ଭବାନୀପାଟଣା,୩୦।୬(ଉତ୍ତମ କୁମାର ଦାଶ): କଳାହାଣ୍ଡି ପୋଲିସ ଏକ ୧୩ଜଣିଆ ଆନ୍ତଃଜିଲା ଡକାୟତି ଗ୍ୟାଙ୍ଗଙ୍କୁ ଧରିଛି। ୧୩ ଡକାୟତଙ୍କ ମଧ୍ୟରୁ ୧୦ଜଣ କଳାହାଣ୍ଡି ଓ ୩ଜଣ ବଲାଙ୍ଗୀର ଜିଲାର ବୋଲି ଜଣାପଡିଛି। ସେମାନେ ହେଲେ ବଲାଙ୍ଗୀର ଜିଲା ସଇଁତଲା ଥାନା ଅନ୍ତର୍ଗତ ରେଙ୍ଗାଲି ଗ୍ରାମର ରାଜକିଶୋର ନାଗ, କନ୍ଧଉଲବା ଗ୍ରାମର ବିନୟ କୁମାର ସେଠ, ଚାରଭଟା ଗ୍ରାମର ବବଲୁ ରଣା, କଳାହାଣ୍ଡି ଜିଲା ଭବାନୀପାଟଣା ଟାଉନ ଥାନା ଅନ୍ତର୍ଗତ ଗୋଶାଲପଡାର ଜନ୍ନେଲା ହେମନ୍ତ କୁମାର, ଇରିଗେସନ କଲୋନୀର ମାନସ ବିଶି, କରନପିଟାର ମହେନ୍ଦ୍ର ମହତ, ଭବାନୀପାଟଣା ସଦର ଥାନା ଅନ୍ତର୍ଗତ ନୁଆଗଁାର ସୁଶାନ୍ତ ନାଏକ, ରବିନ୍ଦ୍ର ନାଏକ, ସୁଦାମ ନାଏକ, ଶାନ୍ତ ନାଏକ, ସୁଜିତ ବାଗ, ଉମାଶଙ୍କର ତାଣ୍ଡି, କ୍ଷିତିଶ ନାଏକ। ଅଭିଯୁକ୍ତମାନଙ୍କୁ ପୋଲିସ କୋର୍ଟ ଚାଲାଣ କରିଛି। ପୋଲିସ ପୋଷାକ ବ୍ୟବହାର କରି ଅନେକ ସୁନା ବ୍ୟବସାୟୀଙ୍କ ସମେତ ଲୋକଙ୍କୁ କମ୍ ଦରରେ ସୁନା ବିକ୍ରି କରିବା ପାଇଁ ତାଙ୍କୁ ଡାକି ଘଟଣା ସ୍ଥଳରେ ଲୁଣ୍ଠନ କରୁଥିଲେ। ଡକାୟତ ଗ୍ୟାଙ୍ଗଠାରୁ ନଗଦ ୫ଲକ୍ଷ ୭୪ ହଜା ୫ଶହ ଟଙ୍କା ଜବତ କରାଯାଇଥିବାବେଳେ ଡକାୟତି ବେଳେ ବ୍ୟବହାର କରାଯାଉଥିବା ଏକ ବୁଲେଟ, ଅସଲି ସୁନା ଚାରି ଖଣ୍ଡ, ପ୍ରାୟ ୨ଶହ ଗ୍ରାମ ନକଳି ସୁନା, ହନୁମାନ ପଇସା,୯ଟି ରୂପା ମୁଦ୍ରା, ପୋଲିସ ୟୁନିଫର୍ମ, ୧୪ ମୋବାଇଲ ସହ ଏକ ମାରଣାସ୍ତ୍ର ଜବତ କରିଛି ପୋଲିସ। ଗୁରୁବାର ଅପରାହ୍ନରେ କଳାହାଣ୍ଡି ପୋଲିସ ପକ୍ଷରୁ ଭବାନୀପାଟଣାସ୍ଥିତ ଏସ୍ପି କାର୍ଯ୍ୟାଳୟରେ ଆୟୋଜିତ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି ଏସପି ଅଭିଳାସ ଜି। ପ୍ରକାଶ ଯେ, ଗତ ୧୬ ତାରିଖରେ ଉପରୋକ୍ତ ଡକାୟତ ଗ୍ୟାଙ୍ଗର ମାଷ୍ଟର ମାଇଣ୍ଡ ରାଜ କିଶୋର ନାଗ ବଲାଙ୍ଗୀର