ଭୁବନେଶ୍ୱର,୧୧।୩ (ବ୍ୟୁରୋ): ପୌର ନିର୍ବାଚନରେ ଦଳୀୟ ଟିକେଟ ପାଇବାରୁ ବଞ୍ଚତ୍ତ ହେବାପରେ ଅସନ୍ତୋଷ ଜାହିର କରୁଛନ୍ତି ଆଶାୟୀ। ଦୀର୍ଘବର୍ଷ ଧରି ଦଳ ସହିତ ରହି ବିଭିନ୍ନ କାର୍ଯ୍ୟରେ ନେତୃତ୍ୱ ନେଇଥିଲେ ମଧ୍ୟ ଏହାର ପ୍ରତିଦାନ ସ୍ବରୂପ ଦଳ ସେମାନଙ୍କ ପ୍ରତି ପ୍ରତାରଣା କରିଥିବା ସେମାନେ ଅଭିଯୋଗ କରି ଆସୁଛନ୍ତି। ଯେଉଁଥିପାଇଁ ଭୁବନେଶ୍ୱର ମହାନଗର ନିଗମ (ବିଏମ୍ସି)ରେ ନାମାଙ୍କନ ଦାଖଲ ସରିବା ପରେ ମାଳ ମାଳ ବିଦ୍ରୋହୀ ପ୍ରାର୍ଥୀ ସ୍ବାଧୀନ ଭାବେ ଉଭା ହୋଇଛନ୍ତି। ପ୍ରାର୍ଥିପତ୍ର ପ୍ରତ୍ୟାହାର ପାଇଁ ଦଳ ପକ୍ଷରୁ ଚାରିଆଡୁ ଚାପ ପଡୁଥିଲେ ମଧ୍ୟ ଅଧିକାଂଶ ଓହରିବେ ନାହିଁ ବୋଲି ସୂଚନା ମିଳିଛି। ବିଏମ୍ସିର ୬୭ ଓ୍ବାର୍ଡ ପାଇଁ ଭାଜପା ସମ୍ପୂର୍ଣ୍ଣ ପ୍ରାର୍ଥତ୍ ତାଲିକା ଘୋଷଣା କରିଥିଲା। ହେଲେ ନାମାଙ୍କନପତ୍ର ଦାଖଲ ଶେଷ ପର୍ଯ୍ୟନ୍ତ କଂଗ୍ରେସ ମାତ୍ର ୪୩ ଓ୍ବାର୍ଡ ପାଇଁ ପ୍ରାର୍ଥୀ ଦେବାରେ ସକ୍ଷମ ହୋଇଥିବାବେଳେ ଶାସକ ବିଜେଡିରେ ଏହାର ଓଲଟା ଚିତ୍ର ଦେଖିବାକୁ ମିଳିଥିଲା। ଟିକେଟ ପାଇବାକୁ ବହୁ ଆଶାୟୀଙ୍କ ମଧ୍ୟରେ ଟଣାଓଟରା ଲାଗିବାରୁ ବିଜେଡି ବେଶ୍ ଚାଲାକ୍ର ସହ ଗୋଟିଚାଳନା କରିଥିଲା। କନ୍ଦଳ ଏଡାଇବା ପାଇଁ ଟାଣୁଆ ଆଶାୟୀଙ୍କୁ ନାମାଙ୍କନ ଦାଖଲ କରିବା ଲାଗି ଭିତିରି ସୂଚନା ଦିଆଯାଇଥିଲା। ଶେଷ ସମୟରେ ବିଧିବଦ୍ଧ ଘୋଷଣା ହୋଇ ଥିଲେ ମଧ୍ୟ ବହୁ ଆଶାୟୀ ଟିକଟରୁ ବଞ୍ଚତ୍ତ ହୋଇଥିଲେ। ଏବେ ୬୭ଟି ଓ୍ବାର୍ଡ ପାଇଁ ୮୭ଜଣ ପ୍ରାର୍ଥୀ ନିଜକୁ ବିଜେଡି ବୋଲି କହୁଥିବାବେଳେ ୨୦ଜଣ ସ୍ବାଧୀନ ଭାବେ ଲଢ଼ିବାକୁ ଯାଉଛନ୍ତି।
