ଓ୍ବାଶିଂଟନ/ବେଜିଂ,୫ା୪: ଆମେରିକା ହାଉସ୍ ଅଫ୍ ରିପ୍ରେଜେଣ୍ଟେଟିଭ୍ସ ସ୍ପିକର କେଭିନ୍ ମ୍ୟାକ୍କାର୍ଥି ଚଳିତ ସପ୍ତାହରେ କାଲିଫର୍ନିଆରେ ତାଇଓ୍ବାନ୍ ରାଷ୍ଟ୍ରପତି ସାଇ ଇଙ୍ଗ୍-ଓ୍ବେନ୍ଙ୍କୁ ଭେଟିବେ। ଏନେଇ ହାଉସ୍ ସ୍ପିକରଙ୍କ ଅଫିସ୍ ପକ୍ଷରୁ ସ୍ପଷ୍ଟ କରାଯାଇଛି। ରିପବ୍ଲିକାନ୍ ମ୍ୟାକ୍କାର୍ଥି ହେଉଛନ୍ତି ଆମେରିକା ରାଷ୍ଟ୍ରପତି ଓ ଉପରାଷ୍ଟ୍ରପତିଙ୍କ ପରେ ତୃତୀୟ ବରିଷ୍ଠ ନେତା। ଅନ୍ୟପକ୍ଷେ ଅତୀତର ଭୁଲ୍କୁ ଆଉ ନ ଦୋହରାଇବା ପାଇଁ ଆମେରିକାକୁ ମଙ୍ଗଳବାର ଚାଇନା ଚେତାବନୀ ଦେଇଛି।
ଅଫିସ୍ ପକ୍ଷରୁ ସୋମବାର କୁହାଯାଇଛି ଯେ, ତାଇଓ୍ବାନ୍ ରାଷ୍ଟ୍ରପତି କେନ୍ଦ୍ରୀୟ ଆମେରିକାରୁ ସ୍ବଦେଶକୁ ଫେରିବା ପୂର୍ବରୁ କାଲିଫର୍ନିଆର ଲସ୍ଏଞ୍ଜେଲସ୍ରେ ତାଙ୍କ ସହ ସ୍ପିକର ଦ୍ୱିପାକ୍ଷିକ ବୈଠକ କରିବେ। ରୋନାଲ୍ଡ ରିଗାନ୍ ପ୍ରେସିଡେନ୍ସିଆଲ ଲିବର୍ଟିରେ ଦୁଇନେତାଙ୍କ ମଧ୍ୟରେ ଆଲୋଚନା ହେବ। ତେବେ ତାଇଓ୍ବାନ୍କୁ ନିଜ ଭୂଖଣ୍ଡ ବୋଲି ଦାବି କରୁଥିବା ବେଜିଂ ଏହାକୁ ଚାଇନା ସାର୍ବଭୌମତ୍ୱ ପ୍ରତି ବିପଦ ଦର୍ଶାଇ କଡ଼ା ବିରୋଧ କରିଛି। ଗତ ଅଗଷ୍ଟରେ ଦ୍ୱୀପରାଷ୍ଟ୍ର ତାଇଓ୍ବାନ୍କୁ ତତ୍କାଳୀନ ହାଉସ୍ ସ୍ପିକର ତଥା ଡେମୋକ୍ରାଟ୍ ନାନ୍ସି ପେଲୋସିଙ୍କ ଗସ୍ତ ବେଳେ ମଧ୍ୟ ଚାଇନା ବିରୋଧ କରିଥିଲା।
ଲସ୍ଏଞ୍ଜେଲସ୍ସ୍ଥିତ ଚାଇନା କନ୍ସୁଲେଟ୍ ପକ୍ଷରୁ କୁହାଯାଇଛି ଯେ, ତାଇଓ୍ବାନ୍ ରାଷ୍ଟ୍ରପତିଙ୍କ ସହ ଆମେରିକା ହାଉସ୍ ସ୍ପିକର ସାକ୍ଷାତ କରିବା କ୍ଷେତ୍ରୀୟ ଶାନ୍ତି, ସୁରକ୍ଷା ଓ ସ୍ଥିରତା ପାଇଁ ଅନୁକୂଳ ନୁହେଁ। ଏହା ଆମେରିକା ଓ ଚାଇନା ଜନସାଧାରଣଙ୍କ ହିତର ପରିପନ୍ଥୀ। ମ୍ୟାକ୍କାର୍ଥି ତାଙ୍କ ପୂର୍ବସୂରୀଙ୍କ ଭୁଲ୍ରୁ ମିଳିଥିବା ଶିକ୍ଷାକୁ ଅଣଦେଖା କରୁଛନ୍ତି। ଆମେରିକା ଏହାକୁ ଏକ ସ୍ବାଭାବିକ ପ୍ରଥା ଭାବେ ଅଭିହିତ କରିବା ସହ ଚାଇନା ଅତିଶୟ ପ୍ରତିକ୍ରିୟା ପ୍ରକାଶ କରିବା ଅନୁଚିତ ବୋଲି କହିଛି।