ଜିଲା ସଇଁତଳା ଅଞ୍ଚଳର ଜଣେ ବ୍ୟକ୍ତିଙ୍କୁ କମ୍ ଦରରେ ସୁନା ଯୋଗାଇ ଦେବା କହିବା ସହ ଅଧା କିଲୋ ସୁନାକୁ ତାଙ୍କୁ ୧୩ ଲକ୍ଷ ଟଙ୍କାରେ ଦେବା କହି ଭବାନୀପାଟଣା ରେଳ ଷ୍ଟେଷନ ନିକଟକୁ ଡାକିଥିଲେ। ବ୍ୟକ୍ତି ଜଣକ ଟଙ୍କା ନେଇ ଘଟଣାସ୍ଥଳକୁ ଆସିବା ପରେ ପୂର୍ବରୁ ଯୋଜନା ଅନୁଯାୟୀ ଡକାୟତି ଗ୍ୟାଙ୍ଗ ୧୩ ଲକ୍ଷ ଟଙ୍କା ଝାମ୍ପି ନେଇ ଫେରାର ହୋଇଥିଲେ। ଏହି ଘଟଣା ନେଇ କାହାକୁ କହିଲେ ଜୀବନରୁ ମାରିଦେବାକୁ ଧମକ ଦେଇଥିଲେ। ଏ ନେଇ ବ୍ୟକ୍ତି ଜଣକ ସ୍ଥାନୀୟ ସଦର ଥାନାରେ ଅଭିଯୋଗ କରିଥିଲେ। ସଦର ପୋଲିସ ଏକ ମାମଲା (ନଂ .୨୧୦/୨୩) ରୁଜୁ ଘଟଣାର ତଦନ୍ତ ଆରମ୍ଭ କରିଥିଲା। ତଦନ୍ତ ବେଳେ ଅନେକଗୁଡିଏ ତଥ୍ୟ ଓ ପ୍ରମାଣ ପୋଲିସ ହାତରେ ଲାଗିଥିଲା। ପରେ ଏହି ଆନ୍ତଃ ଜିଲା ଡକାୟତ ଗ୍ୟାଙ୍ଗକୁ ଧରିବା ପାଇଁ ଏକ ସ୍ବତନ୍ତ୍ର ଟିମ୍ କରିଥିଲା କଳାହାଣ୍ଡି ପୋଲିସ। ଗୁରୁବାର ସମସ୍ତ ଅଭିଯୁକ୍ତଙ୍କୁ ବଲାଙ୍ଗୀର ଜିଲାରୁ ଧରିଥିଲା ପୋଲିସ। ଏହି ଡକାୟତ ଗ୍ୟାଙ୍ଗ କେବଳ ଉପରୋକ୍ତ ଲୋକଙ୍କୁ ନୁହେଁ ବଂର ଏମାନେ ନକଲି ସୁନା କାରବାର କରୁଥିବାବେଳେ ଅନେକ ସମୟରେ ପୋଲିସ ଓ ସିଆରପିଏଫ୍ ପୋଷାକ ପିନ୍ଧି କମ୍ ଦରରେ ସୁନା ଯୋଗାଇ ଦେବା କହି ଗ୍ରାମାଞ୍ଚଳର ସୁନା ବ୍ୟବସାୟୀଙ୍କୁ ଚିହ୍ନଟ କରି ସେମାନଙ୍କୁ ଫୋନ୍ ରେ ବିଭିନ୍ନ ସ୍ଥାନକୁ ଡାକି ଲୁଟପାଟ କରି ଚମ୍ପଟ ମାରୁଥିଲେ। ପୋଲିସ ପୋଷାକ ବ୍ୟବହାର କରୁଥିବାରୁ ଲୋକମାନେ ପୋଲିସ ନିକଟରେ ଅଭିଯୋଗ କରିବାକୁ ମଧ୍ୟ ଭୟ କରୁଥିଲେ। ଅନ୍ୟପକ୍ଷରେ ଏଭଳି ଘଟଣା ଯଦି କୌଣସି ବ୍ୟକ୍ତିଙ୍କ ସହ ହୋଇଥିଲେ ତୁରନ୍ତ ପୋଲିସକୁ ଜଣାଇବାକୁ ଏସ୍ପି କହିଛନ୍ତି। ସେହିପରି କୌଣସି ସୁନା ବ୍ୟବସାୟୀ ସୁନା କିଣୁଛନ୍ତି ତେବେ ଠିକ ଲୋକଙ୍କଠାରୁ ଜିଏସଟି ବିଲ ସହିତ କିଣିବାକୁ ମଧ୍ୟ ଏସ୍ପି ନିବେଦନ କରିଛନ୍ତି।