ଲକ୍ଷ୍ନୌ,୫।୫: ପୃଥିବୀ ବ୍ୟାପୀ କରୋନା ସଂକ୍ରମଣ ନେଇ ସଙ୍କଟଜନକ ସ୍ଥିତି ସୃଷ୍ଟି ହୋଇଛି। ଏପରିସ୍ଥଳେ କିଭଳି ଜୀବନଶୈଳୀ ଆପଣେଇଲେ ସଂକ୍ରମଣଠାରୁ ଦୂରେଇ ରହିହେବ ସେ ନେଇ ବିଶ୍ୱ ସ୍ବାସ୍ଥ୍ୟ ସଂଗଠନ ପକ୍ଷରୁ ମାର୍ଗଦର୍ଶିକା ଜାରି କରାଯାଇଛି। ବାୟୁ ଦ୍ୱାରା କରୋନା ସଂକ୍ରମଣ ବ୍ୟାପୁଥିବା ଖବର ମିଳିବା ପରେ ଲୋକଙ୍କ ମଧ୍ୟରେ କୋକୁଆ ଭୟ ସୃଷ୍ଟି ହୋଇଛି। ତେବେ ଭୟ ନ କରି ଖୋଲା ପବନରେ ବୁଲିଲେ କରୋନା ସଂକ୍ରମଣ ହେବନି ବୋଲି ଲକ୍ଷ୍ନୌସ୍ଥିତ ସଞ୍ଜୟ ଗାନ୍ଧୀ ପିଜିଆଇର ହୃଦୟ ରୋଗ ବିଶେଷଜ୍ଞ ପ୍ରଫେସର ସୁଦୀପ୍ କୁମାର ସୂଚନା ଦେଇଛନ୍ତି। କରୋନା ଭୂତାଣୁ ବାୟୁରେ ବ୍ୟାପିବା ଅର୍ଥ ଏହା ନୁହେଁ ଯେ, ରାସ୍ତା, ପାର୍କ, ଲକ୍ ଅବା ଘର ବାହାରେ ଉଡ଼ି ବୁଲୁଛି। ମାତ୍ର ବନ୍ଦ ଘର ପ୍ରତି ସାବଧାନ ରହିବା ଆବଶ୍ୟକ। ବନ୍ଦ ଘରେ ଏକାଧିକ ଲୋକ ରହିଲେ ସଂକ୍ରମଣ ଶୀଘ୍ର ବ୍ୟାପିଥାଏ। ଯଦି ସେମାନଙ୍କ ମଧ୍ୟରେ କେହି ଆକ୍ରାନ୍ତ ହୋଇଥାନ୍ତି ତାଙ୍କର ଛିଙ୍କ ଅବା ନିଶ୍ୱାସରେ କରୋନା ଭୂତାଣୁ ବାୟୁ ମଣ୍ଡଳରେ ସହଜରେ ବ୍ୟାପିଥାଏ। ମାତ୍ର ଘରର କବାଟ ଝରକା ଖୋଲି ଦେଲେ ବାୟୁ ଚଳାଚଳ କରିବା ଯୋଗୁ ଏଭଳି ଆଶଙ୍କା କମ୍ ହୋଇଥାଏ ବୋଲି ସେ କହିଛନ୍ତି। କିନ୍ତୁ କେତେକ ଲୋକ ବାଲକୋନୀ ଅବା ଅଗଣା ଭିତରେ ଚାଲବୁଲ୍ କରିବାକୁ ଏବେ ଭୟ କରୁଥିତ୍ବା ଦେଖାଯାଉଛି। ଏଭଳି ଭୟ କରିବା ଅନାବଶ୍ୟକ ବୋଲି ସେ କହିଛନ୍ତି। ଘରୁ ବାହାରକୁ ବାହାରିଲେ ମାସ୍କ୍ ପିନ୍ଧିବା ସହିତ ସାମାଜିକ ଦୂରତା ବଜାୟ ରଖିବା ଉଚିତ। ଏହାଦ୍ୱାରା ସଂକ୍ରମଣ ଆଶଙ୍କା ଯଥେଷ୍ଟ କମି ଯାଇଥାଏ ବୋଲି ସେ କହିଛନ୍ତି।
