ଛେଣ୍ଡିପଦା, ୩୧।୧(ସ୍ବ.ପ୍ର.) ଅନୁଗୋଳ ଜିଲା ନିଶା ଶିଳ୍ପାଞ୍ଚଳ ଥାନା ଅନ୍ତର୍ଗତ ରାଇଝରଣ ଗ୍ରାମ ଟାଙ୍ଗର ସାହିରେ ଶନିବାର ଘଟିଥିବା ମିଲି ସାହୁ ହତ୍ୟାକାଣ୍ଡର ରହସ୍ୟ ଉନ୍ମୋଚିତ ହୋଇଛି। ହତ୍ୟା ପଛରେ ସ୍ବାମୀ ପଦ୍ମଚରଣ ସାହୁଙ୍କ ଯୌତୁକ ଲୋଭ ସ୍ପଷ୍ଟ ହୋଇଥିବାବେଳେ ସେ ହିଁ ଅତି ନିର୍ମମ ଭାବେ ମିଲିଙ୍କୁ ହତ୍ୟାକରି କୂଅରେ ଫିଙ୍ଗି ଦେଇଥିବା ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି। ମୃତା ମହିଳାଙ୍କ ଭାଇ ସନ୍ତୋଷଙ୍କ ଅଭିଯୋଗକ୍ରମେ ନଂ. ୧୫/୨୧, ଦଫା ୪୯୮ (ଏ), ୩୦୨, ୩୦୪ (ବି) ୨୦୧, ୩୪ ଆଇପିସି, ୪ ଡିପି ଆକ୍ଟରେ ମାମଲା ରୁଜୁ କରାଯାଇଛି। ଅଭିଯୁକ୍ତଙ୍କୁ ସୋମବାର କୋର୍ଟ ଚାଲାଣ କରାଯିବ ବୋଲି ପୋଲିସ କହିଛି।
ସୂଚନାଯୋଗ୍ୟ, ଜରପଡ଼ା ଥାନା କୁଶକିଳା ଗ୍ରାମର ଚେରୁ ପ୍ରଧାନଙ୍କ ଝିଅ ମିଲିଙ୍କ ସହିତ ରାଇଝରଣ ଗ୍ରାମର ଶତ୍ରୁଘ୍ନ୍ନ ସାହୁଙ୍କ ପୁଅ ପଦ୍ମଚରଣଙ୍କ ବିବାହ ୨୦୧୦ରେ ହୋଇଥିଲା। ସେମାନଙ୍କର ଦୁଇ ଝିଅପୁଅ ଅଛନ୍ତି। ଶନିବାର ଅପରାହ୍ନରେ ମିଲି ସ୍ବାମୀଙ୍କ ସହ ବଗିଚାକୁ ପାଣି ମଡ଼ାଇବାକୁ ଯାଇ ଫେରି ନ ଥିଲେ। ପଡ଼ୋଶୀଙ୍କଠାରୁ ସୂଚନା ପାଇ ଭାଇ ସନ୍ତୋଷ ପହଞ୍ଚତ୍ ତନାଘନା କରିବା ବେଳେ କୂଅରେ ଭଉଣୀଙ୍କ ମୃତଦେହ ଭାସୁଥିବା ଦେଖିବାକୁ ପାଇଥିଲେ। ସୂଚନା ପାଇ ନିଶା ଶିଳ୍ପାଞ୍ଚଳ ଥାନା ପୋଲିସ ପହଞ୍ଚତ୍ଥିଲା। ତେବେ ରାତି ହୋଇଯାଇଥିବାରୁ ମୃତଦେହ ବାହାର କରିବା କଷ୍ଟକର ହୋଇଥିଲା। ରବିବାର ଅପରାହ୍ନ ୨ଟାରେ ଛେଣ୍ଡିପଦା ଦମକଳ ବାହିନୀ କର୍ମଚାରୀ ପହଞ୍ଚତ୍ ପ୍ଲାଷ୍ଟିକ ରଶିରେ ବନ୍ଧା ଯାଇଥିବା ମିଲିଙ୍କ ମୃତଦେହକୁ କୂଅରୁ ବାହାର କରିଥିଲେ। ସାଇଣ୍ଟିଫିକ ଟିମ, ସନ୍ଧାନୀ କୁକୁର ସହାୟତାରେ ଅନୁଗୋଳ ଅତିରିକ୍ତ ତହସିଲଦାର ତଥା ମାଜିଷ୍ଟ୍ରେଟ୍ଙ୍କ ଉପସ୍ଥିତିରେ ଘଟଣାର ତଦନ୍ତ କରାଯାଇଛି।
ଯୌତୁକ ବାବଦ ଟଙ୍କାକୁ ନେଇ ସ୍ତ୍ରୀ-ସ୍ବାମୀଙ୍କ ମଧ୍ୟରେ ପୂର୍ବରୁ ବହୁବାର ଝଗଡ଼ା ହୋଇଥିଲା। ଶନିବାର ଅପରାହ୍ନରେ ପଦ୍ମଚରଣ ଏବଂ ମିଲି ଟାଙ୍ଗରସାହି ବଗିଚାକୁ କାମ କରିବାକୁ ଯାଇଥିବାବେଳେ ସେଠାରେ ଉଭୟଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। ଏଥିରେ ଉତ୍ତ୍ୟକ୍ତ ହୋଇ ପଦ୍ମଚରଣ ଏକ କାଙ୍କରେ ମିଲିଙ୍କ ମୁଣ୍ଡକୁ ଆକ୍ରମଣ କରିଥିଲେ। ଚେତାଶୂନ୍ୟ ହୋଇ ଯିବାପରେ ଏକ ରଶିରେ ବାନ୍ଧି କୂଅରେ ପକାଇ ଦେଇଥିବା ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି। ମୃତଦେହ ବ୍ୟବଚ୍ଛେଦ ଲାଗି ଜିଲା ଚିକିତ୍ସାଳୟକୁ ପଠାଯାଇଥିବାବେଳେ ଅଭିଯୁକ୍ତଙ୍କୁ ପୋଲିସ ଅଟକ ରଖି ପଚରାଉଚରା କରୁଛି।
