ନୀଳାଦ୍ରି ବିହାରୀ ଦଣ୍ଡପାଟ
ବାରିପଦା ଅଫିସ, ୨୯ା୬: ମୟୂରଭଞ୍ଜ ଜିଲାର ଉପରବେଡ଼ାରେ ଜନ୍ମିତା (୨୦ ଜୁନ ୧୯୫୮) ଦ୍ରୌପଦୀ ମୁର୍ମୁଙ୍କୁ ନେଇ ଏବେ ସାରା ଦେଶରେ ଚର୍ଚ୍ଚା। ଓଡ଼ିଶା ଓ ଝାଡ଼ଖଣ୍ଡ ସୀମାନ୍ତ କୁସୁମୀ ବ୍ଲକ୍ ଅଧୀନ ଏହି ଗ୍ରାମଟି ଶିମିଳିପାଳ ପାଦଦେଶରେ ଅବସ୍ଥିତ। ମା’ ସିନ୍ଗୋ ଟୁଡୁ ଓ ବାପାଙ୍କ ନାମ ବିରଞ୍ଚତ୍ ନାରାୟଣ ଟୁଡୁ। ଉପରବେଡ଼ା ପ୍ରାଥମିକ ବିଦ୍ୟାଳୟରୁ ଦ୍ରୌପଦୀଙ୍କର ଆରମ୍ଭ ହୋଇଥିଲା ପାଠପଢ଼ା। ଏ ସମ୍ପର୍କରେ ଦ୍ରୌପଦୀଙ୍କୁ ପାଠ ପଢ଼ାଇଥିବା ଶିକ୍ଷକ ବାସୁଦେବ ବେହେରା କୁହନ୍ତି, ଦ୍ରୌପଦୀଙ୍କ ବାପା ବିରଞ୍ଚତ୍ ନାରାୟଣ ଉପରବେଡ଼ା ମଧ୍ୟ ଇଂରାଜୀ ବିଦ୍ୟାଳୟର ସମ୍ପାଦକ ଥିଲେଜ ଏହି ବିଦ୍ୟାଳୟରେ ପଢୁଥିବା (୬ଷ୍ଠ ଓ ୭ମ ଶ୍ରେଣୀ) ବେଳେ ଦ୍ରୌପଦୀଙ୍କ ପ୍ରିୟ ସାଙ୍ଗ ଥିଲେ ଯମୁନା ଗିରି। ଉଭୟଙ୍କ ମଧ୍ୟରେ ବନ୍ଧୁତା ବେଶ୍ ନିବିଡ଼ ଥିଲା। ଦୁହେଁ ସାଙ୍ଗ ହୋଇ ପ୍ରାର୍ଥନା କରିଥା’ନ୍ତି। ସେମାନେ ସୁଲଳିତ କଣ୍ଠରେ ପ୍ରାର୍ଥନା ଗାଉଥିବାବେଳେ ବାଟୋଇମାନେ ଅଟକି ଶୁଣିଥା’ନ୍ତି। ସ୍କୁଲରେ ହେଉଥିବା ବିଭିନ୍ନ ଖେଳକୁଦ, ବକ୍ତୃତା ଓ ଚିତ୍ରାଙ୍କନ ପ୍ରତିଯୋଗିତାରେ ଦ୍ରୌପଦୀ ଆଗୁଆ ରହୁଥିଲେ। ଆଞ୍ଚଳିକ ଖେଳକୁଦ ପ୍ରତିଯୋଗିତା ଦୌଡ଼ରେ ବି ସେ ପ୍ରଥମ ହେଉଥିଲେ। ତେବେ ଦ୍ରୌପଦୀ ଶ୍ରେଣୀରେ ପ୍ରଥମ ହୋଇ ଆସୁଥିବା ବେଳେ ଯମୁନା ଦ୍ୱିତୀୟ ସ୍ଥାନରେ ରହୁଥିଲେ। ତେବେ ଯମୁନାକୁ ତାଙ୍କ ପରିବାର ଲୋକେ ମନଦେଇ ପାଠପଢ଼ି ଶ୍ରେଣୀରେ ପ୍ରଥମ ହେବାକୁ ବାରମ୍ବାର ତାଗିଦା କରୁଥିଲେ। ଥରେ ଏହି କଥା ଯମୁନାଠାରୁ ଶୁଣିବା ପରେ ଦ୍ରୌପଦୀ ଜାଣିଶୁଣି ପରୀକ୍ଷାଖାତାରେ ସବୁ ଉତ୍ତର ଲେଖି ନ ଥିଲେ। ଫଳରେ ଯମୁନା ପ୍ରଥମ ହେବା ପରେ ଶିକ୍ଷକମାନେ ଦ୍ରୌପଦୀଙ୍କୁ ଡାକି ସରଳ ପ୍ରଶ୍ନର ଉତ୍ତରକୁ କାହିଁକି ଲେଖିନଥିଲ ବୋଲି ପଚାରିଥିଲେ। ତେବେ ମୋ ପାଇଁ ଯମୁନାକୁ ଗାଳି ଶୁଣିବାକୁ ପଡିଛି ଭାବି ଏପରି ପଦକ୍ଷେପ ନେଇଥିଲି ବୋଲି ଦ୍ରୌପଦୀଙ୍କଠାରୁ ଶୁଣିବା ପରେ ଶିକ୍ଷକମାନେ ପ୍ରଶଂସା କରିବା ସହ ଆଶୀର୍ବାଦ ଦେଇ ଜୀବନଯାତ୍ରାରେ ବହୁ ଆଗକୁ ବଢ଼ିବ ବୋଲି କହିଥିଲେ।
ଶାସ୍ତ୍ରୀୟ ସଙ୍ଗୀତ ରାମକେରୀ, କଳହଂସ କେଦାର, ଓଡ଼ିଶୀ, ବଙ୍ଗଳାଶ୍ରୀ ସ୍ବରରେ ଦ୍ରୌପଦୀ ନିପୁଣା ଥିଲେ। ସମୟାନୁବର୍ତ୍ତିତା ଓ କତ୍ତର୍ବ୍ୟନିଷ୍ଠା ଗୁଣ ତାଙ୍କର ବାଲ୍ୟ ଜୀବନରୁ ସ୍ପଷ୍ଟ ବାରି ହୋଇପଡୁଥିଲା। ୪୮ଜଣ ଛାତ୍ରୀଛାତ୍ରଙ୍କ ମଧ୍ୟରେ ସେ ପ୍ରଥମ ହେଉଥିଲେ। ଗଣିତ, ସାହିତ୍ୟ ଓ ଇଂଲିଶ୍ରେ ବେଶ ଭଲ କରୁଥିଲେ। ଭଲ ଚିତ୍ର ଆଙ୍କି ଅନ୍ୟମାନଙ୍କୁ ଚକିତ କରିପାରୁଥିଲେ। ଶ୍ରେଣୀ ମନିଟର ଭାବେ ନିଜର ଦାୟିତ୍ୱ ସୂଚାରୁ ରୂପେ ସମ୍ପାଦନ କରୁଥିଲେ। ଏଭଳି ଜଣେ ଆଦର୍ଶ ଛାତ୍ରୀଙ୍କୁ ପାଇ ସ୍କୁଲର ସମସ୍ତ ଶିକ୍ଷୟିତ୍ରୀ ଶିକ୍ଷକ ଓ କର୍ମଚାରୀମାନେ ପ୍ରଶଂସା କରିବା ସହ ଆମ ଅଞ୍ଚଳର ବ୍ଲାକ ଡାଇମଣ୍ଡ (କଳାହୀରା) ବୋଲି ଶିକ୍ଷକ ବେହେରା କହିଥିଲେ।