ନ୍ୟୁୟର୍କ, ୧୪।୯: ଅଷ୍ଟ୍ରିଆର ଡୋମିନିକ୍ ଥିମ୍ ଏଠାରେ ଅନୁଷ୍ଠିତ ୟୁଏସ୍ ଓପନ୍ ପୁରୁଷ ସିଙ୍ଗଲ୍ସରେ ଚାମ୍ପିୟନ ହୋଇଛନ୍ତି। ଫାଇନାଲରେ ଥିମ୍ ୨-୬, ୪-୬, ୬-୪, ୬-୩, ୭-୬ (୮/୬) ସେଟ୍ରେ ଜର୍ମାନୀର ଆଲେକ୍ସଜାଣ୍ଡର ଜେଭରେଭଙ୍କୁ ପରାସ୍ତ କରିଛନ୍ତି। ଏଥିସହ ଥିମ୍ ତାଙ୍କ କ୍ୟାରିୟରର ପ୍ରଥମ ଗ୍ରାଣ୍ଡସ୍ଲାମ ଟ୍ରଫି ଜିତିବାର ସୌଭାଗ୍ୟ ଲାଭ କରିଛନ୍ତି। ପ୍ରଥମ ୨ ସେଟ୍କୁ ଯଥାକ୍ରମେ ୨-୬, ୪-୬ ସେଟ୍ରେ ହାରିଥିଲେ ମଧ୍ୟ ପରବର୍ତ୍ତୀ ୩ଟି ସେଟ୍ରେ ଦମ୍ଦାର ପ୍ରତ୍ୟାବର୍ତ୍ତନ କରି ଜେଭରେଭଙ୍କୁ ମାତ୍ ଦେବାରେ ଥିମ୍ ସଫଳ ହୋଇଥିଲେ। ୟୁଏସ୍ ଓପନ୍ ପୁରୁଷ ସିଙ୍ଗଲ୍ସ ଫାଇନାଲରେ ପ୍ରଥମ ୨ ସେଟ୍ ହାରି ପରେ ଟାଇଟଲ୍ ଜିତିବାରେ ୭୧ ବର୍ଷରେ ଏହା ପ୍ରଥମ ଘଟଣା। ଏଥିପୂର୍ବରୁ ୧୯୪୯ ୟୁଏସ୍ ଓପନ୍ ପୁରୁଷ ସିଙ୍ଗଲ୍ସ ଫାଇନାଲରେ ଟ୍ରେଡ୍ ଶ୍ରୋଡରଙ୍କୁ ପରାସ୍ତ କରି ପାଞ୍ଚୋ ଗୋଞ୍ଜାଲେସ୍ ଏହି ସଫଳତା ପାଇଥିଲେ। ଥିମ୍ ପୂର୍ବରୁ ୩ଥର ଗ୍ରାଣ୍ଡସ୍ଲାମ ଫାଇନାଲରେ ପ୍ରବେଶ କରିଥିଲେ ମଧ୍ୟ ରନର୍ସଅପ୍ରେ ସନ୍ତୁଷ୍ଟ ରହିଥିଲେ।
