ଭୁବନେଶ୍ୱର,୩।୯(ସରୋଜ ଜେନା): ରାଜ୍ୟର ପ୍ରତିଭାବାନ ଯୁବ ଟେନିସ୍ ତାରକା ଦେବାଶିଷ ସାହୁ ତେଲଙ୍ଗାନାରେ ଅନୁଷ୍ଠିତ ଆଇଟିଏଫ୍ ଜୁନିୟର ଟେନିସ ଟୁର୍ନାମେଣ୍ଟର ସିଙ୍ଗଲ୍ସ ବର୍ଗରେ ରନର ଅପ୍ ହୋଇଥିବା ବେଳେ ଡବଲ୍ସରେ ଚାମ୍ପିୟନ ଆଖ୍ୟା ଅର୍ଜନ କରିଛନ୍ତି। ହାଇଦ୍ରାବାଦର ଅଜିଜ ନଗର ସ୍ଥିତ ଲେକ୍ ଭିୟୁ ଟେନିସ୍ ଏକାଡେମୀରେ ଅନୁଷ୍ଠିତ ରାଜା ନରସିଂହ ରାଓ ମେମୋରିଆଲ ଆଇଟିଏଫ୍ ଟେନିସ୍ ଟୁର୍ନାମେଣ୍ଟରେ ଦେବାଶିଷ ୧୮ ବର୍ଷରୁ କମ୍ ବାଳକ ବର୍ଗରେ ରନରଅପ୍ ରହିଛନ୍ତି। ବାଳକ ଡବଲ୍ସରେ ମୁମ୍ବାଇର ସମର୍ଥ ସହିତାଙ୍କୁ ପାର୍ଟନର କରି ଖେଳୁଥିବା ଦେବାଶିଷ ଚାମ୍ପିୟନ ଆଖ୍ୟା ଅର୍ଜନ କରିଛନ୍ତି। ନିକଟରେ ଏକଲବ୍ୟ ପୁରସ୍କାର ହାସଲ କରିଥିବା ଦେବାଶିଷ ନିଜ ସଫଳତା ପାଇଁ ରାଜ୍ୟ ସରକାରଙ୍କ କ୍ରୀଡା ଓ ଯୁବ ବ୍ୟାପାର ବିଭାଗକୁ ଧନ୍ୟବାଦ ଜଣାଇଛନ୍ତି।