ରାୟଗଡ଼ା,୭ା୪(ସ୍ବ.ପ୍ର.): ଅସରାଏ ବର୍ଷାରେ ଶୋଚନୀୟ ହୋଇପଡ଼ୁଛି ରାୟଗଡ଼ା ଜିଲା ସଦର ମହକୁମାର ପରିମଳ ବ୍ୟବସ୍ଥା। ଡ୍ରେନ ପାଣି ଏବଂ ଅଳିଆ ଆବର୍ଜନା ରାସ୍ତା ଉପରେ ଲହଡ଼ି ମାରୁଛି। ଏ ନେଇ ସହର ବାସିନ୍ଦା ଓ ବିଭିନ୍ନ ରାଜନୈତିକ ଦଳ ବାରମ୍ବାର ପୌର କର୍ତ୍ତୃୃପକ୍ଷଙ୍କ ଦୃଷ୍ଟି ଆକର୍ଷଣ କରିଥିଲେ ମଧ୍ୟ କୌଣସି ସୁଫଳ ମିଳୁନାହିଁ। ଏବେ ସହରର ସ୍ବଚ୍ଛତାକୁ ନେଇ ପ୍ରଶ୍ନ ଉଠାଇଛନ୍ତି ଜନସାଧାରଣ। ତୁରନ୍ତ ଏହାର ସମାଧାନ ପାଇଁ ସାଧାରଣରେ ଦାବି ହୋଇଛି।
ବୁଧବାର ସନ୍ଧ୍ୟାରେ କାଳବୈଶାଖୀ ବର୍ଷା ଯୋଗୁ ସ୍ଥିତି ବେହାଲ ହୋଇପଡ଼ିଥିଲା। ସହରର ଭିଆଇପି ରୋଡ଼, ଜିଲାପାଳ ଓ ଜିଲା ପରିଷଦ କାର୍ଯ୍ୟାଳୟରୁ ଆରମ୍ଭ କରି ମୁଖ୍ୟ ବଜାର, ଷ୍ଟେଟ ବ୍ୟାଙ୍କ ବଜାର ଶାଖା, ରିଙ୍ଗ ରୋଡ଼ ସ୍ଥିତ ୟୁଜିଏମ୍ଆଇଟି ନିକଟ ଅଞ୍ଚଳ ଏବଂ ଜିସିଡି ହାଇସ୍କୁଲ ରାସ୍ତା ଉପରେ ବର୍ଷାଜଳ ସହ ଡ୍ରେନର ଅସନା ପାଣି ଓ କୁଢ଼ କୁଢ଼ ଆବର୍ଜନା ଦେଖିବାକୁ ମିଳିଥିଲା। ସହରର ଏସବୁ ମୁଖ୍ୟ ରାସ୍ତାରେ ଲୋକେ ଯା’ ଆସ କରିବା ପାଇଁ ଅସୁବିଧାର ସମ୍ମୁଖୀନ ହେଉଛନ୍ତି। ପୂର୍ବରୁ ୩ ଥର ଉନ୍ନତ ସହରର ପୁରସ୍କାର ପାଇଥିବା ପୌରପରିଷଦ ବର୍ତ୍ତମାନ ଠିକାଦାରଙ୍କ ଦୟାରେ ଚାଲିଛି। ପରିମଳ ବ୍ୟବସ୍ଥା ସମ୍ପୂର୍ଣ୍ଣରୂପେ ସେମାନଙ୍କ ନିୟନ୍ତ୍ରଣରେ ରହିବା ଯୋଗୁ ସାମାନ୍ୟ ବର୍ଷା ହେଲେ ସ୍ଥିତି ବେହାଲ ହେଉଛି। ସହରର ବିଭିନ୍ନ ଡ୍ରେନଗୁଡ଼ିକରେ ଅଳିଆ ଆବର୍ଜନା ପଡ଼ି ରହି ତାହା ଜାମ ହେଉଛି। ନିୟମିତ ତାହାକୁ ସଫା କରାଯାଉନାହିଁ। ପ୍ରତିଦିନ ସକାଳୁ କେବଳ ସଫେଇ ଗାଡ଼ି ଆସି ଘରମାନଙ୍କରୁ ଅଳିଆ ଆବର୍ଜନା ସଂଗ୍ରହ କରୁଥିବା ବେଳେ ଡ୍ରେନରୁ ଅଳିଆ ଆବର୍ଜନା ସଫା ହେଉନଥିବାରୁ ବାରମ୍ବାର ଏଭଳି ସମସ୍ୟା ଉପୁଜୁଛି। ସହରକୁ ସ୍ବଚ୍ଛ ଓ ନିର୍ମଳ ରଖିବା ପାଇଁ ପୂର୍ବରୁ ଦିଆଯାଇଥିବା ଠିକା ସଂସ୍ଥାଗୁଡିକ କେଉଁଭଳି କାର୍ଯ୍ୟ କରିଛନ୍ତି ତାହାର ତର୍ଜମା କରି ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ବୋଲି ଦାବି ହୋଇଛି। ରାୟଗଡ଼ା ପୌରାଞ୍ଚଳରେ ୨୪ୱାର୍ଡ ଥିବାବେଳେ କୌଣସି ଗୋଟିଏ ୱାର୍ଡ ମଧ୍ୟ ସମ୍ପୂର୍ଣ୍ଣ ସ୍ବଚ୍ଛ ରହୁନାହିଁ। ସୂଚନାଯୋଗ୍ୟ, ୧୯୭୧ରେ ରାୟଗଡ଼ା ଏକ ସ୍ବତନ୍ତ୍ର ପୌରପରିଷଦ ଭାବେ ଗଠନ ହୋଇଥିଲା। ପୂର୍ବତନ ପୌରାଧ୍ୟକ୍ଷ ସ୍ବର୍ଗତଃ କୃଷ୍ଣ ଚନ୍ଦ୍ର ବକ୍ସିପାତ୍ର ସହରର ରୂପରେଖ ବଦଳାଇଥିଲେ। କିନ୍ତୁ ଏବେ ପ୍ରଶାସନିକ ଅଧିକାରୀଙ୍କ ଆନ୍ତରିକତା ଅଭାବ ଯୋଗୁ ପରିମଳ ବ୍ୟବସ୍ଥା ଶୋଚନୀୟ ହୋଇପଡ଼ିଛି।