ଭୁବନେଶ୍ୱର, ୧।୧୨(ତପନ ସ୍ବାଇଁ):ତାମିଲନାଡୁର କୋଭିଲପଟ୍ଟିଠାରେ ଅନୁଷ୍ଠିତ ସର୍ବପ୍ରଥମ ହକି ଇଣ୍ଡିଆ ଏକାଡେମୀ ଚାମ୍ପିୟନଶିପ୍ (ଜୋନ-ବି)ରେ ସେଲ୍ ହକି ଏକାଡେମୀ ଡବଲ ଟାଇଟଲ ହାସଲ କରିଛି। ଏହି ଦଳ ଉଭୟ ଜୁନିୟର ଓ ସବ୍ଜୁନିୟର ବର୍ଗରେ ଚାମ୍ପିୟନ ହୋଇ ସ୍ବର୍ଣ୍ଣ ପଦକ ଜିତିଛି। ସବ୍ଜୁନିୟର ବର୍ଗ ଫାଇନାଲରେ ସେଲ୍ ଏକାଡେମୀ ୪-୧ ଗୋଲରେ ରାୟପୁରର ସ୍ମାର୍ଟ ହକି ଏକାଡେମୀକୁ ପରାସ୍ତ କରିଛି। ସେହିପରି ତୀବ୍ର ସଂଘର୍ଷପୂର୍ଣ୍ଣ ଜୁନିୟର ବର୍ଗର ଫାଇନାଲରେ ସେଲ୍ ଏକାଡେମୀ ୩-୨ ଗୋଲରେ ଓଡ଼ିଶା ନାଭାଲ ଟାଟା ହକି ହାଇ ପରଫର୍ମାନ୍ସ ସେଣ୍ଟର (ଓଡ଼ିଶା ଏଚ୍ପିସି)କୁ ହରାଇ ଦେଇଛି। ସବ୍ଜୁନିୟର ବର୍ଗର ପ୍ଲେ-ଅଫ୍ରେ ତାମିଲନାଡ଼ୁ ହକି ଏକାଡେମୀ ୩-୧ ଗୋଲରେ ଲକ୍ଷ୍ମୀ ଅମଲ ସ୍ପୋଟର୍ସ ଏକାଡେମୀକୁ ହରାଇ ବ୍ରୋଞ୍ଜ ପଦକ ପାଇଛି। ସେହିପରି ଜୁନିୟର ବର୍ଗର ପ୍ଲେ-ଅଫ୍ରେ ହୁବଳି ହକି ଏକାଡେମୀ ବିଦର୍ଭର ବେରାର ହକି ଏକାଡେମୀକୁ ୨-୧ ଗୋଲରେ ହରାଇ ତୃତୀୟ ସ୍ଥାନ ଅଧିକାର କରିଛି।