ବଲାଙ୍ଗୀର ଅଫିସ, ୫।୪: ବଲାଙ୍ଗୀର ପୌରପରିଷଦ ଅନ୍ତର୍ଗତ ୱାର୍ଡ ନଂ. ୧୮ ତୁଲସୀନଗର ପଡ଼ାରେ ଏକ ଡ୍ରେନ ନିର୍ମାଣ କାମ ଅଧା ପଡ଼ିଥିବାରୁ ରାସ୍ତା ଉପରେ ଡ୍ରେନ ପାଣି ସୁଅ ଛୁଟୁଛି । ପ୍ରତିଦିନ ଏହି ରାସ୍ତା ଦେଇ ଯାତାୟାତ କରୁଥିବା ଲୋକେ ନାଳ ପାଣି ମାଡ଼ି ଯିବାଆସିବା କରୁଛନ୍ତି । ରାସ୍ତା ଉପରେ ଡ୍ରେନ ପାଣି ଯାଉଥିବାରୁ ଯିବାଆସିବା ବେଳେ ଛୋଟବଡ଼ ଦୁର୍ଘଟଣା ମଧ୍ୟ ଘଟୁଛି । ଏ ନେଇ ପଡାବାସୀ ଅସନ୍ତୋଷ ବ୍ୟକ୍ତ କରୁଛନ୍ତି । ପଡାବାସୀ ମ୍ୟୁନିସିପାଲଟି ଅଫିସକୁ ଯାଇ ପୌରପରିଷଦ ଅଧିକାରୀଙ୍କୁ ରାସ୍ତା ଓ ଡ୍ରେନ ନିର୍ମାଣ କରିବା ପାଇଁ ବହୁବାର ଦୃଷ୍ଟି ଆକର୍ଷଣ କଲାପରେ ମଧ୍ୟ କିଛି ସୁଫଳ ମିଳୁନାହିଁ କି ସମସ୍ୟାର ସମାଧାନ ହେଉ ନାହିଁ । ଦୀର୍ଘ ଦିନ ଧରି ରାସ୍ତା ଓ ଡ୍ରେନ୍ ସମସ୍ୟାର ସମାଧାନ ହେଉ ନଥିବାରୁ ଲୋକେ ପ୍ରଶାସନ ଅଧିକାରୀଙ୍କୁ ବିଶ୍ୱାସକୁ ନେଇପାରୁ ନାହାନ୍ତି। ଅନ୍ୟପକ୍ଷରେ ସହରର ରାସ୍ତାକଡରେ ଲକ୍ଷାଧିକ ଟଙ୍କା ଖର୍ଚ୍ଚ କରାଯାଇ ସୌନ୍ଦର୍ଯ୍ୟକରଣ କରାଯାଉଛି । ହେଲେ ସହରର ବିଭିନ୍ନ ୱାର୍ଡରେ ରହିଥିବା ରାସ୍ତା ଓ ଡ୍ରେନେଜ୍ ସମସ୍ୟା ପୌରପରିଷଦ ନିର୍ବାହୀ ଅଧିକାରୀଙ୍କ ନଜରକୁ ଆସୁ ନାହିଁ । ଏ ଦିଗରେ ଜିଲାପାଳ ଦୃଷ୍ଟି ଦେବାକୁ ପଡାବାସୀ ଦାବି କରିଛନ୍ତି।