ନୂଆଦିଲ୍ଲୀ, ୧୩।୧୨ :ଶୀତ କାକର ସହି ମରିବୁ ପଛେ ପଛଘୁଞ୍ଚା ଦେବୁନାହିଁ । ଚାଷୀ ଆନ୍ଦୋଳନକୁ ଭଣ୍ଡୁର କରିବା ପାଇଁ କେନ୍ଦ୍ରର ଉଦ୍ୟମକୁ ସଫଳ ହେବାକୁ ଦିଆଯିବ ନାହିଁ ବୋଲି ପ୍ରତିଜ୍ଞା କରିଛନ୍ତି କୃଷକ ସଙ୍ଗଠନ । ଦେଶକୁ ଆହାର ଯୋଗାଉଥିବା କୃଷକ ନିଜ ହକ୍ ପାଇଁ ଲଢ଼େଇ କରୁଥିବାବେଳେ ଦିଲ୍ଲୀକୁ ଯେପରି ଅଧିକ ସଂଖ୍ୟକ ଚାଷୀ ଆସି ନ ପାରିବେ ସେଥିପାଇଁ ଜାତୀୟ ରାଜଧାନୀ ସଂଲଗ୍ନ ସୀମାରେ ବ୍ୟାପକ ପୋଲିସ ମୁତୟନ କରାଯାଇ ଆଗକୁ ବଢ଼ିବାକୁ ଦିଆଯାଉନାହିଁ । ସରକାର ବିବାଦୀୟ କୃଷି ଆଇନକୁ ପ୍ରତ୍ୟାହାର ନ କଲେ ଆସନ୍ତା ସୋମବାର ଅନଶନରେ ବସିବେ ବୋଲି ଚାଷୀ ନେତାମାନେ ଚେତାବନୀ ଦେଇଛନ୍ତି।
କେନ୍ଦ୍ର ସରକାରଙ୍କ ୩ ବିବାଦୀୟ କୃଷି ଆଇନ ପ୍ରତ୍ୟାହାର ଦାବିରେ ଦିଲ୍ଲୀ ସୀମାରେ ଚାଷୀଙ୍କ ଆନ୍ଦୋଳନ ଶନିବାର ୧୭ ଦିନରେ ପହଞ୍ଚତ୍ଛି। ଆଇନର କେତେକ ଧାରାରେ ସଂଶୋଧନ ପାଇଁ ସରକାର ପ୍ରସ୍ତାବ ଦେଇଥିଲା ବେଳେ ଚାଷୀ ଏହାର ସମ୍ପୂର୍ଣ୍ଣ ପ୍ରତ୍ୟାହାର ଦାବିରେ ଅଡ଼ି ବସିଛନ୍ତି। ସରକାରଙ୍କ ଉପରେ ଅଧିକ ଚାପ ପକାଇବା ପାଇଁ ୧୪ ତାରିଖରେ ସମସ୍ତ କୃଷକ ନେତା ସିଙ୍ଘୁ ସୀମାରେ ଅନଶନରେ ବସିବା ପାଇଁ ନିଷ୍ପତ୍ତି ନେଇଛନ୍ତି। ଯଦି ସରକାର ଆଲୋଚନା ଚାହୁଁଛନ୍ତି, ତେବେ ସେଥିପାଇଁ ଆମେ ପ୍ରସ୍ତୁତ ବୋଲି କୃଷକ ନେତା କହିଛନ୍ତି। ତେବେ ପ୍ରଥମେ ୩ ଆଇନ ପ୍ରତ୍ୟାହାର ନେଇ ଆଲୋଚନା ହେବା ଆବଶ୍ୟକ। ଆମେ ସଂଶୋଧନ ସପକ୍ଷରେ ନାହୁଁ ବୋଲି ସଂଯୁକ୍ତ କିଷାନ ଆନ୍ଦୋଳନର ନେତା କମଲ ପ୍ରୀତ୍ ସିଂ ପନ୍ନୁ କହିଛନ୍ତି। ସରକାର ଚାଷୀ ଆନ୍ଦୋଳନକୁ ବିଫଳ କରିବାକୁ ଚାହୁଁଛନ୍ତି। ତାହା ହେବାକୁ ଦିଆଯିବନାହିଁ ବୋଲି କୃଷକ ନେତା କହିଛନ୍ତି। ଶାନ୍ତିପୂର୍ଣ୍ଣ ଉପାୟରେ ଆନ୍ଦୋଳନ ଜାରି ରଖିବାକୁ ଚାଷୀମାନେ ପ୍ରତିଜ୍ଞା କରିଛନ୍ତି।
