ଭୁବନେଶ୍ୱର, ୨୯।୧୦(ବ୍ୟୁରୋ) – ଦୁଇବର୍ଷ ଧରି ବନ୍ଦ ରହିବା ପରେ ଭୁବନେଶ୍ୱରରେ ପୁଣି ହେବ ଡଗ୍ ଶୋ’। ଓଡ଼ିଶା କେନେଲ୍ କ୍ଲବ ପକ୍ଷରୁ ଡିସେମ୍ବର ୧୦ ଓ ୧୧ରେ ୟୁନିଟ-୬ ବାଳକ ଉଚ୍ଚ ବିଦ୍ୟାଳୟ ଖେଳପଡ଼ିଆରେ ଅନୁଷ୍ଠିତ ହେବ ଅଲ୍ ବ୍ରିଡ୍ ଡଗ୍ ଶୋ’। ଏଥିରେ ଭାଗ ନେବା ପାଇଁ ପଞ୍ଜୀକରଣ ଆରମ୍ଭ ହୋଇଛି। ରାଜ୍ୟ ତଥା ଦେଶର ବିଭିନ୍ନ ସ୍ଥାନରୁ ଲୋକେ ପଞ୍ଜୀକରଣ କରୁଥିବା ସୂଚନା ମିଳିଛି। ଶେଷଥର ପାଇଁ ୨୦୧୯ରେ ଏହି ଡଗ୍ ଶୋ’ ଅନୁଷ୍ଠିତ ହୋଇଥିଲା। କରୋନା କଟକଣା ପାଇଁ ଗତ ଦୁଇବର୍ଷ ଶୋ’ ବନ୍ଦ ରହିଥିଲା। ତେବେ ଏଥର ସ୍ବତନ୍ତ୍ର ଭାବେ ୬୧ ଓ ୬୨ତମ ଅଲ୍ ବ୍ରିଡ୍ ଡଗ୍ ଶୋ’ କରାଯିବ। ଏଥର ଅଲ୍ ବ୍ରିଡ ଡଗ୍ ଶୋ ପାଇଁ ଦୁଇଜଣ ବିଚାରପତି ବିଦେଶରୁ ଆସୁଛନ୍ତି। ୬୧ତମ ଶୋ’ରେ ଅଷ୍ଟ୍ରେଲିଆର ମିସେଲ୍ ହାମଣ୍ଡ୍ ଏବଂ ୬୨ତମ ଶୋ’ରେ ସର୍ବୀୟାର ପିଟର ଫିରିକ୍ ବିଚାରପତି ରହିବେ। ସେହିପରି ୬୧ତମ ଓବିଡିଏଣ୍ଟ ଟ୍ରାଏଲ୍ର ବିଚାରପତି ଭାବରେ ଓଡ଼ିଶାର ସି.ଆର୍. ପଟ୍ଟନାୟକ ଯୋଗଦେବେ। ତେବେ ଏଥର ଷଷ୍ଠ ଜର୍ମାନ ସେଫର୍ଡ ସ୍ପେଶାଲିଟି ଶୋ’ରେ ବିଚାରପତି ଭାବରେ ଅଷ୍ଟ୍ରେଲିଆରୁ ଆସୁଛନ୍ତି ଲୁଇସ୍ ଡୋନାଲ୍ଡ। ଏହି ଅବସରରେ ବିଶ୍ବର ଅନ୍ୟତମ ଶ୍ରେଷ୍ଠ ଡଗ୍ ଶୋ’ ବିଚାରପତି ଲୁଇସ୍ ଭୁବନେଶ୍ୱରରେ ତାଙ୍କ ଲିଖିତ ଏକ ପୁସ୍ତକ ଉନ୍ମୋଚନ କରିବା ସହିତ ଏକ ସେମିନାର ମଧ୍ୟ କରିବେ। ଦୁଇବର୍ଷ ପରେ ଡଗ୍ ଶୋ ହେଉଥିବାରୁ ଏଥର ଅଧିକ ଦର୍ଶକ ଆସିବାର ସମ୍ଭାବନା ରହିଛି। ଯଦିଓ କରୋନା ଭୟ ଅନେକ ପରିମାଣରେ ହଟି ଯାଇଛି, କିନ୍ତୁ ଏହି ଡଗ୍ ଶୋ’ରେ ଭାଗ ନେବାକୁ ଆସୁଥିବା ଉଭୟ ପ୍ରତିଯୋଗୀ ଏବଂ ଦର୍ଶକଙ୍କୁ ମାସ୍କ ପିନ୍ଧିବା, ଦୂରତା ବଜାୟ ରଖିବା, ସାନିଟାଇଜର ଆଦି ବ୍ୟବହାର କରିବା ପାଇଁ ଅନୁରୋଧ କରିବୁ ବୋଲି ଓଡ଼ିଶା କେନେଲ କ୍ଲବ ପକ୍ଷରୁ କୁହାଯାଇଛି।