ଓ୍ବାର୍ଡ ନଂ. ୮ରୁ ଲାଲମୋହନ ଟୁଡୁ ଓ ଡିମିରୁ ମାଝି ବିଜେଡିରୁ ପ୍ରାର୍ଥତ୍ପତ୍ର ଦାଖଲ କରିଥିଲେ ମଧ୍ୟ ଲାଲମୋହନଙ୍କୁ ଟିକେଟ ମିଳିଛି। ସେହିପରି ଓ୍ବାର୍ଡ ନଂ. ୧୦ରେ ଏସ୍କେ ମୁସାରନ୍ଙ୍କ ଟିକେଟ ନେଇ ସ୍ପଷ୍ଟ ହୋଇଥିବାବେଳେ ଏଠାରୁ ଆଉ ୨ଜଣ ବିଜେଡ଼ି ଆଶାୟୀ ସ୍ବାଗତିକା ରାଉତ ଓ ଦିଲୀପ କୁମାର ନାୟକ ନାମାଙ୍କନପତ୍ର ଦାଖଲ କରିଛନ୍ତି। ଓ୍ବାର୍ଡ ନଂ.୧୧ରେ ପ୍ରଭାସିନୀ ମହାନ୍ତି, ରଶ୍ମିତା ମହାନ୍ତି, ସ୍ମରଣିକା ମହାନ୍ତି, ଝୁନା କୁମାରୀ ପଟ୍ଟନାୟକ ବିଜେଡିରୁ ନାମାଙ୍କନ ଦାଖଲ କରିଥିଲେ। ଏବେ ପ୍ରଭାସିନୀଙ୍କୁ ଟିକେଟ ମିଳିବାପରେ ଅନ୍ୟ ଆଶାୟୀମାନେ ସ୍ବାଧୀନ ଭାବେ ଲଢ଼ିବାକୁ ମନସ୍ଥ କରିଛନ୍ତି। ଓ୍ବାର୍ଡ ନଂ. ୧୩, ୧୪, ୧୬, ୧୭, ୨୯, ୩୫, ୪୧, ୪୮, ୫୭, ୬୦, ୬୫, ୬୭ରେ ମଧ୍ୟ ଏକାଧିକ ଆଶାୟୀ ବିଜେଡିରୁ ପ୍ରାର୍ଥତ୍ପତ୍ର ଦାଖଲ କରିଛନ୍ତି। ଏଭଳି ଘଟଣାରୁ ଦଳ ମଧ୍ୟରେ ଥିବା ମତାନ୍ତର ଧୀରେ ଧୀରେ ପଦାକୁ ଆସୁଛି। ଗୋଟିଏ ଦଳରେ ଥାଇ ବି ପରସ୍ପର ବିରୋଧରେ ଆଶାୟୀମାନେ ଛିଡାହେବାକୁ ସଜବାଜ ହେଉଛନ୍ତି। ଆତ୍ମସମ୍ମାନର ପ୍ରଶ୍ନ ଉଠାଇ ନିଜର ସମର୍ଥକ ଯୋଗାଡ଼ରେ ସମସ୍ତେ ବ୍ୟସ୍ତ। ଫଳରେ ଭୋଟ ମଧ୍ୟ ଭାଗ ଭାଗ ହେବାର ସମ୍ଭାବନା ଥିବାରୁ ଏହାର ଭରପୂର ଫାଇଦା ନେବାକୁ ବିରୋଧୀ ଚାହିଁ ବସିଛନ୍ତି। ତେବେ ପ୍ରାର୍ଥତ୍ପତ୍ର ପ୍ରତ୍ୟାହାର ପାଇଁ ୧୪ ତାରିଖ ପର୍ଯ୍ୟନ୍ତ ସମୟ ଥିବାରୁ ଏହା ଭିତରେ ଅସନ୍ତୁଷ୍ଟଙ୍କୁ ମନାଇ ପାରିଲେ ଦଳ ପାଇଁ ନିଶ୍ଚିତ ବିଜୟର ଟିକା ପାଲଟିବ ବୋଲି ରାଜନୈତିକ ବିଶ୍ଳେଷକମାନେ ମତ ପ୍ରକାଶ କରିଛନ୍ତି।
