କଟକ ଅଫିସ,୧୭।୭:ରାଜ୍ୟରେ ସଙ୍କଟାପନ୍ନ କରୋନା ରୋଗୀଙ୍କ ଚିକିତ୍ସା ପାଇଁ ବୁଧବାରଠାରୁ ପ୍ଲାଜ୍ମା ଥେରାପି ଆରମ୍ଭ ହୋଇଛି। ସଂଗୃହୀତ ହୋଇଥିବା ୮ ୟୁନିଟ୍ ପ୍ଲାଜ୍ମାରୁ ଗୋଟିଏ ପ୍ୟାକେଟ ଅଶ୍ୱିନୀ ହସ୍ପିଟାଲରେ ଚିକିତ୍ସିତ ହେଉଥିବା ଜଣେ ରୋଗୀଙ୍କୁ ଦିଆଯାଇଛି। ଆଉ ୪ ଜଣ ରୋଗୀଙ୍କ ପାଇଁ ୪ ୟୁନିଟ୍ ପ୍ଲାଜ୍ମା ସମ୍ ହସ୍ପିଟାଲ ପଠାଯାଇଛି। ଅବଶିଷ୍ଟ ୩ ୟୁନିଟ୍ ଗଚ୍ଛିତ ରହିଛି। ସେଥିରୁ ଆଉ ଗୋଟିଏ ୟୁନିଟ୍ ଶୁକ୍ରବାର ଅଶ୍ୱିନୀ ହସ୍ପିଟାଲକୁ ପଠାଯିବ ବୋଲି ଏସ୍ସିବି ଅଧୀକ୍ଷକଙ୍କ କାର୍ଯ୍ୟାଳୟରୁ ସୂଚନା ମିଳିଛି।
ଉଲ୍ଲେଖଯୋଗ୍ୟ, ପ୍ରଥମ ଦିନର ଡୋନରଙ୍କ ମଧ୍ୟରେ ରାଜ୍ୟର ପ୍ରଥମ ଡାକ୍ତର ଭାବେ କରୋନା ଆକ୍ରାନ୍ତ ହୋଇଥିବା କଟକ ସିଟି ହସ୍ପିଟାଲର ଶିଶୁରୋଗ ବିଶେଷଜ୍ଞ ଚିଦଭୂଷଣ ପଣ୍ଡା ସ୍ବେଚ୍ଛାକୃତ ଭାବେ ପ୍ଲାଜ୍ମା ଦେଇଥିଲେ। ତାଙ୍କ ବ୍ୟତୀତ ମନୋଜ ବରାଳ, ଅବିନାଶ ରାଉତ ଓ ପଙ୍କଜ ବେହେରା ପ୍ଲାଜ୍ମା ଦେଇଛନ୍ତି। ଶୁକ୍ରବାର ଅନେକ ବ୍ୟକ୍ତି ଡୋନର ହେବା ପାଇଁ ସ୍ବେଚ୍ଛାକୃତ ଭାବେ ନିଜକୁ ପଞ୍ଜୀକୃତ କରାଇବା ପାଇଁ ଯୋଗାଯୋଗ କରିଥିବା ଏସ୍ସିବି ଟ୍ରାନ୍ସଫ୍ୟୁଜନ ମେଡିସିନ ବିଭାଗ ପକ୍ଷରୁ ଜଣାପଡ଼ିଛି। ଏହି ସ୍ବେଚ୍ଛାକୃତ ଡୋନରଙ୍କ ମଧ୍ୟରେ ଅଧିକାଂଶ ପଶ୍ଚିମବଙ୍ଗରୁ ଅମ୍ଫନ ପୁନରୁଦ୍ଧାର କାର୍ଯ୍ୟରୁ ଫେରି କରୋନା ଆକ୍ରାନ୍ତ ହୋଇ ପରେ ସୁସ୍ଥ ହୋଇଥିବା ଏନ୍ଡିଆର୍ଏଫ୍ ଓ ଅଗ୍ନିଶମ ବିଭାଗର ଯବାନ ରହିଛନ୍ତି। ଶୁକ୍ରବାରଠାରୁ ଡୋନରଙ୍କ ପଞ୍ଜୀକରଣ, ସ୍କ୍ରିନିଂ ଓ କାଉନସେଲିଂ ଆରମ୍ଭ ହେବ।
