର ନାମ ଜୟା ରଖିବା ସହ ଲାଳନପାଳନ କରି ଆସୁଥିଲେ।
ଅନିତାଙ୍କ ପୁଅ ତେଜାସଙ୍କ କହିବାନୁଯାୟୀ, ନିକଟରେ ଅନିତାଙ୍କ କୀଡ଼ନୀ ସମସ୍ୟା ଦେଖାଯାଇଥିଲା। ସେ ଗୁରୁତର ହେବା ପରେ ଲୟାଲ ସିଟି ହସ୍ପିଟାଲରେ ତାଙ୍କ ଚିକିତ୍ସା କରାଯାଉଥିଲା। ହେଲେ ଗତ ବୁଧବାର ତାଙ୍କର ମୃତ୍ୟୁ ଘଟିଥିଲା।
ପରେ ଡାକ୍ତରଙ୍କ ମୃତଦେହ ଘରକୁ ଅଣାଯାଇଥିଲା। ତାଙ୍କୁ ଏଭଳି ଅବସ୍ଥାରେ ଦେଖି ଜୟା ଭୁକିବା ଆରମ୍ଭ କରିଥିଲା। ଏପରିକି ସେ ହସ୍ପିଟାଲ ଯିବା ଦିନଠାରୁ କୁକୁରଟି ଠିକ୍ ଭାବେ ଖାଦ୍ୟ ଖାଉ ନ ଥିଲା। ପରେ ହଠାତ୍ ସେ ଘରର ଚତୁର୍ଥ ମହଲାରୁ ଡେଇଁ ପଡ଼ିଥିଲା। ଶେଷରେ ତାର ମଧ୍ୟ ମୃତ୍ୟୁ ଘଟିଛି।
ତେବେ ମାଲିକ ମୃତ୍ୟୁରେ ପ୍ରାଣ ହରାଇଥିବା କୁକୁର ଜୟା ଏକା ନୁହେଁ। ୨୦୧୯ରେ ଏକ ଫ୍ରେଞ୍ଚ ବୁଲଡଗ୍ ନିରୋ ମାଲିକ ମୃତ୍ୟୁର ୧୫ ମିନିଟରେ ଆଖି ବୁଜିଥିଲା।