କୋକସରା,୬ା୬,(ଡି.ଏନ୍.ଏ.): କଳାହାଣ୍ଡି ଜିଲା କୋକସରା ବ୍ଲକ ଗମ୍ଭାରିଗୁଡା ଗ୍ରାମରେ ସୋମବାର କୁକୁରପଲ ଆକ୍ରମଣରେ ୨୦ ମେଣ୍ଢା ମୃତ୍ୟୁ ଘଟିଥିବା ଜଣାପଡିଛି।
ମିଳିଥିବା ସୂଚନା ମୁତାବକ, ସୋମବାର ସକାଳେ ଗମ୍ଭାରିଗୁଡା ଗ୍ରାମର ମେଣ୍ଢା ଚରାଳି ସୋମେଶ୍ୱର ଶବର ପ୍ରତିଦିନ ଭଳି ନିଜ ମେଣ୍ଢା ଧରି ଚରାଇବାକୁ ଯାଇଥିଲେ। ସେହିପରି ତାଙ୍କ ସହ ଗ୍ରାମର ମେଣ୍ଢା ଚାଷୀ ବନିତା ଶବର, ଜୟନ୍ତୀ ପଟେଲ ଓ ପ୍ରକାଶ ଶବର ମଧ୍ୟଳ ୨୦ଟି ମେଣ୍ଢାକୁ ନେଇ ଗାଁ ନିକଟସ୍ଥ ଚିଙ୍ଗୁ ପାଖରେ ଚରାଇବାକୁ ଯାଇଥିଲେ।
ହେଲେ ହଠାତ୍ ସେହି ସମୟରେ ୧୫ରୁ ୨୦ଟି ବୁଲା କୁକୁର ପହଞ୍ଚି ମେଣ୍ଢା ପଲକୁ ଗୋଡାଇ ଗୋଡାଇ ଆକ୍ରମଣ କରିଥିଲେ। ଏପରିକି ମେଣ୍ଢା ଚରାଳି ସୋମେଶ୍ୱର ଶବରଙ୍କୁ ମଧ୍ୟ କୁକୁର ପଲ ଆକ୍ରମଣ କରି ଆହତ କରିଥିଲେ। ହେଲେ କୌଶଳ କ୍ରମେ ସୋମେଶ୍ୱର ଜମି ହୁଡାରେ ଥିବା ଏକ ଗଛରେ ଚଢି ଯାଇ ନିଜ ଜୀବନ ରକ୍ଷା କରିଥିଲେ। ମେଣ୍ଢା ଚରାଳି ଚିତ୍କାର କରି ଗ୍ରାମବାସୀଙ୍କୁ ଡାକ ଦେବାରୁ ଚାଷ ଜମିରେ କାମ କରୁଥିବା କିଛି ଲୋକ ଦୌଡି ଆସି କୁକୁରଙ୍କୁ ଘଉଡାଇଥିଲେ। ତେବେ ଏହି ସମୟ ମଧ୍ୟରେ ସମସ୍ତ ମେଣ୍ଢାଙ୍କ ମୃତ୍ୟୁ ହୋଇସାରିଥିଲା । ଏତଦ୍ବ୍ୟତୀତ ନିକଟସ୍ଥ ଓଲମା ଗ୍ରାମରେ ମଧ୍ୟ ଏହି କୁକୁରପଲ ଛେଳି ଓ ମେଣ୍ଢାକୁ ଆକ୍ରମଣ କରିଥିବା ସୂଚନା ରହିଛି। ମେଣ୍ଢା ଚାଷ କରି ନିଜ ପରିବାର ପ୍ରତିପୋଷଣ କରୁଥିବା ଗମ୍ଭାରୀଗୁଡା ଗ୍ରାମର ଗରିବ ମେଣ୍ଢା ଚାଷୀମାନେ କ୍ଷତିପୂରଣ ପାଇଁ ଏବେ ପ୍ରଶାସନ ପାଖରେ ଦାବି କରିଛନ୍ତି। ଏହି ଘଟଣାର ଏନେଇ କୋକସରା ପ୍ରାଣୀ ଚିକିତ୍ସାଳୟ ଡାକ୍ତର ପ୍ରସନ୍ନ କୁମାରଙ୍କୁ ପଚାରିବାରୁ ଏନେଇ କ୍ଷତିପୂରଣ ପାଇଁ ବ୍ୟବସ୍ଥା ନାହିଁ ବୋଲି କହିଛନ୍ତି।