ଭୁବନେଶ୍ୱର,୬।୮(ଅନୁରାଧା ମହାରଣା)ରାଜ୍ୟ ସରକାରଙ୍କ ମୋ କଲେଜ ଅଭିଯାନ ପକ୍ଷରୁ ‘ସାଇବର ସିକ୍ୟୁରିଟି’ ସମ୍ପର୍କିତ ଏକ ସଚେତନତା ଶିବିର ଅନୁଷ୍ଠିତ ହୋଇଯାଇଛି। ୨୫୦ଟି କଲେଜର ପ୍ରାୟ ୧୦ ହଜାର ଛାତ୍ରୀଛାତ୍ର, ଅଧ୍ୟକ୍ଷ ତଥା ପ୍ରାଧ୍ୟାପିକାପ୍ରାଧ୍ୟାପକ ଭର୍ଚୁଆଲରେ ଯୋଗଦେଇଥିଲେ। ମୋ କଲେଜ ଅଧ୍ୟକ୍ଷ ଆକାଶ ଦାସନାୟକ ଏହାକୁ ଉଦ୍ଘାଟନ କରି ସାମ୍ପ୍ରତିକ ସମାଜରେ ସାଇବର ସିକ୍ୟୁରିଟିର ଆବଶ୍ୟକତା ସମ୍ପର୍କରେ ଆଲୋକପାତ କରିଥିଲେ। ଟିକିଏ ଅସାବଧାନତା ଯୋଗୁ ଅନେକେ ସାଇବର ଠକାମିର ଶିକାର ହୋଇ ଧନ, ଜୀବନ ତଥା ସମ୍ମାନ ହାନି କରୁଛନ୍ତି। ତେଣୁ ସମୟର ଆହ୍ବାନ ହେଉଛି କିପରି ଭାବରେ ଆମେ ସାଇବର ସିକ୍ୟୁରିଟି ବିଷୟରେ ସଚେତନ ହେବା ଏବଂ ଯୁବପିଢ଼ି ତଥା ସମାଜକୁ ନିରାପଦ ରଖିବା। ଆଗାମୀ ଦିନରେ ବିଭିନ୍ନ କଲେଜ ତଥା ବିଶ୍ବବିଦ୍ୟାଳୟରେ ଏହିପରି କାର୍ଯ୍ୟକ୍ରମ ଆୟୋଜିତ ହେବ ବୋଲି ସେ କହିଥିଲେ। ସିକ୍ୟୁରିଟି ବିଶେଷଜ୍ଞ ପ୍ରଶାନ୍ତ କୁମାର ସାହୁ କହିଲେ, ନିଜର ବିଦେଶ ଭ୍ରମଣ ବା ଛୁଟି କାଟିବା କଥା ସାମାଜିକ ଗଣମାଧ୍ୟମରେ ଜଣାନ୍ତୁ ନାହିଁ। ଯେତେ ପାରିବେ ନିଜର ବ୍ୟକ୍ତିଗତ କାଗଜପତ୍ର ତଥା ନିଜର ସମ୍ବେଦନଶୀଳ ଫଟୋ ଅପଲୋଡ୍ କରନ୍ତୁ ନାହିଁ। ଛୋଟ ଛୋଟ ସାବଧାନତା ବହୁ ବଡ଼ ବଡ଼ ଅନ୍ଲାଇନ ବିପଦରୁ ରକ୍ଷା କରିପାରିବ। ସ୍ମାର୍ଟ ଫୋନରେ ନିଜର ଆଧାର, ପାନ କାର୍ଡ, ଡେବିଟ ତଥା କ୍ରେଡିଟ କାର୍ଡର ଫଟୋ ଉଠେଇ ରଖନ୍ତୁ ନାହିଁ। ସର୍ବସାଧାରଣ ସ୍ଥାନରେ ମିଳୁଥିବା ଫ୍ରି ୱାଇଫାଇ ବ୍ୟବହାର କରନ୍ତୁ ନାହିଁ। ଭିଡିଓ କଲ୍ରେ କୌଣସି ଅଚିହ୍ନା ବ୍ୟକ୍ତି ସହିତ କଥାବାର୍ତ୍ତା ହୁଅନ୍ତୁ ନାହିଁ। ସାଇବର ସିକ୍ୟୁରିଟି ବିଶେଷଜ୍ଞ ଲିଙ୍ଗରାଜ ସେଠୀ ସାଇବର ସିକ୍ୟୁରିଟିରେ କିପରି ନିଜର ଜୀବିକା ଗଢି ହେବ ସେ ଦିଗରେ ବିଶେଷ ଦୃଷ୍ଟିପାତ କରିଥିଲେ। ଆଗାମୀ ଦିନରେ ନିଜ ବୈଷୟିକ ସୁରକ୍ଷା ଦିଗରେ ଅଧିକ ଧ୍ୟାନ ଦେବାକୁ ପଡିବ। କୌଣସି ଅଜଣା ଲିଙ୍କ୍ରେ କ୍ଲିକ୍ କରନ୍ତୁ ନାହିଁ ଓ ଅଜଣା ଆପ୍ଗୁଡିକୁ ତୁରନ୍ତ ଡିଲିଟ୍ କରନ୍ତୁ। ଆବଶ୍ୟକସ୍ଥଳେ ସାଇବର ସିକ୍ୟୁରିଟି ଟୋଲ ନଂ.୧୯୩0ରେ କଲ କରିବା ପାଇଁ ସେଠୀ ପରାମର୍ଶ ଦେଇଛନ୍ତି। ଚଇତାଳି ସୋମ ଧନ୍ୟବାଦ ଦେଇଥିଲେ।