ଭୁବନେଶ୍ୱର,୧୭ା୯(ବ୍ୟୁରୋ): ଭୁବନେଶ୍ୱର ମହାନଗର ନିଗମ (ବିଏମ୍ସି)ର ମୁଖ୍ୟ ରାସ୍ତାଠାରୁ ଆରମ୍ଭ କରି ଗଳିକନ୍ଦିରେ ଏବେ ଡ୍ରେନ୍ ଓ ସ୍ବେରେଜ କାର୍ଯ୍ୟ ଜାରି ରହିଛି। ପାଖାପାଖି ସବୁ ଓ୍ବାର୍ଡରେ ଏବେ ନିର୍ମାଣ ଓ ମରାମତି ଜାରି ରହିଛି। ଏଥିପାଇଁ ଅଧିକାଂଶ ସ୍ଥାନରେ ରାସ୍ତା ଖୋଳାଯାଉଛି। ପୁଣି ଯେଉଁସବୁ ଡ୍ରେନ୍ର ନିର୍ମାଣ ସରୁଛି ସେସବୁ ସ୍ଥାନରେ ତୁରନ୍ତ ରାସ୍ତାର ମରାମତି କରାଯାଉ ନ ଥିବାରୁ ଯାତାୟାତରେ ଗୁରୁତର ସମସ୍ୟା ଉପୁଜୁଛି। ଟ୍ରାଫିକ ସମସ୍ୟା ସୃଷ୍ଟି ହେବା ସହ ସହରବାସୀ ନାନା ଦୁଃଖ ପାଉଛନ୍ତି। ଏପରିସ୍ଥଳେ ବୁଧବାର ବିଏମ୍ସି ମୁଖ୍ୟ ଇଞ୍ଜିନିୟର ଦେବସୁନ୍ଦର ମହାପାତ୍ର ବିଭିନ୍ନ ନିର୍ମାଣ କାର୍ଯ୍ୟ ତଦାରଖ କରିଛନ୍ତି। ଏହାବ୍ୟତୀତ ବାକିଥିବା ରାସ୍ତା ନବୀକରଣ ଓ ଅନ୍ୟ ବିକାଶମୂଳକ କାର୍ଯ୍ୟ କିପରି କରାଯିବ ଓ ନିର୍ଦ୍ଧାରିତ ସମୟ ଭିତରେ ସରିବ ସେନେଇ ଆଲୋଚନା କରିଥିବା ଜଣାପଡିଛି। ତେବେ ଏହାର ଫଟୋ ବିଏମ୍ସି ନିଜ ଟୁଇଟର ହ୍ୟାଣ୍ଡେଲରେ ଅପ୍ଲୋଡ଼ କରିବା ପରେ ଲୋକେ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି।
ସୂଚନା ମୂତାବକ, ଭୁବନେଶ୍ୱରରେ ୨୦୦ରୁ ଊର୍ଦ୍ଧ୍ୱ ନୂଆ ଡ୍ରେନ୍ ହେବ। ପାଖାପାଖି ୭୦ଟିର ନିର୍ମାଣ କାର୍ଯ୍ୟ ଆଗେଇ ଚାଲିଥିବାବେଳେ ବାକି ଟେଣ୍ଡର ହୋଇ ପଡ଼ିରହିଛି। ନିର୍ମାଣ କାର୍ଯ୍ୟ ନିର୍ଦ୍ଧାରିତ ସମୟରେ ସରୁ ନ ଥିବାବେଳେ ତାହା ପୁଣି ନିମ୍ନମାନର ହେଉଥିବା ମଧ୍ୟ ଅଭିଯୋଗ ହେଉଛି। କେତେକ ସ୍ଥାନରେ ବର୍ଷ ବର୍ଷ ଧରି ଡ୍ରେନେଜ୍ ନିର୍ମାଣ ଜାରି ରହିଥିବାବେଳେ ବିଏମ୍ସିର ନିର୍ମାଣ କାର୍ଯ୍ୟ ମନ୍ଥର ଗତିରେ ଚାଲୁଥିବା ଲୋକେ ଅଭିଯୋଗ କରୁଛନ୍ତି। ବିଏମ୍ସି ଡ୍ରେନେଜ୍ ବିଭାଗ ଏନେଇ କୌଣସି ଆନ୍ତରିକତା ଦେଖାଉ ନ ଥିବାବେଳେ କରୋନା ବାହାନାରେ ବିଏମ୍ସିର ଇଞ୍ଜିନିୟରିଂ ସେଲ୍ ଏକପ୍ରକାର ସ୍ଥାଣୁ ହୋଇପଡ଼ିଥିବା ପରିଲକ୍ଷିତ ହୋଇଛି। ଏପଟେ କର୍ପୋରେଟରଙ୍କ କ୍ଷମତା ନ ଥିବାରୁ ଲୋକଙ୍କ ସମସ୍ୟାର ସମାଧାନ ତୁରନ୍ତ ହୋଇପାରୁନି। ଅଧିକାରୀ ଓ ଠିକାଦାରମାନେ ମନମୁଖି କାର୍ଯ୍ୟ କରୁଥିବାରୁ ଅନେକ ସମୟରେ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହେଉଛି।