କାମାକ୍ଷାନଗର, ୨୯।୫(ଡି.ଏନ୍.ଏ.): ଋତୁସ୍ରାବ ଏକ ଜୈବିକ ପ୍ରକ୍ରିୟା। ଏହା ଲଜ୍ଜାକର ବିଷୟ ନୁହେଁ, ବରଂ ଜଣେ ନାରୀ ପାଇଁ ଜରୁରୀ। ଏହା ବିନା ଜଣେ ମହିଳା ମା’ ହେବା ଅସମ୍ଭବ। ହେଲେ ଆଜି ବି ମାସିକ ଋତୁଚକ୍ର ସମ୍ପର୍କରେ ଖୋଲା ଆଲୋଚନା କରିବାକୁ ମହିଳାମାନେ ସଙ୍କୋଚ ମନେ କରୁଛନ୍ତି। ଋତୁସ୍ରାବ ସମୟରେ ସୁରକ୍ଷା କଥା ଚିନ୍ତା କରୁନାହାନ୍ତି। ଏହାଦ୍ୱାରା ସଂକ୍ରମଣ ଆଶଙ୍କା ରହୁଛି। ଗ୍ରାମର ପ୍ରତି ୪ଜଣ ମହିଳାଙ୍କ ମଧ୍ୟରୁ ଜଣେ ଏଭଳି ସମସ୍ୟା ଭୋଗୁଛନ୍ତି। ତେଣୁ ମାସିକ ଧର୍ମ ସମୟରେ ବିନା ସଙ୍କୋଚରେ ସାନିଟାରୀ ନାପ୍କିନ୍ କିଣି ବ୍ୟବହାର କରିବାକୁ ଆହ୍ବାନ ଦେଇଛନ୍ତି ସଂକଳ୍ପ ଚାରିଟେବୁଲ ଟ୍ରଷ୍ଟର ସଭ୍ୟା ଅଙ୍କିତା ସାହୁ। ବିଶ୍ୱ ଋତୁସ୍ରାବ ସ୍ବଚ୍ଛତା ଦିବସ ଉପଲକ୍ଷେ ଶନିବାର ଢେଙ୍କାନାଳ ଜିଲା କାମାକ୍ଷାନଗର ବ୍ଲକ କନ୍ତିଓପୁଟ ସାହି ପଞ୍ଚାୟତ ଜକା ଗ୍ରାମର ଶବର ସାହିରେ ଆୟୋଜିତ ସଚେତନତା କାର୍ଯ୍ୟକ୍ରମରେ ଯୋଗଦେଇ ଅଙ୍କିତା ଗ୍ରାମର ମହିଳା, ଯୁବତୀଙ୍କୁ ଏ ବିଷୟରେ ସଚେତନ କରାଇଥିଲେ। ଅଙ୍କିତାଙ୍କ କହିବା କଥା, ଗ୍ରାମରେ ଗରିବ ମହିଳା, ଯୁବତୀଙ୍କ ନିକଟରେ ନ୍ୟାପ୍କିନ୍ କିଣିବାର ସାମର୍ଥ୍ୟ ନାହିଁ। ସେମାନେ ବାଧ୍ୟ ହୋଇ ପରମ୍ପରାଗତ ସାଧନ ଉପଯୋଗ କରୁଛନ୍ତି। ଏହି ସମସ୍ୟାକୁ ଦୂରେଇବା ପାଇଁ ସାମର୍ଥ୍ୟବାନ୍ ଲୋକେ ସାନିଟାରି ନାପ୍କିନ୍ ବଣ୍ଟନ କରିବା ଲାଗି ସ୍ବତଃସ୍ଫୂର୍ତ୍ତ ଭାବେ ଆଗେଇ ଆସିବା ଉଚିତ। ସେହିପରି ଋତୁସ୍ରାବ ସମୟରେ ଆବଶ୍ୟକ ସ୍ବାସ୍ଥ୍ୟ ସତର୍କତା ପାଳନ କରିବାକୁ ସେ ପରାମର୍ଶ ଦେଇଛନ୍ତି।