ଭଦ୍ରକ ଅଫିସ,୮।୩: ଭଦ୍ରକ ଜିଲା ଅଗରପଡ଼ା ରାମଗଡ଼ ମେଳଣରେ ୬୦ରୁ ଊର୍ଦ୍ଧ୍ୱ ଦୋଳ ବିମାନ ସାମିଲ ହୋଇଛନ୍ତି। ବୁଧବାର ଭୋରରୁ ରାଜାଗଡ଼, ପୁରୁଷଣ୍ଢ, କାଣ୍ଡବା, ମହାନ୍ତିପଡ଼ା, ନୂଆପୋଖରୀ ଆଦି ବିଭିନ୍ନ ଗ୍ରାମରୁ ସୁସଜ୍ଜିତ ରାଧାକୃଷ୍ଣଙ୍କ ବିମାନ ରାଜାଗଡ଼ଠାରେ ଏକତ୍ରିତ ହୋଇଥିଲେ । ସେଠାରୁ ନଗର ସଂକୀର୍ତ୍ତନ ସହିତ ଡିଜେ ବଜାଇ, ବାଣ ଫୁଟାଇ ଶୋଭାଯାତ୍ରାରେ ବଜାର ପରିକ୍ରମା କରି ରାମଗଡ଼ ମେଳଣ ପଡିଆରେ ପହଞ୍ଚିଥିଲା। ସେଠାରେ ଦୋଳମଣ୍ଡପରେ ବିମାନଗୁଡିକୁ ପୂଜାର୍ଚ୍ଚନା ସହ ଭୋଗ ଲାଗି କରାଯାଇଥିଲା । ମଣ୍ଡପରେ ଭଜନ କୀର୍ତ୍ତନ ଦିନ ବ୍ୟାପୀ ଚାଲିବ । ସନ୍ଧ୍ୟାରେ ବିମାନଗୁଡିକ ଫେରିଯିବ। ଦୋଳ କମିଟି ଓ ପୋଲିସ ପକ୍ଷରୁ ଶାନ୍ତି ଶୃଙ୍ଖଳା ରକ୍ଷା ପାଇଁ ସମସ୍ତ ବ୍ୟବସ୍ଥା କରାଯାଇଛି । ମେଳଣ ପଡିଆରେ ବିଭିନ୍ନ ପ୍ରକାର ଦୋକାନ ଖୋଲିଥିବା ବେଳେ ହଜାର ହଜାର ଲୋକଙ୍କ ଭିଡ ପରିଲକ୍ଷିତ ହୋଇଛି।