ଓ୍ବାଶିଂଟନ୍,୧୧।୧୧: ଆମେରିକାରେ ରାଷ୍ଟ୍ରପତି ନିର୍ବାଚନର ଫଳାଫଳ ସାମ୍ନାକୁ ଆସିଛି। ଆମେରିକାର ରାଷ୍ଟ୍ରପତି ନିର୍ବାଚନରେ ରିପବ୍ଲିକାନ ପାର୍ଟି ଜିତିଛି। ଜୋ ବାଇଡେନନଙ୍କ ପରେ ବର୍ତ୍ତମାନ ୭୮ବର୍ଷ ବୟସ୍କ ଡୋନାଲ୍ଡ ଟ୍ରମ୍ପ ପୁଣି ଥରେ ଆମେରିକାରେ କ୍ଷମତା ଗ୍ରହଣ କରିବାକୁ ଯାଉଛନ୍ତି। ସୂଚନାଯୋଗ୍ୟ ଯେ, ଏହା ପୂର୍ବରୁ ସେ ୨୦୧୭ରୁ ୨୦୨୧ପର୍ଯ୍ୟନ୍ତ ଆମେରିକାର ରାଷ୍ଟ୍ରପତି ଥିଲେ। ଆମେରିକୀୟ ଇତିହାସରେ ଡୋନାଲ୍ଡ ଟ୍ରମ୍ପ ପ୍ରଥମ ଦୋଷୀ ରାଷ୍ଟ୍ରପତି ହେବାକୁ ଯାଉଛନ୍ତି। ଟ୍ରମ୍ପଙ୍କ ବିରୋଧରେ ଅନେକ ଅପରାଧିକ ମାମଲା ବିଚାରାଧୀନ ଅଛି। ଏଥିମଧ୍ୟରୁ ଗୋଟିଏ ବିଷୟରେ ନିଷ୍ପତ୍ତି ନଭେମ୍ବର ୨୬ରେ ନିଆଯିବ। ବର୍ତ୍ତମାନ ଏଭଳି ପରିସ୍ଥିତିରେ ଲୋକଙ୍କ ମନରେ ଏହି ପ୍ରଶ୍ନ ଆସୁଛି କି ରାଷ୍ଟ୍ରପତି ହେବା ପରେ ଏହି ସମସ୍ତ ଅପରାଧିକ ମାମଲାରେ ଡୋନାଲ୍ଡ ଟ୍ରମ୍ପ ନିଜକୁ ଏକ କ୍ଲିନ ଚିଟ ଦେବେ କି? ଆମେରିକାର ଆଇନ ଏ ବିଷୟରେ କ’ଣ କହୁଛି ଆସନ୍ତୁ ଜାଣିବା…
ଆମେରିକାରେ ମଧ୍ୟ ରାଷ୍ଟ୍ରପତିଙ୍କ କ୍ଷମାଦାନର ଅଧିକାର ଥାଏ। ଯୁକ୍ତରାଷ୍ଟ୍ରର ସମ୍ବିଧାନର ଧାରା ୨, ସେକ୍ସନ ୨, କ୍ଲୋଜ୧ ଆମେରିକାର ରାଷ୍ଟ୍ରପତିଙ୍କୁ ମହାଭିଯୋଗ ମାମଲା ଛାଡି ଆମେରିକା ବିରୁଦ୍ଧରେ ହୋଇଥିବା ସମସ୍ତ ଅପରାଧର ଆଶ୍ୱସ୍ତି ତଥା ସମାଧାନ କରିବାର କ୍ଷମତା ଦେଇଥାଏ। ଏଥିପାଇଁ ଅଭିଯୋଗ ପ୍ରମାଣିତ ହୋଇଛି କି ନାହିଁ ତାହା ଗୁରୁତ୍ୱପୂର୍ଣ୍ଣ ନୁହେଁ। ତେବେ ରାଷ୍ଟ୍ରପତି ନିଜ ପାଇଁ ଏହା କରିପାରିବେ। ସମ୍ବିଧାନରେ ଏ ବିଷୟରେ କିଛି ଲେଖା ନାହିଁ ।
ଏବଂ ଆମେରିକାର ଇତିହାସରେ ସେପରି କୌଣସି ଘଟଣା ସାମ୍ନାକୁ ଆସିନାହିଁ। ଏହି ବିଷୟରେ ଜଣେ ଆମେରିକୀୟ ଆଇନ ପ୍ରଫେସର ୱାଶିଂଟନ ପୋଷ୍ଟରେ ଲେଖିଛନ୍ତି ଯେ ଏହା ହୋଇପାରିବ ନାହିଁ। ଆମେରିକାର ପୂର୍ବତନ ରାଷ୍ଟ୍ରପତି ନିକ୍ସନ ମଧ୍ୟ ତାଙ୍କ ବିରୋଧରେ ଆସିଥିବା ଅଭିଯୋଗରୁ ନିଜକୁ ମୁକ୍ତ କରିପାରି ନ ଥିଲେ। ତାଙ୍କୁ ମଧ୍ୟ ଇସ୍ତଫା ଦେବାକୁ ପଡିଥିଲା। ଏହି ବିଷୟରେ ଆମେରିକାର ନ୍ୟାୟ ବିଭାଗର ନ୍ୟାୟିକ ନୀତି କହୁଛି ଯେ କୌଣସି ବ୍ୟକ୍ତି ନିଜ ମାମଲାରେ ଉଭୟ ବିଚାରପତି ଏବଂ ଅଭିଯୁକ୍ତ ହୋଇପାରିବେ ନାହିଁ।