ସାଧାରଣତଃ ଦୁନିଆର କିଛି ଲୋକ ଚାପଗ୍ରସ୍ତ, ଉଦାସୀନତା ଯୋଗୁ ଆତ୍ମହତ୍ୟା ପରି ପଦକ୍ଷେପ ଗ୍ରହଣ କରୁଥିବା ନଜିର ରହିଛି। ମାତ୍ର କୁକୁରମାନେ ଯେ, ଆତ୍ମହତ୍ୟା କରନ୍ତି ଏ କଥା ଶୁଣିବାକୁ ଟିକେ ଅଡୁଆ ଲାଗୁଛି। କିନ୍ତୁ ଏହା ସତ। ଦୁନିଆରେ ଏପରି ଏକ ବ୍ରିଜ୍ ଅଛି, ଯେଉଁଠାରେ କୁକୁରମାନେ ଡେଇଁ ଆତ୍ମହତ୍ୟା କରନ୍ତି। ଏହା ଶୁଣିବା ଅତ୍ୟନ୍ତ ଆଶ୍ଚର୍ଯ୍ୟଜନକ ଯେ, କୁକୁର ଏବଂ ବ୍ରିଜ ମଧ୍ୟରେ ସମ୍ପର୍କ କ’ଣ। ଯେଉଁଥିପାଇଁ କୁକୁରମାନେ ବ୍ରିଜ ଉପରକୁ ଚଢ଼ି ଆତ୍ମହତ୍ୟା କରିଥାନ୍ତି। ତେବେ ଜାଣନ୍ତୁ ଏହା ପଛରେ ରହିଥିବା ରହସ୍ୟ ସମ୍ପର୍କରେ…
ସ୍କଟଲାଣ୍ଡରେ ରହିଛି ଏକ ରହସ୍ୟମୟ ବ୍ରିଜ। ଯାହା କୁକୁର ଆତ୍ମହତ୍ୟା ପାଇଁ ଜଣାଶୁଣା। ଏହି ବ୍ରିଜ୍କୁ ‘ଡଗ୍ ସୁଇସାଇଡ୍ ବ୍ରିଜ୍’ ମଧ୍ୟ କୁହାଯାଏ। ଏହି ବ୍ରିଜ୍ର ଉଚ୍ଚତା ୫୦ ଫୁଟ। ଯେକୌଣସି କୁକୁର ହେଉ ଏହି ବ୍ରିଜକୁ ବୁଲିବାକୁ ଆସିବା କ୍ଷଣି ସେ ଡେଇଁପଡ଼େ। ଶହ ଶହ କୁକୁର ଏହି ବ୍ରିଜରୁ ଡେଇଁ ଆତ୍ମହତ୍ୟା କରିଛନ୍ତି।
ଏକ ରିପୋର୍ଟ ଅନୁଯାୟୀ, ଏହି ବ୍ରିଜ୍ର ରହସ୍ୟ ଏପର୍ଯ୍ୟନ୍ତ କେହି ଜାଣିପାରୁ ନାହାନ୍ତି। ବର୍ତ୍ତମାନ ପର୍ଯ୍ୟନ୍ତ ଏହି ବ୍ରିଜ୍ ରହସ୍ୟ ହୋଇରହିଛି। ସ୍ଥାନୀୟ ଲୋକେ କୁହନ୍ତି, ବ୍ରିଜରୁ ଡେଇଁ ପଡ଼ିଥିବା ୫୦ କୁକୁରଙ୍କର ଏପର୍ଯ୍ୟନ୍ତ ମୃତ୍ୟୁ ଘଟିଛି। ଅନେକଙ୍କୁ ଉଦ୍ଧାର କରାଯାଇଛି। କୁକୁରମାନଙ୍କ ଆତ୍ମହତ୍ୟାକୁ ଦୃଷ୍ଟିରେ ରଖି ଏହା ସହ ଜଡ଼ିତ ଏକ ବିଜ୍ଞପ୍ତି ମଧ୍ୟ ରଖାଯାଇଛି। ଯାହା ଦ୍ୱାରା ପରିଦର୍ଶକମାନେ ଜାଣିପାରିବେ। ଏହି ବ୍ରିଜ୍ ୧୯୫୦ ମସିହାରେ ନିର୍ମିତ ହୋଇଥିଲା। ନିର୍ମାଣ ପରଠାରୁ ଏଭଳି ଘଟଣା ଦେଖିବାକୁ ମିଳୁଛି।
ଏହି ବ୍ରିଜ୍ ସହିତ ଜଡିତ ଅନେକ କାହାଣୀ ରହିଛି। କିଛି ଲୋକ ଭୂତ ସହିତ ସଂଯୁକ୍ତ ବୋଲି କହିଥାନ୍ତି। ଅନେକ ଲୋକ କୁହନ୍ତି, ବ୍ରିଜ ଉପରକୁ ଯିବା ମାତ୍ରେ ଭୂତ କୁକୁରମାନଙ୍କ ଭିତରକୁ ଆସେ ଏବଂ ସେମାନେ ଡେଇଁ ଆତ୍ମହତ୍ୟା କରନ୍ତି। ଯେଉଁମାନଙ୍କର କୁକୁର ଏଠାରେ ଡେଇଁ ଆତ୍ମହତ୍ୟା କରିଛନ୍ତି, ସେମାନେ ମଧ୍ୟ ବିଶ୍ୱାସ କରନ୍ତି ଯେ; ଏଠାରେ କିଛି ଅଜବ ଶକ୍ତି ଅଛି, ଯାହା ଯୋଗୁ ଏପରି ଘଟଣା ଘଟୁଛି।
କିଛି ଲୋକ କୁହନ୍ତି, ଲେଡି ଅଫ୍ ଓଭରଟନ୍ ନାମକ ଜଣେ ମହିଳାଙ୍କ ଆତ୍ମା ଏହି ବ୍ରିଜ୍ ଉପରେ ରହିଛି। ଯାହାବି ହେଉ ଏହା ଆଜି ପର୍ଯ୍ୟନ୍ତ କେବଳ କାହାଣୀ ହୋଇ ରହିଯାଇଛି। ପ୍ରକୃତ ସତ୍ୟ ବର୍ତ୍ତମାନ ସୁଦ୍ଧା କେହି ଉନ୍ମୋଚନ କରିପାରିନାହାନ୍ତି।