ବରଗଡ଼ର ଝିଅ ନିର୍ମାଲ୍ୟା ରାଉତ। ଓଡ଼ିଶାର ଏକ ପଛୁଆ ଜିଲାରୁ ଆସିଥିଲେ ମଧ୍ୟ କଠିନ ପରିଶ୍ରମ ଏବଂ ନିଷ୍ଠା ବଳରେ କ୍ରୀଡ଼ା ଜଗତରେ ନିଜର ସ୍ବତନ୍ତ୍ର ପରିଚୟ ସୃଷ୍ଟି କରି ପାରିଛନ୍ତି। ଛୋଟ ବେଳରୁ ସେ ଯେଉଁ ସ୍ବପ୍ନ ଦେଖିଛନ୍ତି ତାହାକୁ ସାକାର ପରିବାପାଇଁ ପ୍ରାଣପଣେ ଲାଗିଛନ୍ତି। ଭବିଷ୍ୟତରେ ସିନିୟର ସ୍ତରରେ ଭାରତ ପକ୍ଷରୁ ଖେଳିବା ତାଙ୍କ ଇଚ୍ଛା। ସମ୍ପ୍ରତି ଉତ୍ତର ପ୍ରଦେଶରେ ଚାଲିଥିବା ଖେଲୋ ଇଣ୍ଡିଆ ୟୁନିଭର୍ସିଟି ଗେମ୍ସର ମହିଳା ରଗ୍ବୀ ଇଭେଣ୍ଟରେ ଚାମ୍ପିୟନ ହୋଇଥିବା କିଟ୍ ବିଶ୍ୱବିଦ୍ୟାଳୟ ଦଳର ଅନ୍ୟତମ ସଦସ୍ୟା ଥିଲେ ନିର୍ମାଲ୍ୟା। ତାଙ୍କ ବାପା ବାସୁଦେବ ରାଉତ ଜଣେ କୃଷକ। ପାଠ ପଢ଼ିବା ପାଇଁ ବାପା ତାଙ୍କୁ ଭୁବନେଶ୍ୱର ଛାଡ଼ିଥିଲେ। ମାତ୍ର ନିର୍ମାଲ୍ୟା କେବଳ ପଢ଼ାରେ ନୁହେଁ ଖେଳ ଉପରେ ମଧ୍ୟ ଫୋକସ କଲେ। ଏହା ହିଁ ଆଜି ତାଙ୍କୁ ସ୍ବତନ୍ତ୍ର ପରିଚୟ ଦେଇଛି। ଗୁରୁ ଗୋବିନ୍ଦ ସିଂ ସ୍ପୋଟର୍ସ କଲେଜ ଗ୍ରାଉଣ୍ଡରେ ଅନୁଷ୍ଠିତ ଫାଇନାଲରେ କିଟ୍ ବିଶ୍ୱବିଦ୍ୟାଳୟ ୬୦-୦ରେ ମୁମ୍ବାଇକୁ ପରାସ୍ତ କରିଥିଲା। ୧୮ ବର୍ଷୀୟା ନିର୍ମାଲ୍ୟା ବିଜୟୀ ଦଳ ପକ୍ଷରୁ ସର୍ବାଧିକ ୧୦ ପଏଣ୍ଟ ସ୍କୋର କରିଥିଲେ।
ୟୁନିଭର୍ସିଟି ଗେମ୍ସରେ ଭାଗନେବା ନିର୍ମାଲ୍ୟାଙ୍କ ପାଇଁ ଏହା ପ୍ରଥମ ଥିଲା। ଏ ସମ୍ପର୍କରେ ନିର୍ମାଲ୍ୟା କହିଛନ୍ତି ଯେ, ”ଖେଲୋ ଇଣ୍ଡିଆ ୟୁନିଭର୍ସିଟି ଗେମ୍ସକୁ ମୁଁ ମନଭରି ଉପଭୋଗ କରିଛି। ପ୍ରଥମଥର ମୁଁ ଏହି ପ୍ରତିଯୋଗିତାରେ ଅଂଶଗ୍ରହଣ କରିଥିଲି। ଏହା ପୂର୍ବରୁ ମୁଁ ଜାତୀୟ ଓ ଅନ୍ତର୍ଜାତୀୟ ଟୁର୍ନାମେଣ୍ଟ ଖେଳିଥିଲେ ହେଁ ୟୁନିଭର୍ସିଟି ଗେମ୍ସକୁ ବେଶି ଉପଭୋଗ କରିଛି। ମୁଁ ସିନିୟର ସ୍ତରରେ ଭାରତ ପାଇଁ ରଗ୍ବୀ ଖେଳିବାକୁ ଚାହେଁ ଏବଂ ଏସିଆନ ଗେମ୍ସରେ ପଦକ ଜିତିବା ମୋର ଇଚ୍ଛା। ଏଥିପାଇଁ ମୁଁ କଠିନ ପରିଶ୍ରମ କରୁଛି। ଭାରତୀୟ ଦଳରେ ସ୍ଥାନ ପାଇବା ମୋର ପରବର୍ତ୍ତୀ ଲକ୍ଷ୍ୟ“। ନିର୍ମାଲ୍ୟା ଏହା ପୂର୍ବରୁ ଓଡ଼ିଶା ପକ୍ଷରୁ ଜୁନିୟର ଏବଂ ସିନିୟର ନ୍ୟାଶ୍ନାଲ୍ସ ରଗ୍ବୀ ଟୁର୍ନାମେଣ୍ଟ ଖେଳି ସାରିଛନ୍ତି। ” ଏହା ପୂର୍ବରୁ ମୁଁ ଜାତୀୟ ଜୁନିୟର ଓ ସିନିୟର ରଗ୍ବୀ ପ୍ରତିଯୋଗିତା ଖେଳି ସାରିଛି। ଜାତୀୟ ଜୁନିୟର ପ୍ରତିଯୋଗିତା ୨୦୨୨ରେ ବିହାରରେ ହୋଇଥିଲା। ଏଥିରେ ଓଡ଼ିଶା ଦଳ ଦ୍ୱିତୀୟ ସ୍ଥାନରେ ରହିଥିଲା। ଗୁଜରାଟ ନ୍ୟାଶନାଲ ଗେମ୍ସରେ କିନ୍ତୁ ଓଡ଼ିଶା ଚାମ୍ପିୟନ ହୋଇଥିଲା। ପୂର୍ବରୁ ମୁଁ ରଗ୍ବୀ ସମ୍ପର୍କରେ ବିଶେଷ କିଛି ଜାଣି ନ ଥିଲି। କଳିଙ୍ଗ ଇନ୍ଷ୍ଟିଚ୍ୟୁଟ ଅଫ୍ ସୋସିଆଲ ସାଇନ୍ସେସ (କିସ୍) ଆସିବାପରେ ମୁଁ ଏହି ଖେଳ ସମ୍ପର୍କରେ ଜାଣିବାକୁ ପାଇଲି। ଏହି କ୍ରୀଡ଼ା ମୋତେ ପସନ୍ଦ ଆସିଲା, ତେଣୁ ଖେଳିବାକୁ ଇଚ୍ଛାକଲି। ଏବେ ଏହି କ୍ରୀଡ଼ାରେ ମୁଁ ଆଗକୁ ଯିବାକୁ ଲକ୍ଷ୍ୟ ରଖିଛି“ ବୋଲି ନିର୍ମାଲ୍ୟା କହିଛନ୍ତି। ନିର୍ମାଲ୍ୟା ରାଜ୍ୟର ପ୍ରତିଷ୍ଠିତ କୋଚ୍ ମାନସ କୁମାର ଜେନାଙ୍କଠାରୁ କୋଚିଂ ନେଇ ଆଗକୁ ବଢ଼ୁଛନ୍ତି।
କିଟ୍ ରଗ୍ବୀ ଏକାଡେମୀର ଛାତ୍ରୀ ନିର୍ମାଲ୍ୟାଙ୍କର ଅନ୍ତର୍ଜାତୀୟ ପଦାର୍ପଣ ୨୦୨୧ରେ ହୋଇଥିଲା। ଉଜ୍ବେକିସ୍ତାନର ତାସକେଣ୍ଟଠାରେ ଅନୁଷ୍ଠିତ ୧୮ ବର୍ଷରୁ କମ୍ ରଗ୍ବୀ ୭ଏସ୍ ଚାମ୍ପିୟନଶିପ୍ରେ ରୌପ୍ୟ ପଦକ ବିଜୟୀ ଭାରତୀୟ ଦଳର ସେ ସଦସ୍ୟା ଥିଲେ। ୨୦୨୨ ନଭେମ୍ବରରେ ଉଜ୍ବେକିସ୍ତାନର ୟଙ୍ଗିଆବାଦଠାରେ ଅନୁଷ୍ଠିତ ୨୦ ବର୍ଷରୁ କମ୍ ଏସିଆ ମହିଳା ରଗ୍ବୀ ସେଭେନ୍ସରେ ରୌପ୍ୟ ପଦକ ବିଜୟୀ ଭାରତୀୟ ଦଳରୁ ମଧ୍ୟ ସେ ଖେଳିଥିଲେ। ଏହା ବ୍ୟତୀତ ଗତବର୍ଷ ଡିସେମ୍ବରରେ ନେପାଳର କାଠମାଣ୍ଡୁରେ ଆୟୋଜିତ ୧୮ ବର୍ଷରୁ କମ୍ ଏସିଆ ମହିଳା ରଗ୍ବୀ ସେଭେନ୍ସରେ ରୌପ୍ୟ ପଦକ ପାଇଥିବା ଭାରତୀୟ ଦଳରୁ ମଧ୍ୟ ସେ ପ୍ରତିନିଧିତ୍ୱ କରିଥିଲେ।
-ତପନ ସ୍ବାଇଁ