ଅନୁଗୋଳ ଅଫିସ,୮ା୩ ଅନୁଗୋଳ ଜିଲାରେ କାର୍ଯ୍ୟକାରୀ ହେଉଥିବା ବିଭିନ୍ନ ପ୍ରକଳ୍ପର ଅଗ୍ରଗତି ସମ୍ପର୍କରେ ଜିଲାପାଳ ସିଦ୍ଧାର୍ଥ ଶଙ୍କର ସ୍ବାଇଁଙ୍କ ଅଧ୍ୟକ୍ଷତାରେ ସୋମବାର ଜିଲା କାର୍ଯ୍ୟାଳୟ ସମ୍ମିଳନୀ ଗୃହରେ ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି। ଗ୍ରାମ୍ୟ ଜଳ ଓ ପରିମଳ ବିଭାଗ ଦ୍ବାରା ଛେଣ୍ଡିପଦା ଓ ବଅଁରପାଳ ବ୍ଲକରେ ଜିଲା ଖଣିଜ ପାଣ୍ଠିରେ ପ୍ରତିଷ୍ଠା ହେଉଥିବା ମେଗା ପାନୀୟ ଜଳ ପ୍ରକଳ୍ପର ଅଗ୍ରଗତିର ସମୀକ୍ଷା କରାଯାଇଥିଲା। ଚାଲୁଥିବା ପ୍ରକଳ୍ପର ଯନ୍ତ୍ରାଂଶ ଓ ପାଇପ୍ ଖରାପ ଥିବାରୁ ଏହାର ତୁରନ୍ତ ମରାମତି ନିମନ୍ତେ ପରାମର୍ଶ ଦିଆଯାଇଥିଲା। ପାଲଲହଡାରେ ପାଣି ପାଇପ୍ ଉପରେ ଅନ୍ୟ ଏକ କମ୍ପାନୀର ପାଇପ୍ ଯାଇଥିବାରୁ କ୍ଷତିଗ୍ରସ୍ତ ପାଇପ ବଦଳାଇବାକୁ ସମ୍ପୃକ୍ତ କମ୍ପାନୀ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦିଆଯିବା ସହ ନିଜ ପାଇପ୍ ଉକ୍ତ ସ୍ଥାନରୁ ହଟାଇବାକୁ କୁହାଯାଇଥିଲା। ନୂଆ ପ୍ରକଳ୍ପ କାର୍ଯ୍ୟ ତୁରନ୍ତ ଶେଷ କରି ଜଳ ଯୋଗାଣ କରାଯିବ ବୋଲି ବିଭାଗୀୟ ଯନ୍ତ୍ରୀ ପ୍ରକାଶ କରିଥିଲେ। ଏଥିସହ ପୂର୍ତ୍ତ ବିଭାଗ ଦ୍ବାରା କାର୍ଯ୍ୟ ସମ୍ପନ୍ନ ହୋଇଥିବା ବିଭିନ୍ନ ପ୍ରକଳ୍ପର ବକେୟା ପାଉଣା ତୁରନ୍ତ ପରିଶୋଧ କରି ବିନିଯୋଗ ପ୍ରମାଣପତ୍ର ଦେବାକୁ ଜିଲାପାଳ ପରାମର୍ଶ ଦେଇଥିଲେ। ତାଳଚେର ଷ୍ଟାଡିୟମ କାର୍ଯ୍ୟ ତୁରନ୍ତ ଆରମ୍ଭ କରିବା ନିମନ୍ତେ ଟେଣ୍ଡର ଆହ୍ବାନ କରିବାକୁ କୁହାