କଲମ୍ବୋ,୩୦।୭: ଶ୍ରୀଲଙ୍କା ବିପକ୍ଷ ସୀମିତ ଓଭର ସିରିଜ ପାଇଁ ଭାରତୀୟ ଦଳର କୋଚିଂ ଦାୟିତ୍ୱ ଗ୍ରହଣ କରିଥିଲେ ରାହୁଲ ଦ୍ରାବିଡ। ଆଗାମୀ ଦିନରେ ପୂର୍ଣ୍ଣକାଳୀନ ଭିତ୍ତିରେ ଜାତୀୟ ଦଳର କୋଚ୍ ହେବେ କି ପ୍ରଶ୍ନରେ ସେ କିଛି ଚିନ୍ତା କରି ନ ଥିବା କହିଛନ୍ତି। ତେବେ ଶ୍ରୀଲଙ୍କାରେ ଦଳର ପ୍ରଶିକ୍ଷଣ ଅଭିଜ୍ଞତାକୁ ସେ ଉପଭୋଗ କରିଥିବା କହିଛନ୍ତି।
ଦ୍ରାବିଡ ତୃତୀୟ ତଥା ଅନ୍ତିମ ଟି-୨୦ ଅନ୍ତର୍ଜାତୀୟ ମ୍ୟାଚ୍ ପରେ ଗୁରୁବାର ରାତିରେ ଏକ ଭର୍ଚୁଆଲ ସାମ୍ବାଦିକ ସମ୍ମିଳନୀରେ କହିଛନ୍ତି, ମୁଁ ଏହି ଅଭିଜ୍ଞତାକୁ ଉପଭୋଗ କରିଛି। ଆଗକୁ କ’ଣ ହେବ ସେ ବିଷୟରେ ବାସ୍ତବରେ ମୁଁ ଚିନ୍ତା କରିନାହିଁ। ଭବିଷ୍ୟତରେ ଯଦି ସୁଯୋଗ ମିଳେ ତେବେ କୋଚିଂ ପଦ ଗ୍ରହଣ କରିବାକୁ ଚାହାନ୍ତି କି ନାହିଁ ନେଇ ରାହୁଲ କହିଛନ୍ତି, ସତ କହିବାକୁ ଗଲେ ମୁଁ ବର୍ତ୍ତମାନ ଯାହା କରୁଛି ସେଥିରେ ଖୁସି। ଏହି ଗସ୍ତ ବ୍ୟତିତ ଅନ୍ୟ କିଛି ବିଷୟରେ ଚିନ୍ତା କରିନାହିଁ। ମୁଁ ଅଭିଜ୍ଞତାକୁ ଉପଭୋଗ କରିଛି। ମୋତେ ଏହି ଖେଳାଳିମାନଙ୍କ ସହ କାମ କରିବା ଆନନ୍ଦ ଦେଇଛି। ଏହା ଚମତ୍କାର ଥିଲା। ଏବେ ମୁଁ ଅନ୍ୟ କିଛି ବିଷୟରେ ଚିନ୍ତା କରିନାହିଁ। ପୂର୍ଣ୍ଣକାଳୀନ ଭୂମିକା ଗ୍ରହଣ କରିବାରେ ବହୁତ ଚ୍ୟାଲେଞ୍ଜ ଅଛି ତେଣୁ ମୁଁ ପ୍ରକୃତରେ ସେ ବିଷୟରେ ଜାଣି ନ ଥିବା ସେ କହିଛନ୍ତି।
ପ୍ରକାଶ ଯେ, ଭାରତୀୟ ଟିମ୍ର ମୁଖ୍ୟ କୋଚ୍ ରବି ଶାସ୍ତ୍ରୀ ଏବେ ଭାରତୀୟ ଟେଷ୍ଟ ଟିମ୍ ସହ ଅଛନ୍ତି। ଶାସ୍ତ୍ରୀଙ୍କ ଚୁକ୍ତିନାମା ଟି୨୦ ବିଶ୍ୱକପ୍ ଶେଷ ହେବା ପର୍ଯ୍ୟନ୍ତ ଅଛି। ଭାରତୀୟ ପ୍ରଶିକ୍ଷକଙ୍କ ପଦ ପାଇଁ ସର୍ବାଧିକ ବୟସ ସୀମା ୬୦ ବର୍ଷ ହୋଇଥିବା ବେଳେ ୫୯ ବର୍ଷ ବୟସରେ ଶାସ୍ତ୍ରୀ ପୁନର୍ବାର ଆବେଦନ କରିବାକୁ ଚାହୁଁଛନ୍ତି କି ନାହିଁ ତାହା ଏଯାବତ ସ୍ପଷ୍ଟ ହୋଇନାହିଁ।
