ନୂଆଦିଲ୍ଲୀ,୨୪।୧: ବିଚାରପତି ନିଯୁକ୍ତି ବ୍ୟବସ୍ଥାକୁ ନେଇ କେନ୍ଦ୍ର ସରକାର ଏବଂ ନ୍ୟାୟପାଳିକା ମଧ୍ୟରେ ବିବାଦ ଲାଗିରହିଥିବାବେଳେ ତାଙ୍କ କାନ୍ଧରେ ବନ୍ଧୁକ ନ ଫୁଟାଇବାକୁ ଦିଲ୍ଲୀ ହାଇକୋର୍ଟର ଅବସରପ୍ରାପ୍ତ ବିଚାରପତି ଆର୍.ଏସ୍. ସୋଧି ସୋମବାର କେନ୍ଦ୍ର ଆଇନମନ୍ତ୍ରୀ କିରେନ୍ ରିଜିଜୁଙ୍କୁ ପରାମର୍ଶ ଦେଇଛନ୍ତି। ଆଇନମନ୍ତ୍ରୀ ଏହି ପ୍ରସଙ୍ଗ ଉଠାଇଥିବାରୁ ସେ ତାଙ୍କୁ ଧନ୍ୟବାଦ ଦେଇଛନ୍ତି। ତେବେ ଜଷ୍ଟିସ ସୋଧି ରାଜନୈତିକ ବ୍ୟକ୍ତି ହୋଇ ନ ଥିବାରୁ ତାଙ୍କ କାନ୍ଧରେ ବନ୍ଧୁକ ନ ଫୁଟାଇବାକୁ କହିଛନ୍ତି। କଲେଜିୟମ ବ୍ୟବସ୍ଥା ଅସାମ୍ବିଧାନିକ ସେ ଦେଇଥିବା ମତାମତ ତାଙ୍କର ବ୍ୟକ୍ତିଗତ। ହାଇକୋର୍ଟ ଏବଂ ସୁପ୍ରିମକୋର୍ଟରେ ଏକ ସଚିବାଳୟ ରହିବା ଆବଶ୍ୟକ ବୋଲି ସୋଧି କହିଥିଲେ। ଦୁଇ କିମ୍ବା ତିନି ଜଣ ବିଚାରପତି କିପରି ଅନ୍ୟ ବିଚାରପତିମାନଙ୍କ ନିଯୁକ୍ତି ସମ୍ପର୍କରେ ନିଷ୍ପତ୍ତି ନେଇପାରିବେ ବୋଲି ସେ ପ୍ରଶ୍ନ କରିଥିଲେ। କଲେଜିୟମ ବ୍ୟବସ୍ଥା ବିଫଳ ହୋଇଛି। ତେବେ ବିଚାରପତି ନିଯୁକ୍ତିକୁ ନେଇ ସର୍ବସାଧାରଣରେ ସମାଲୋଚନା କରିବାରୁ ସାମ୍ବିଧାନିକ ସଂସ୍ଥାଗୁଡ଼ିକ ଦୂରେଇ ରହିବା ଆବଶ୍ୟକ ବୋଲି ଜଷ୍ଟିସ ସୋଧି କହିଛନ୍ତି। ନ୍ୟାୟପାଳିକା, କାର୍ଯ୍ୟପାଳିକା ଏବଂ ବ୍ୟବସ୍ଥାପିକା ମଧ୍ୟରେ କ୍ଷମତାକୁ ନେଇ ବିତର୍କ ଲାଗିରହିଥିବାବେଳେ ଜଷ୍ଟିସ ସୋଧି କହିଛନ୍ତି, ଆଇନ ପ୍ରଣୟନରେ ପାର୍ଲାମେଣ୍ଟର ସର୍ବୋଚ୍ଚ କ୍ଷମତା ରହିଛି, ତେବେ ଆଇନକୁ ଯାଞ୍ଚ କରିବା କ୍ଷମତା ସୁପ୍ରିମକୋର୍ଟଙ୍କର ରହିଛି। ସୂଚନାଯୋଗ୍ୟ, କେନ୍ଦ୍ର ଓ ନ୍ୟାୟପାଳିକା ମଧ୍ୟରେ ଟଣାଓଟରା ଲାଗି ରହିଥିବାବେଳେ ରବିବାର ରିଜିଜୁ ପୂର୍ବତନ ବିଚାରପତିଙ୍କ ସାକ୍ଷାତ୍କାରର ଏକ ଭିଡିଓକୁ ଶେୟାର କରିଥିଲେ, ଯାହାକୁ ଜଷ୍ଟିସ ସୋଧି ନାପସନ୍ଦ କରିଛନ୍ତି।