ଜଣେ ଯୁବତୀ ହାତରେ ଫୁଲତୋଡ଼ା ଆଉ କନ୍ୟାବେଶରେ ସଜେଇ ହୋଇ ଯେତେବେଳେ ଶ୍ମଶାନରେ ପହଞ୍ଚିଲେ ସେଠାରେ ଉପସ୍ଥିତ ଥିବା ଲୋକେ ଆଶ୍ଚର୍ଯ୍ୟ ହୋଇଗଲେ। ମାତ୍ର ଯେତେବେଳେ ସତ କଥା ଜଣାପଡ଼ିଲା ସେତେବେଳେ ସମସ୍ତଙ୍କ ଆଖିରୁ ଧାରଧାର ଲୁହ ବୋହିଗଲା।
ପ୍ରକୃତ କଥା ହେଲା ଜଣେ ୨୦ ବର୍ଷୀୟ ଯୁବକଙ୍କ ମୃତ୍ୟୁ ହେବା ପରେ ଶ୍ମଶାନରେ ଅନ୍ତିମ ସତ୍କାର ପ୍ରକ୍ରିୟା ଚାଲିଥିଲା। ଏହି ସମୟରେ ଜଣେ ଯୁବତୀ କନ୍ୟାବେଶରେ ଆସିଥିବାରୁ ସମସ୍ତେ ତାଙ୍କୁ ବୁଲି ବୁଲି ଦେଖୁଥିଲେ।
ଏକ ରିପୋର୍ଟ ଅନୁଯାୟୀ, ବ୍ରିଟେନର ଲାଇମେରିକ ଶ୍ମଶାନରେ କନ୍ୟାବେଶରେ କ୍ୟାଟ୍ କ୍ୱିଲିଙ୍ଗନ ପହଞ୍ଚତ୍ଥିଲେ। କ୍ୟାଟ୍ଙ୍କ ବିବାହ ତାଙ୍କ ପ୍ରେମିକ ମାଇଲ୍ସ ମାଇଲେଙ୍କ ସହ ହେବାର ଥିଲା। ଏଥିପାଇଁ ବିବାହର ସମସ୍ତ ପ୍ରସ୍ତୁତି ଚାଲିଥିଲା। ଏହି ସମୟରେ ଏକ ଦୁଃଖଦ ଘଟଣା ଘଟିଥିଲା। ମାଇଲ୍ ନିଜ କାର୍ରେ ଚର୍ଚ୍ଚକୁ ଆସୁଥିବା ସମୟରେ ସଡ଼କ ଦୁର୍ଘଟଣାରେ ତାଙ୍କର ମୃତ୍ୟୁ ଘଟିଥିଲା। ଏହି ଖବର ଶୁଣିବା ପରେ କ୍ୟାଟ୍ଙ୍କ ହୋସ୍ ଉଡ଼ିଯାଇଥିଲା। ତେଣୁ ସେ ଶେଷଥର ପାଇଁ ତାଙ୍କ ମୃତ ପ୍ରେମିକଙ୍କୁ ଭେଟିବାକୁ ଚାହୁଁଥିଲେ। ବିବାହ ସିନା କରିପାରିଲେନି ମାତ୍ର କନ୍ୟା ବେଶରେ ସଜେଇ ହୋଇ ସେ ତାଙ୍କ ପ୍ରେମିକ ତଥା ଭାବିସ୍ବାମୀଙ୍କ ଶବାଧାର ନିକଟକୁ ଆସି ଜୋର୍ରେ କାନ୍ଦିବାକୁ ଲାଗିଥିଲେ। ଏହା ଦେଖି ପାଖରେ ଥିବା ଲୋକମାନେ ଭାବବିହ୍ବଳ ହୋଇପଡ଼ିଥିଲେ।
କ୍ୟାଟ୍ଙ୍କ ପିତା କୁହନ୍ତି, ତାଙ୍କ ଝିଅ ମାଇଲ୍ସଙ୍କୁ ବହୁତ ଭଲ ପାଉଥିଲେ। ପୂରା ଜୀବନ ତାଙ୍କ ସହ ବିତାଇବାକୁ ଚାହୁଁଥିଲେ। କ୍ୟାଟ୍ ତାଙ୍କ ଭାବି ସ୍ବାମୀଙ୍କ ପାଇଁ ସୋସିଆଲ ମିଡିଆରେ ଲେଖିଥିଲେ, ୟେ ମୋ ଜୀବନ, ମୁଁ ଜାଣିଥିଲି ତୁମେ ମୋ’ ସହ ସବୁଦିନ ରହିବ। କିନ୍ତୁ କିଏ ଜାଣିଥିଲା ତୁମେ ମୋତେ ଏମିତି ଛାଡ଼ି ଚାଲିଯିବ ବୋଲି। କ୍ୟାଟ୍ଙ୍କ ଏହି ପୋଷ୍ଟ ଦେଖି ୟୁଜରମାନେ ମଧ୍ୟ ଭାବୁକ ହୋଇପଡ଼ିଛନ୍ତି।
