ନୂଆଦିଲ୍ଲୀ,୨୦ା୧୧: ଦିଲ୍ଲୀରେ ଶାସକ ଆମ ଆଦ୍ମୀ ପାର୍ଟି ସରକାର ବିବାହ ସମାରୋହରେ କେବଳ ୫୦ ଅତିଥି ଯୋଗ ଦେବା ପାଇଁ ଆଦେଶ ଦେଇଛନ୍ତି। ଏହା ପରେ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ଏକ କନ୍ୟାଘର ପକ୍ଷରୁ କୁହାଯାଇଛି ଯେ, ସରକାର ଏହି ଆଦେଶ ଦେବା ପୂର୍ବରୁ ବିବାହ ଉତ୍ସବ ଆୟୋଜନ କରୁଥିବା ମାତାପିତାଙ୍କୁ ଅନ୍ତତଃପକ୍ଷେ ସମୟ ଦେବା ଉଚିତ୍। କାରଣ ସେମାନେ ନିଜସ୍ବ ବ୍ୟବସ୍ଥା କରିପାରିବେ।
ନୂଆଦିଲ୍ଲୀ ଅଞ୍ଚଳର ଓ୍ବାଜିରାବାଦରେ ରହୁଥିବା ଭୁଲେରାମ କହିଛନ୍ତି ଯେ, ଡିସେମ୍ବର ୮ରେ ତାଙ୍କ ଝିଅ ଜ୍ୟୋତିର ବିବାହ ଉତ୍ସବ ଅନୁଷ୍ଠିତ ହେବ। ବିବାହ ପୂର୍ବରୁ ନିଷ୍ପତ୍ତି ନିଆଯାଇଥିଲା ଯେ, ବରଯାତ୍ରୀରେ ପ୍ରାୟ ୧୫୦ ଲୋକ ଆସିବେ। ସେ କହିଛନ୍ତି, ବରଯାତ୍ରୀରେ ୧୫୦ ଜଣ, ପରିବାରର ପ୍ରାୟ ୨୦୦ ଏବଂ ୧୦୦ ଜଣ ପରିଚିତ ଲୋକଙ୍କୁ ଝିଅ ବିବାହ ଉତ୍ସବରେ ଯୋଗଦେବାକୁ ନିମନ୍ତ୍ରଣ କରିଥିଲେ। ଏପରିକି ସମସ୍ତଙ୍କ ଘରକୁ ଯାଇ କାର୍ଡ ମଧ୍ୟ ବାଣ୍ଟିଥିଲେ। ମାତ୍ର ହଠାତ୍ ସରକାରଙ୍କ ନିଷ୍ପତ୍ତି ଆସିଲା ଯେ, ବର୍ତ୍ତମାନ ବିବାହରେ କେବଳ ୫୦ ଜଣ ଲୋକ ସାମିଲ ହେବେ। ସରକାରଙ୍କ ନିଷ୍ପତ୍ତି ସମ୍ପୂର୍ଣ୍ଣ ଠିକ ମାତ୍ର ଗତ ଏକ ମାସ ଧରି ବିବାହ ପ୍ରସ୍ତୁତି ଶେଷ କରିଥିବା ପରିବାର ପ୍ରତି ସରକାର ନିଶ୍ଚିତ ଚିନ୍ତା କରିବା ଦରକାର।
ସେ କହିଥିଲେ ଯେ, ବର୍ତ୍ତମାନ ପ୍ରତ୍ୟେକ ସମ୍ପର୍କୀୟଙ୍କୁ ବିବାହ ଉତ୍ସବରେ ନ ଆସିବା ପାଇଁ ଅନୁରୋଧ କରୁଛନ୍ତି। ଆହୁରି ମଧ୍ୟ ବରଯାତ୍ରୀରେ ମାତ୍ର ୨୦-୨୫ ଜଣ ଲୋକ ଆସିବା ପାଇଁ ବରଘର ଲୋକଙ୍କୁ ଜଣାଇଛନ୍ତି। ଏହା ଦ୍ୱାରା ତାଙ୍କର ସମ୍ମାନ ହାନି ହେବା ସହ ସମ୍ପର୍କୀୟଙ୍କ ନିକଟରେ ତାଙ୍କୁ ଖରାପ ଲାଗୁଛି। ବାଧ୍ୟରେ ସେ ଅତିଥିଙ୍କୁ ମନା କରୁଥିବା କହିଛନ୍ତି।