ପୁରୀ ଅଫିସ,୯ା୫: ଆଗକୁ ମହାପ୍ରଭୁଙ୍କ ଘୋଷଯାତ୍ରା ଥିବାବେଳେ ପୁରୀ ସହରକୁ ରାଜ୍ୟ ତଥା ରାଜ୍ୟ ବାହାର ଲକ୍ଷାଧିକ ଭକ୍ତଙ୍କ ସମାଗମ ହେବ। ତେଣୁ ପ୍ରଶାସନ ପକ୍ଷରୁ ସମସ୍ତ ବ୍ୟବସ୍ଥା କରାଯାଉଥିବା ନେଇ ସୂଚନା ପ୍ରଦାନ କରାଯାଉଛି। ଏପରିକି ଘନଘନ ବୈଠକ କରାଯାଇ ସ୍ଥିତି ଅନୁଧ୍ୟାନ କରାଯାଉଛି। ମାତ୍ର ବାସ୍ତବରେ ପ୍ରଶାସନର କାର୍ଯ୍ୟ କେବଳ କାଗଜ କଲମରେ ସମୀତ ରହୁଛି କହିଲେ ଅତ୍ୟୁକ୍ତି ହେବ ନାହିଁ। ଯାହର ଜ୍ୱଳନ୍ତ ଉଦାହରଣ ସୋମବାର ଦେଖିବାକୁ ମିଳିଛି। ପୁରୀ ପୌରସଂସ୍ଥା ଅନ୍ତର୍ଗତ ୩୦ -୩୧ ନମ୍ବର ୱାର୍ଡର ମାରୁତି ନଗରରେ ଅନେକ ଡ୍ରେନ ମୁକୁଳା ପଡିଛି। ନିର୍ମାଣ ଅସମ୍ପୂର୍ଣ୍ଣ କାରଣରୁ ଜଳ ନିଷ୍କାସନ ହୋଇ ପାରୁନାହିଁ। ପାଣି ଜମିବା ଫଳରେ ସାହି ବାସିନ୍ଦା ଅନେକ ରୋଗରେ ଆକ୍ରାନ୍ତ ହେଉଛନ୍ତି। ଡ୍ରେନଗୁଡ଼ିକରେ ପ୍ରଶାସନ ପକ୍ଷରୁ ସ୍ଲାବ ପକାଯାଉନାହିଁ । ଫଳରେ ବାସିନ୍ଦାମାନେ ନାନା ସମସ୍ୟା ଭୋଗୁଛନ୍ତି। ଏ ନେଇ ପ୍ରଶାସନକୁ ଜଣାଇଲେ ମଧ୍ୟ ପ୍ରଶାସନ ପକ୍ଷରୁ କୌଣସି ବ୍ୟବସ୍ଥା ଗ୍ରହଣ କରାଯାଉନାହିଁ। ଡ୍ରେନରେ ପାଣି ଜମା ରହିବା ଓ ସ୍ଲାବ ପଡୁ ନଥିବାରୁ ଅନେକ ସମୟରେ ଦୁର୍ଘଟଣା ଘଟୁଛି। ଏପରିକି ଗୋରୁମାନେ ଉକ୍ତ ଡ୍ରେନରେ ପଡି ଆଘାତପ୍ରାପ୍ତ ହେଉଥିବା ବେଳେ ମୃତ୍ୟର ମଧ୍ୟ ଶିକାର ହେଉଛନ୍ତି। ତେବେ ରବିବାର ରାତିରେ ଏକ ଷଣ୍ଢ ଡ୍ରେନରେ ପଡି ମୃତ୍ୟୁବରଣ କରିଛି। ଯାହାକୁ ନେଇ ସାହିବାସିନ୍ଦା ଦୁଃଖ ପ୍ରକାଶ କରିବା ସହ ପ୍ରଶାସନର ଅପାରଗତାକୁ ଦାୟୀ କରିଛନ୍ତି। ତେଣୁ ପ୍ରଶାସନ ତୁରନ୍ତ କାର୍ଯ୍ୟ କରିବା ସହ ସ୍ଲାବ୍ ପକାଇବା ପାଇଁ ଦାବି କରିଛନ୍ତି।
