ଆମ ଦେଶରେ କ୍ରିକେଟ୍ ପ୍ରେମୀ ପ୍ରାୟ ସବୁ ଘରେ ଅଛନ୍ତି। ପଡିଆକୁ ଖେଳାଳୀ ନିଜର ଜର୍ସି ପିନ୍ଧି, ହାତରେ ବ୍ୟାଟ୍ ଧରି ପହଞ୍ଚତ୍ଲେ କ୍ରିକେଟ୍ ପ୍ରେମୀଙ୍କ ହୃଦସ୍ପନ୍ଦନ ବଢିଯାଏ। ବ୍ୟାଟିଂ, ବଲିଂ, ଫିଲ୍ଡିଂ ଚାଲେ। ତା’ସହ ଚାଲେ ଇଂରାଜୀ, ହିନ୍ଦୀରେ କମେଣ୍ଟ୍ରି। ହେଲେ ନିକଟରେ ଆମ ଦେଶର ଭୋପାଳରେ ଏକ ଅଜବ କ୍ରିକେଟ ଟୁର୍ନାମେଣ୍ଟ ହୋଇଥିଲା, ଯାହାର ନାଁ ଥିଲା ‘ମହର୍ଷି କପ୍’। ଏଥିରେ ଖେଳାଳୀମାନେ ଜର୍ସି ଓ ଲୋୟର୍ ପିନ୍ଧି ନ ଥିଲେ ବରଂ ପିନ୍ଧିଥିଲେ ଧୋତି-କୁର୍ତ୍ତା। ଅମ୍ପାୟର ବି ପିନ୍ଧିଥିଲେ ଧୋତି-କୁର୍ତ୍ତା। ତେବେ ସବୁଠୁ ବଡ଼ ଆଶ୍ଚର୍ଯ୍ୟର କଥା ଏହି ଟୁର୍ନାମେଣ୍ଟରେ କମେଣ୍ଟ୍ରି ହୋଇଥିଲା ସଂସ୍କୃତ ଭାଷାରେ। ଏହି ମ୍ୟାଚ୍ ହେଉଛି ଆମ ଦେଶର ପ୍ରଥମ ଅଜବ କ୍ରିକେଟ୍ ମ୍ୟାଚ୍। ମ୍ୟାଚ୍ରେ ଖେଳାଳୀ ଦେଶୀ ପୋଷାକ ପିନ୍ଧି ମଧ୍ୟ ବେଶ୍ ଆରାମ୍ରେ ଦୌଡାଦୌଡି କରି ଖେଳୁଥିଲେ। ଟୁର୍ନାମେଣ୍ଟଟି ଦେଖିବାକୁ ଅଜବ କିନ୍ତୁ ପୁରାପୁରି ଦେଶୀ ଓ ମନୋରଞ୍ଜନଭରା ଥିଲା। ତେଣୁ ଯେବେ ଏହି ଟୁର୍ନାମେଣ୍ଟର ଭିଡିଓ ସୋସିଆଲ ମିଡିଆରେ ଅପଲୋଡ ହେଲା। ଲୋକେ ଚକିତ ହେବା ସହ ଭୁରି ଭୁରି ପ୍ରଶଂସା ବି କରିଥିଲେ। ଅନେକେ କମେଣ୍ଟ ଦେଇଥିଲେ ଉକ୍ତ ମ୍ୟାଚ୍ ଦ୍ୱାରା ସଂସ୍କୃତ ଭାଷାର ନିଶ୍ଚିତଭାବେ ପ୍ରଚାର ପ୍ରସାର ହେବ।