ନୂଆଦିଲ୍ଲୀ,୨୧।୭: ରାଇସିନା ହିଲ୍ରେ ଚମକିବେ ଓଡ଼ିଆ ଝିଅ ଦ୍ରୌପଦୀ ମୁର୍ମୁ। ଗୁରୁବାର ଦେଶର ୧୫ତମ ରାଷ୍ଟ୍ରପତି ଭାବେ ପ୍ରଥମ ଓଡ଼ିଆ ଓ ଆଦିବାସୀ ମହିଳା ଦ୍ରୌପଦୀ ମୁର୍ମୁ ନିର୍ବାଚିତ ହୋଇଛନ୍ତି। ଆସନ୍ତା ୨୫ରେ ସେ ପଦ ଓ ଗୋପନୀୟତାର ଶପଥ ଗ୍ରହଣ କରିବେ। ତୃତୀୟ ରାଉଣ୍ଡରେ ହୋଇଥିବା ଗଣତିରେ ରାଷ୍ଟ୍ରପତି ହେବା ପାଇଁ ଆବଶ୍ୟକ ୫୦ ପ୍ରତିଶତରୁ ଅଧିକ ଭୋଟ ଏନ୍ଡିଏ ପ୍ରାର୍ଥୀ ମୁର୍ମୁଙ୍କ ସପକ୍ଷରେ ଯାଇଥିଲା। ଏହାପରେ ତାଙ୍କର ରାଷ୍ଟ୍ରପତି ନିର୍ବାଚିତ ହେବା ନେଇ ସ୍ପଷ୍ଟ ହୋଇଯାଇଥିଲା। ବିରୋଧୀ ପ୍ରାର୍ଥୀ ଯଶଓ୍ବନ୍ତ ସିହ୍ନାଙ୍କୁ ଦ୍ରୌପଦୀ ବିପୁଳ ବ୍ୟବଧାନରେ ପରାସ୍ତ କରିଛନ୍ତି। ଭୋଟ ଗଣତିର ଆଉ ଗୋଟିଏ ରାଉଣ୍ଡ ବାକି ଥିବା ବେଳେ ଏହା ପୂର୍ବରୁ ସେ ଜିତିସାରିଛନ୍ତି। କିନ୍ତୁ ଏବେ କେବଳ ଔପଚାରିକତା ବାକି ରହିଛି। ସୂଚନା ମୁତାବକ, ମୋଟ ୩ଟି ରାଉଣ୍ଡରେ ମୋଟ ୩୨୧୯ ଭୋଟରୁ ମୁର୍ମୁଙ୍କୁ ୨୧୬୧ ଭୋଟ ମିଳିଥିବା ବେଳେ ଯଶଓ୍ବନ୍ତ ସିହ୍ନା ମୋଟ ୧୦୫୮ ଭୋଟ ହାତେଇଛନ୍ତି। ସେହିପରି ତୃତୀୟ ରାଉଣ୍ଡର ଗଣତିରେ ମୋଟ ୧୩୩୩ରୁ ମୁର୍ମୁଙ୍କୁ ୮୧୨ ଭୋଟ ମିଳିଥିବା ବେଳେ ଯଶଓ୍ବନ୍ତଙ୍କୁ ମିଳିଛି ୫୧୨ ଭୋଟ।