ନ୍ୟୁୟର୍କ,୨୬।୧: ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପୁଣି ଥରେ ଫେସବୁକ ଏବଂ ଇନଷ୍ଟାଗ୍ରାମକୁ ଫେରିବେ। ଆସନ୍ତା ସପ୍ତାହରେ ଟ୍ରମ୍ପଙ୍କ ଫେସବୁକ ଏବଂ ଇନଷ୍ଟାଗ୍ରାମ ଆକାଉଣ୍ଟ ପୁଣି ଆକ୍ଟିଭ୍ ହେବ ବୋଲି ମେଟା ଘୋଷଣା କରିଛି।
ଜାନୁଆରୀ ୬, ୨୦୨୧ରେ, କ୍ୟାପିଟାଲ ହିଲ ଦଙ୍ଗା ପରେ ମେଟା ଟ୍ରମ୍ପଙ୍କ ଆକାଉଣ୍ଟକୁ ସ୍ଥଗିତ ରଖିଥିଲା। ମେଟା ଏକ ବ୍ଲଗ ପୋଷ୍ଟରେ କହିଛି ଯେ, ବିବାଦୀୟ ପୋଷ୍ଟକୁ ଏଡାଇବା ପାଇଁ ନୂଆ ନିୟମ କରାଯାଇଛି। ରାଜନୈତିକ ପ୍ରସାର ତଥା ପାଣ୍ଠି ସଂଗ୍ରହ ପାଇଁ ଫେସବୁକ ଏବଂ ଇନଷ୍ଟାଗ୍ରାମ ହେଉଛି ପ୍ରମୁଖ ଉପକରଣ ବୋଲି ଟ୍ରମ୍ପ କହିଛନ୍ତି।
ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସୋସିଆଲ ମିଡିଆ ପ୍ଲାଟଫର୍ମ ଫେସବୁକକୁ ଫେରିବାକୁ ଚାହୁଁଥିବା ଚର୍ଚ୍ଚା ହେଉଥିଲା। ପୂର୍ବରୁ ଟୁଇଟର ମଧ୍ୟ ଡୋନାଲ୍ଡ ଟ୍ରମ୍ପଙ୍କ ଆକାଉଣ୍ଟ ଉପରେ ବ୍ୟାନ୍ ଲଗାଇଥିଲା। ତେବେ ଏଲନ ମସ୍କ ଟୁଇଟର୍ କିଣିବା ପରେ ଡୋନାଲ୍ଡ ଟ୍ରମ୍ପଙ୍କ ଆକାଉଣ୍ଟ ପୁଣି ଆକ୍ଟିଭ୍ କରାଯାଇଥିଲା। ଯଦିଓ ଟ୍ରମ୍ପ ଏପର୍ଯ୍ୟନ୍ତ ଟୁଇଟ୍ କରିନାହାଁନ୍ତି ଏବଂ ଟୁଇଟର୍ ବଦଳରେ ତାଙ୍କ ସୋସିଆଲ ମିଡିଆ ପ୍ଲାଟଫର୍ମ ଟ୍ରୁଥରେ ପୋଷ୍ଟ କରୁଛନ୍ତି।
