ନୂଆଦିଲ୍ଳୀ,୨୦।୮(ପି.ଟି.): ୨୦୨୦ ପାଇଁ ଜଣାଶୁଣା ଫାଣ୍ଟାସୀ ଗେମିଂ ପ୍ଲାଟଫର୍ମ ଡ୍ରିମ୍ ୧୧ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଟାଇଟଲ ସ୍ପୋନ୍ସରଶିପ୍ ଅଧିକାର ହାସଲ କରିଛି। ଆଇପିଏଲ୍ର ୨୦୨୦ ସଂସ୍କରଣ ପାଇଁ ଡ୍ରିମ୍ ୧୧ ନୂଆ ଟାଇଟଲ ସ୍ପୋନସର ବୋଲି ଲିଗ୍ ଗଭର୍ନିଂ କାଉନସିଲ ଘୋଷଣା କରିଛି ଓ ଏ ନେଇ ବୁଧବାର ବିସିସିଆଇ ତରଫରୁ କୁହାଯାଇଛି। ତେବେ ବୋର୍ଡ ୨୦୨୧ ଓ ୨୦୨୨ ପାଇଁ ଡ୍ରିମ୍ ୧୧ର ବିଡ୍କୁ ପ୍ରତ୍ୟାଖ୍ୟାନ କରିଛି। ଅର୍ଥାତ ଆଗାମୀ ଦୁଇଟି ସେସନ ପାଇଁ ଏହି କମ୍ପାନୀ ବୋର୍ଡ ସହିତ ଜଡିତ ରହିବ ନାହିଁ ବୋଲି ସ୍ପଷ୍ଟ ହୋଇଛି। ଲୋ ବିଡ୍ ଆମାଉଣ୍ଟ ପାଇଁ ଡ୍ରିମ୍ ୧୧ର ସର୍ତ୍ତମୂଳକ ୩ ବର୍ଷିଆ ପ୍ରସ୍ତାବକୁ ବିସିସିଆଇ ଅଗ୍ରାହ୍ୟ କରିଛି।
ମଙ୍ଗଳବାର ଡ୍ରିମ୍ ୧୧ ଏଜୁକେଶନାଲ ଟେକ୍ନୋଲୋଜି କମ୍ପାନୀ ବାଇଜୁ ଓ ଅନ୍ଏକାଡେମୀକୁ ପଛରେ ପକାଇ ୨୨୨ କୋଟି ଟଙ୍କାର ବିଡ୍ ସହିତ ୪ ମାସ ଓ ୧୩ ଦିନ ପାଇଁ ଟାଇଟଲ ରାଇଟ୍ ହାସଲ କରିଥିଲା। ଏହି କ୍ରମରେ ଚାଇନା ମୋବାଇଲ ଫୋନ୍ କମ୍ପାନୀ ଭିଭୋକୁ ହଟାଇ ରାଇଟ୍ ପାଇଥିଲା। ଯଦି ଟାଇଟଲ ସ୍ପୋନ୍ସର ଭାବେ ଭିଭୋ ପ୍ରତ୍ୟାବର୍ତ୍ତନ ନ କରେ ତେବେ ଡ୍ରିମ୍ ୧୧ ଦ୍ୱିତୀୟ ଓ ଦୃତୀୟ ବର୍ଷ ପାଇଁ ୨୪୦ କୋଟି ଟଙ୍କା ଦେବାକୁ ପ୍ରସ୍ତାବ ଦେଇଥିଲା। ତେବେ ଏହାକୁ ବୋର୍ଡ ଗ୍ରହଣ କରିନାହିଁ। ଭାରତ ଓ ଚାଇନା ମଧ୍ୟରେ ଦେଖାଦେଇଥିବା ସୀମା ବିବାଦ ପାଇଁ ଭିଭୋ ବର୍ଷକୁ ୪୪୦ କୋଟି ଟଙ୍କା ପ୍ରଦାନ କରୁଥିଲେ ମଧ୍ୟ ଚୁକ୍ତିରୁ ଓହରିବାକୁ ବାଧ୍ୟ ହୋଇଥିଲା। ଆଗାମୀ ଦୁଇଟି ସେସନ ପାଇଁ ଡ୍ରିମ୍ ୧୧କୁ ଉପଯୁକ୍ତ ଭାବେ ପାଉଣା ବୃଦ୍ଧି କରିବାକୁ କୁହାଯାଇଥିଲା ବୋଲି ବିସିସିଆଇର ଜଣେ ବରିଷ୍ଠ ଅଧିକାରୀ କହିଛନ୍ତି। ଆଗାମୀ ଦୁଇବର୍ଷରେ କୋଭିଡି-୧୯ ପରିସ୍ଥିତିରେ ଉନ୍ନତି ହେବା ନିଶ୍ଚିତ ମନେ ହେଉଛି। ଭିଭୋ ସହିତ ଏବେ ବି ଆମର ଚୁକ୍ତି ବଳବତ୍ତର ରହିଛି। ଭିଭୋଠାରୁ ଆମେ ବର୍ଷକୁ ୪୪୦ କୋଟି ଟଙ୍କା ପାଉଥିବା ବେଳେ ୨୪୦ କୋଟି ଟଙ୍କାରେ ଡ୍ରିମ୍ ୧୧କୁ ଅଧିକାର ପ୍ରଦାନ କରିବାର ଆବଶ୍ୟକତା କ’ଣ ବୋଲି ସେ ପ୍ରଶ୍ନ କରିନ୍ତି। ପୁଣି ଏହାର କୌଣସି ପ୍ରାସଙ୍ଗିକତା ନାହିଁ ବୋଲି ସେ ସ୍ପଷ୍ଟ କରିଛନ୍ତି।
ଡ୍ରିମ୍ ୧୧ ଇତିମଧ୍ୟରେ ବହୁତ ଲୋକପ୍ରିୟତା ହାସଲ କରିଛି ଓ ଆଇପିଏଲ୍ର ୬ଟି ଫ୍ରାଞ୍ଚାଇଜ୍ ସମେତ ଏବେ ମୋଟ ଉପରେ ୧୯ଟି ଲିଗ୍ ସହିତ ଜଡିତ ରହିଛି। ୨୦୨୦ ସଂସ୍କରଣ ପାଇଁ ଟାଇଟଲ ପ୍ରାୟୋଜକ ଭାବେ ଆମେ ଡ୍ରିମ୍ ୧୧କୁ ସ୍ବାଗତ କରୁଛୁ ବୋଲି ଆଇପିଏଲ୍ ଚେୟାରମ୍ୟାନ ବ୍ରିଜେଶ ପଟେଲ କହିଛନ୍ତି। ଡ୍ରିମ୍ ୧୧ ଏକ ଡିଜିଟାଲ ବ୍ରାଣ୍ଡ ହୋଇଥିବାରୁ ଅନ୍ଲାଇନ୍ରେ ଏହା ଆଇପିଏଲ୍କୁ ଆହୁରି ଲୋକପ୍ରିୟ କରାଇବାରେ ପ୍ରମୁଖ ଭୂମିକା ଗ୍ରହଣ କରିବ ବୋଲି ସେ କହିଛନ୍ତି। ଯଦି ଟାଇଟଲ ପ୍ରାୟୋଜକ ଭାବେ ଭିଭୋ ପ୍ରତ୍ୟାବର୍ତ୍ତନ ନ କରେ ତେବେ ବିସିସିଆଇ ୨୦୨୧ ଓ ୨୦୨୨ ସଂସ୍କରଣ ପାଇଁ ନୂଆ ବିଡ୍ ଖୋଲିବ। ଅତିକମ୍ ୪୦୦ କୋଟି ଟଙ୍କାରୁ କମ୍ ଥିବା କୌଣସି ବିଡ୍କୁ ବିସିସିଆଇ ଗ୍ରହଣ କରିବ ନାହିଁ ବୋଲି ଆଶା କରାଯାଉଛି।
