ଯୋଡ଼ା,୨୭ା୫(ଡି.ଏନ୍.ଏ.): କେନ୍ଦୁଝର ଜିଲା ଯୋଡ଼ା ବ୍ଲକ୍ରେ ଓଡ଼ିଶା ମିଲେଟ୍ ମିଶନ କାର୍ଯ୍ୟକାରିତା ନେଇ ସନ୍ଦେହ ଉପୁଜିଛି। ଯୋଜନା ମାଧ୍ୟମରେ ଅନେକ କୋଟି ଖର୍ଚ୍ଚ ହେଉଛି। ଚାଷୀଙ୍କୁ ଉତ୍ସାହିତ କରିବାକୁ ପ୍ରୋତ୍ସାହନ ରାଶି ପ୍ରଦାନ କରିବାର ବ୍ୟବସ୍ଥା ରହିଛି। କିନ୍ତୁ ଯୋଡ଼ା ବ୍ଲକ୍ରେ କିଛି ଅଧିକାରୀ ଓ ଏନଜିଓ ସଂସ୍ଥାର ଉଦାସୀନତା କାରଣରୁ ପ୍ରୋତ୍ସାହନ ରାଶି ମିଳୁ ନ ଥିବାରୁ ଚାଷୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ଏ ନେଇ ଏନ୍ଜିଓ ସଂସ୍ଥାର ଜିଲା ମୁଖ୍ୟ ଅଧିକାରୀଙ୍କୁ ଅଭିଯୋଗ କରାଯାଇଥିଲେ ମଧ୍ୟ ଫଳ ମିଳି ପାରିନାହିଁ।
ଅନୁଯାୟୀ, ବ୍ଲକ୍ରେ ଓଡ଼ିଶା ମିଲେଟ୍ ମିଶନ ତରଫରୁ କ୍ଷୁଦ୍ର ଶସ୍ୟ ଚାଷ ପାଇଁ ଏସ୍ଜି ଫାଉଣ୍ଡେଶନ ନାମକ ଏକ (ଏନ୍ଜିଓ) ସଂସ୍ଥାକୁ ଦାୟିତ୍ୱ ଦିଆଯାଇଛି। ଯୋଜନା ମାଧ୍ୟମରେ ବ୍ଲକ୍ର କ୍ଷୁଦ୍ର ଚାଷୀଙ୍କୁ ମାଣ୍ଡିଆ, ବାଜରା, ଗଙ୍ଗେଇ, ସର୍ଗମ, କାଞ୍ଜୁ ପ୍ରଭୃତି କ୍ଷୁଦ୍ର ଶସ୍ୟ ଚାଷ କରାଇବା ଏହାର ମୂଳ ଉଦ୍ଦେଶ୍ୟ। ଏଥି ପାଇଁ ପ୍ରାୟ ୨.୫ହେକ୍ଟର ଜମିରେ କ୍ଷୁଦ୍ର ଶସ୍ୟ ଚାଷ କରୁଥିବା ଚାଷୀଙ୍କୁ ପ୍ରାୟ ୧୦ ହଜାର ଟଙ୍କାରୁ ଊଦ୍ଧର୍ବ ରାଶି ଦିଆଯିବାର ଗାଇଡ୍ଲାଇନ ରହିଛି। ପୁଟୁଗାଁ ଅଞ୍ଚଳର ରାଧେଶ୍ୟାମ ମୁଣ୍ଡା ପ୍ରାୟ ୭ ଏକର ଜମିରେ କ୍ଷୁଦ୍ର ଶସ୍ୟ ଚାଷ କରିଥିଲେ ହେଁ ତାଙ୍କୁ ରାଶି ପ୍ରଦାନ କରାଯାଇ ନ ଥିବା ଅଭିଯୋଗ କରିଛନ୍ତି। ସେହିପରି କମଳପୁର, ଜଜାଙ୍ଗ, ଗୁରୁତୁଆଁ, ଦେଓଝର, ମହାଦେବ ନସା, ଜାମୁ କୁଣ୍ଡିଆ, କଣ୍ଡରା, ନାରାୟଣପୁର, ପଞ୍ଚନାନପୁର୍ ପ୍ରଭୃତି ଅଞ୍ଚଳର ଚାଷୀମାନେ ରାଶି ପାଇବାରୁ ବଞ୍ଚିତ ହୋଇଛନ୍ତି। କିଛି ଚାଷୀଙ୍କୁ ପ୍ରୋତ୍ସାହନ ରାଶି ପ୍ରଦାନ କରାଯାଇଛି। ଚାଷୀ ଚତୁର୍ଭୁଜ ବେହେରା କହିଛନ୍ତି, ଫାଉଣ୍ଡେଶନ ପକ୍ଷରୁ ଚାଷୀଙ୍କୁ ପ୍ରୋତ୍ସାହନ ରାଶି ପ୍ରଦାନ ପାଇଁ କୌଣସି ଗୁରୁତ୍ୱ ଦିଆଯାଉନାହିଁ। ଏ ସମ୍ପର୍କରେ ଫାଉଣ୍ଡେଶନର ବ୍ଲକ୍ ଆସିଷ୍ଟାଣ୍ଟ କୋ ଓର୍ଡିନେଟର ବିଦିତା ସେଣ୍ଢ କହିଛନ୍ତି, ଶୁକ୍ରବାର କାନପୁରରେ କ୍ଷେତ୍ର ଦିବସ ପାଳନ କରାଯାଇ ମାଣ୍ଡିଆ ଚାଷ ସମ୍ପର୍କିତ ସଚେତନ କରାଯାଇଥିଲା। କାହାକୁ ପ୍ରୋତ୍ସାହନ ରାଶି ମିଳିଛି କିମ୍ବା କାହାକୁ ମିଳିନାହିଁ, ସେ ସମ୍ପର୍କରେ ସେ ଜାଣି ନାହାନ୍ତି। ଚାଷୀଙ୍କ ବ୍ୟାଙ୍କ ଆକାଉଣ୍ଟ ମାଧ୍ୟମରେ ପ୍ରୋତ୍ସାହନ ରାଶି ପ୍ରଦାନ କରାଯାଇଥାଏ ବୋଲି କହିଥିଲେ।