ପୂର୍ବାହ୍ନ ୧୧ଟାରୁ କୃଷକମାନେ ଟ୍ରାକ୍ଟର ଶୋଭାଯାତ୍ରା କରିବେ। ରାଜସ୍ଥାନର ଶାହଜାହାନପୁରରୁ ଏହା ଆରମ୍ଭ ହେବ ଏବଂ ଜୟପୁର-ଦିଲ୍ଲୀ ମୁଖ୍ୟ ରାସ୍ତାକୁ ଅବରୋଧ କରାଯିବ। ସେପ୍ଟେମ୍ବରରେ ପାର୍ଲାମେଣ୍ଟରେ ଗୃହୀତ ହୋଇଥିବା ୩ ଆଇନ ଚାଷୀ ବିରୋଧୀ ଏବଂ ଏହା କୃଷକଙ୍କୁ ବୃହତ୍ କର୍ପୋରେଟଗୁଡ଼ିକର ଦୟାରେ ଛାଡ଼ିଦେବ ବୋଲି ସେମାନେ ଅଭିଯୋଗ କରିଛନ୍ତି। ଅଚଳାବସ୍ଥାର ସମାଧାନ ପାଇଁ କୃଷକ ସଂଗଠନ ସହ ସରକାରଙ୍କ ଏକାଧିକ ପର୍ଯ୍ୟାୟ ଆଲୋଚନା ବିଫଳ ହେଲାଣି।
ଆନ୍ଦୋଳନକୁ ବ୍ୟାପକ କରିବାକୁ ଚାଷୀନେତାମାନେ ଧମକ ଦେଇଛନ୍ତି। ଆନ୍ଦୋଳନରେ ସାମିଲ ହୋଇଥିବା ୩୨ କୃଷକ ସଂଗଠନ ମଧ୍ୟରୁ ଶୁକ୍ରବାର ଗୋଟିଏ ସଂଘ କୃଷି ଆଇନକୁ ସୁପ୍ରିମକୋର୍ଟରେ ଚ୍ୟାଲେଞ୍ଜ କରିଥିଲା। ଦିଲ୍ଲୀ-ଜୟପୁର ଜାତୀୟ ରାଜପଥ ଏବଂ ଯମୁନା ଏକ୍ସପ୍ରେସ୍ ଓ୍ବେ ଅବରୋଧ କରିବାକୁ କୃଷକମାନେ ନିଷ୍ପତ୍ତି ନେଇଥିବାରୁ ଦିଲ୍ଲୀ ସୀମାରେ ସୁରକ୍ଷା ବ୍ୟବସ୍ଥାକୁ ବଢ଼ାଇଦିଆଯାଇଛି। ବିଭିନ୍ନ ସୀମାରେ କଂକ୍ରିଟ୍ ପ୍ରତିବନ୍ଧକ ରଖାଯିବା ସହ ଅଧିକ ସଂଖ୍ୟାରେ ସୁରକ୍ଷା ବଳ ନିୟୋଜିତ ହୋଇଛନ୍ତି। ଆନ୍ଦୋଳନସ୍ଥଳକୁ ଯେପରି ଅଧିକ କୃଷକ ନ ଆସନ୍ତି ସେଥିପାଇଁ ଗୁରୁଗ୍ରାମରେ ହଜାରେରୁ ଅଧିକ ପୋଲିସ କର୍ମଚାରୀଙ୍କୁ ନିୟୋଜିତ କରାଯାଇଥିବାବେଳେ ଫରିଦାବାଦରେ ୩,୫୦୦ ସୁରକ୍ଷାକର୍ମୀ ମୁତୟନ ହୋଇଛନ୍ତି। ଶନିବାର ଭାରତୀୟ କିଷାନ ୟୁନିୟନ ଜାତୀୟ ରାଜପଥ ୯୧ ନିକଟରେ ଥିବା ଏକ ଟୋଲ୍ ପ୍ଲାଜାକୁ ଦଖଲ କରିବା ପରେ ସ୍ଲୋଗାନ ଦେଇଥିଲା। ଟୋଲ୍ ପ୍ଲାଜା ଦଖଲ ପରେ ଗାଡ଼ିଗୁଡ଼ିକ ଦେୟ ନ ଦେଇ ଚାଲିଯାଇଥିଲେ।