ନ୍ୟୁୟର୍କ,୨୭।୧୧: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ନିର୍ବାଚନ ହାରିଯାଇଛନ୍ତି। ଜୋ ବାଇଡେନ୍ ଆମେରିକାର ଆଗାମୀ ରାଷ୍ଟ୍ରପତି ହେବା ସ୍ପଷ୍ଟ ହୋଇଯାଇଛି। କିନ୍ତୁ ଏପର୍ଯ୍ୟନ୍ତ ସେ ଟ୍ରମ୍ପ ହ୍ବାଇଟ ହାଉସ୍ ଛାଡିନାହାନ୍ତି। ଥ୍ୟାଙ୍କ୍ସଗିଭିଙ୍ଗ୍ ଡେ କାର୍ଯ୍ୟକ୍ରମରେ ଯୋଗଦେବା ଅବସରରେ ଟ୍ରମ୍ପ ପୁଣି ନିର୍ବାଚନରେ ଜାଲିଆତି ଅଭିଯୋଗ ଆଣିଛନ୍ତି। ଯେଉଁ ପର୍ଯ୍ୟନ୍ତ ଇଲେକ୍ଟୋରାଲ କଲେଜ ବାଇଡେନଙ୍କୁ ବିଜେତା ଘୋଷଣା ନ କରିଛି ସେପର୍ଯ୍ୟନ୍ତ ସେ ହ୍ବାଇଟ୍ ହାଉସ୍ରେ ରହିବେ ବୋଲି ସେ କହିଛନ୍ତି। ଇଲେକ୍ଟୋରାଲ କଲେଜ ବାଇଡେନଙ୍କୁ ବିଜେତା ଘୋଷଣା କଲେ ଆପଣ କଣ କରିବେ ପ୍ରଶ୍ନରେ ଟ୍ରମ୍ପ କହିଛନ୍ତି, ନିଶ୍ଚିତ ଭାବରେ ଏହା ସ୍ବୀକାର କରିବାକୁ କଠିନ ହେବ। ମୁଁ ହ୍ବାଇଟ୍ ହାଉସ୍ ଛାଡିବି ଏହା ସମସ୍ତେ ଜାଣିଛନ୍ତି। କିନ୍ତୁ ଜାଲିଆତି କରି ନିର୍ବାଚନ ଜିତିଥିବା ବାଇଡେନ୍ଙ୍କୁ ରାଷ୍ଟ୍ରପତି କରାଯିବା ଭୁଲ୍ ନିଷ୍ପତ୍ତି ବୋଲି ସେ କହିଛନ୍ତି। ସୂଚନାଯୋଗ୍ୟ, ରାଷ୍ଟ୍ରପତି ନିର୍ବାଚନରେ ଟ୍ରମ୍ପ ହାରିଯାଇଥିଲେ ମଧ୍ୟ ସେ ଏହାକୁ ସ୍ବୀକାର କରିବାକୁ ରାଜି ନାହାନ୍ତି।
