ନୂଆଦିଲ୍ଲୀ,୨୧ ।୧୨: ଦେଶରେ କରୋନା ସଂକ୍ରମିତଙ୍କ ସଂଖ୍ୟା ଏବେବି ଜାରି ରହିଛି । ପ୍ରତିଦିନ ପାଖାପାଖି ୨୦ ହଜାର ନୂଆ ସଂକ୍ରମିତଙ୍କୁ ଏବେବି ଚିହ୍ନଟ କରାଯାଉଛି । ହେଲେ ଅନ୍ୟପଟେ ସରକାର ଆସନ୍ତା ବର୍ଷ ଆରମ୍ଭରୁ ଟିକାକରଣ ଆରମ୍ଭ କରିବାକୁ ପ୍ରସ୍ତୁତ ହେଉଛନ୍ତି । କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଡା. ହର୍ଷବର୍ଦ୍ଧନ କହିଛନ୍ତି, ବିକଶିତ ଦେଶ ଅପେକ୍ଷା ଆମ ଦେଶରେ କରୋନା ସୁସ୍ଥତା ହାର ଭଲ ରହିଛି । ଏବେ ଆମ ଦେଶରେ କରୋନା ସୁସ୍ଥତା ହାର ୯୫-୯୬ ପ୍ରତିଶତ ଥିବା ସେ କହିଛନ୍ତି । ଆମେରିକା, ରୁଷିଆ, ବ୍ରାଜିଲ ଭଳି ବିଶ୍ୱର କିଛି ବିକଶିତ ଦେଶ ତୁଳନାରେ ଏଠାରେ ସୁସ୍ଥତା ହାର ୬୦-୮୦ ପ୍ରତିଶତ ମଧ୍ୟରେ ରହିଥିବା ସ୍ୱାସ୍ଥ୍ୟମନ୍ତ୍ରୀ ପ୍ରକାଶ କରିଛନ୍ତି । ଏହାକୁ ଦେଖି ସହଜରେ ଅନୁମାନ କରାଯାଉଛି କି ଆମେ ଭଲ ସ୍ଥିତିରେ ରହିଛୁ । ତେଣୁ କରୋନାକୁ ନେଇ ଚାଲିଥିବା ଖରାପ ସମୟ ଏବେ ଶେଷ ହୋଇ ଯାଇଛି । ହେଲେ ଆମକୁ ସାବଧାନ ରହିବା ଜରୁରୀ ବୋଲି ସେ କହିଛନ୍ତି । ତେଣୁ କରୋନାକୁ ସମୂଳେ ନାଶ କରିବାକୁ ମାସ୍କ ପିନ୍ଧିବା, ସାମାଜିକ ଦୂରତା ରକ୍ଷା କରିବା ଓ ବାରମ୍ବାର ହାତ ଧୋଇବା ଜରୁରୀ ବୋଲି ସେ କହିଛନ୍ତି । ସେ ଆହୁରି ମଧ୍ୟ ସୂଚନା ଦେଇଛନ୍ତି କି ଆସନ୍ତା ବର୍ଷ ଜାନୁୟାରୀରୁ ଦେଶରେ କରୋନା ଟିକାକରଣ ଆରମ୍ଭ ହୋଇପାରେ ।