ଡୋନରଙ୍କ ପାଇଁ କ’ଣ ରହିଛି ଗାଇଡ୍ଲାଇନ
ଡୋନରଙ୍କ ପ୍ରଥମେ କୋଭିଡ୍ ଟେଷ୍ଟ ଓ ପରେ ଅନ୍ୟ ସମସ୍ତ ଆନୁଷଙ୍ଗିକ ନମୁନା ଯାଞ୍ଚ ହେବ। ନିୟମ ଅନୁଯାୟୀ ଡୋନରଙ୍କ ବୟସ ୨୦ରୁ ୫୦ ବର୍ଷ, ଓଜନ ସର୍ବନିମ୍ନ ୫୫ କିଗ୍ରା ଏବଂ କରୋନା ଆକ୍ରାନ୍ତ ହୋଇ ସୁସ୍ଥ ହେବାର ଅତିକମ୍ରେ ୪ ସପ୍ତାହ ହୋଇଥିବା ଜରୁରୀ। ମହିଳାଙ୍କ କ୍ଷେତ୍ରରେ ସମସ୍ତ ନିୟମ ସମାନ ରହିବା ସହ କେବଳ ଡୋନର ମହିଳା ଶିଶୁ ଜନ୍ମ କିମ୍ବା ଗର୍ଭଧାରଣ କରି ନ ଥିବା ବାଞ୍ଝନୀୟ।
ଏସ୍ସିବିକୁ ନୂଆ ସୁଯୋଗ ଦେଲା ପ୍ଲାଜ୍ମାଥେରାପି
ଜଣେ ଡୋନରଙ୍କଠାରୁ ପ୍ଲାଜ୍ମା ସଂଗ୍ରହ କରିବା ପାଇଁ ଆଫେରେସିସ୍ ମେଶିନର ଭୂମିକା ଗୁରୁତ୍ୱପୂର୍ଣ୍ଣ। ଏହି ମେଶିନ ଡୋନରଙ୍କ ରକ୍ତରୁ ପ୍ଲାଜ୍ମାକୁ ପୃଥକ୍ କରି ପୁଣି ଡୋନରଙ୍କ ଶରୀରକୁ ଅବଶିଷ୍ଟ ରକ୍ତାଂଶ ଫେରାଇଦିଏ। ପ୍ଲେଟ୍ଲେ୍ଟ ସଂଗ୍ରହରେ ମଧ୍ୟ ଏହି ମେଶିନ କାମରେ ଲାଗେ। କିନ୍ତୁ ଏସ୍ସିବିର ବ୍ଲଡ୍ ବ୍ୟାଙ୍କରେ ୫ ବର୍ଷ ଓ ରେଡକ୍ରସ୍ ବ୍ଲଡ୍ ବ୍ୟାଙ୍କରେ ଗତ ୧୦ ବର୍ଷ ହେଲା ଏହି ମେଶିନ ଖରାପ ହୋଇ ପଡ଼ିଥିଲା। ତେଣୁ ଉଭୟ ପ୍ଲାଜ୍ମା ଓ ପ୍ଲେଟ୍ଲେଟ୍ ପାଇଁ ହେଲ୍ଥ ହବ୍ କଟକ ସିଟିକୁ ରାଜଧାନୀ ଭୁବନେଶ୍ୱର ଉପରେ ନିର୍ଭର କରିବାକୁ ପଡୁଥିଲା। କିନ୍ତୁ ଏବେ ଏସ୍ସିବି ଟ୍ରାନ୍ସଫ୍ୟୁଜନ ମେଡିସିନ ବିଭାଗକୁ ପ୍ଲାଜ୍ମାଥେରାପିର ନୋଡାଲ ସେଣ୍ଟର ତଥା ପ୍ଲାଜ୍ମା ବ୍ୟାଙ୍କ ବୋଲି ଘୋଷଣା କରାଯିବା ପରେ ଏଠାକୁ ଏକ ନୂଆ ଆଫେରେସିସ୍ ମେଶିନ ଦିଆଯାଇଛି। ଆଗକୁ ଆଉ ଗୋଟିଏ ନୂଆ ମେଶିନ ମଧ୍ୟ ଆସିବ।