ଏ ସମ୍ପର୍କରେ ୬୦ ନଂ. ଓ୍ବାର୍ଡରୁ ସ୍ବାଧୀନ ପ୍ରାର୍ଥୀ ହୋଇଥିବା ଚନ୍ଦ୍ରଶେଖର ମଲ୍ଲିଆ କୁହନ୍ତି, ଦଳ ଗଠନ ହେବାଠାରୁ ମୁଁ ଦଳ ସହିତ ରହି ସବୁ କାର୍ଯ୍ୟରେ ସହଯୋଗ କରିଛି। ଚଳିତ ନିର୍ବାଚନରେ ଟିକେଟ ଦିଆଯିବ ବୋଲି ପ୍ରତିଶ୍ରୁତି ଦିଆଯାଇଥିଲା। ମୁଁ ନାମାଙ୍କନ ଦାଖଲ କଲି। ମାତ୍ର ଶେଷ ମୁହୂର୍ତ୍ତରେ ଟିକେଟ କଟିଲା। ଏହା ନିଶ୍ଚିତ ପକ୍ଷେ ମୋ ପାଇଁ ଏବଂ ମୋ ଉପରେ ଭରସା କରି ଆସୁଥିବା ସାଧାରଣ ଲୋକଙ୍କ ପାଇଁ ଅପମାନର ବିଷୟ। ଲୋକଙ୍କ ଅନୁରୋଧକ୍ରମେ ମୁଁ ସ୍ବାଧୀନ ପ୍ରାର୍ଥୀ ଭାବେ ନିର୍ବାଚନ ଲଢିବାକୁ ମନସ୍ଥ କରିଛି।
ଓ୍ବାର୍ଡ ନଂ.୩୮ର ସ୍ବାଧୀନ ପ୍ରାର୍ଥୀ ରାଜଶ୍ରୀ ମହାନ୍ତି କୁହନ୍ତି, ୧୯୯୨ରୁ ଆମ ପରିବାର ବିଜେଡି ସହିତ ରହି ଆସିଛି। ପୂର୍ବରୁ ମୋ ସ୍ବାମୀ ନିଖିଳ କୁମାର ବଳବନ୍ତରାୟ ୨ଥର କର୍ପୋରେଟର ଭାବେ ଲୋକଙ୍କ ସୁଖଦୁଃଖ ବୁଝୁଛନ୍ତି। ଲୋକେ ଆମକୁ ଚାହୁଁଛନ୍ତି। ଆମ ଉପରେ ତାଙ୍କର ଭରସା ଅଛି। ତେଣୁ ଏଥର ମୁଁ ବିଜୁ ପଟ୍ଟନାୟକଙ୍କ ଆଦର୍ଶ ଓ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଆଶୀର୍ବାଦରେ ସ୍ବାଧୀନ ପ୍ରାର୍ଥୀ ଭାବେ ନିର୍ବାଚନ ଲଢ଼ୁଛି।
ସେହିପରି ଓ୍ବାର୍ଡ ନଂ.୫୭ର ସ୍ବାଧୀନ ପ୍ରାର୍ଥୀ ବନ୍ଦନା ସାହୁ କହିଛନ୍ତି, ପୂର୍ବରୁ ମୁଁ ସ୍ବାଧୀନ ପ୍ରାର୍ଥୀ ଭାବେ ନିର୍ବାଚନ ଲଢିଥିଲି। ଜିତିବା ପରେ ବିଜେଡି ମୋତେ ଦଳରେ ମିଶାଇ ଥିଲା। ହେଲେ ଟିକେଟ ଦେଲା ନାହିଁ। ତଥାପି ମୁଁ ହାର ମାନିବି ନାହିଁ। ଲୋକଙ୍କ ପାଇଁ କରିଥିବା କାମ ହିଁ ମୋର ପରିଚୟ ଓ ଆଶୀର୍ବାଦ ସାଜିବ ବୋଲି ଆଶା ରଖିଛି। ଅନ୍ୟପକ୍ଷରେ ଓ୍ବାର୍ଡ ନଂ.୨୯ରୁ ସେଖ୍ ନିଜାମୁଦ୍ଦିନ କୁହନ୍ତି, ମୁଁ ୬ଥର କର୍ପୋଟେର ଭାବେ କାମ କରିଛି। ଏଥର ଟିକେଟ ନିଷ୍ପତ୍ତି ବିଳମ୍ବ ହେବାରୁ ମୁଁ ମଧ୍ୟ ଦଳରୁ ନାମାଙ୍କନ ଦାଖଲ କରିଥିଲି। ଅନ୍ୟ ଜଣଙ୍କୁ ଟିକେଟ ମିଳିଲା। ତେଣୁ ଶୁକ୍ରବାର ପ୍ରାର୍ଥତ୍ପତ୍ର ପ୍ରତ୍ୟାହାର କରିବି।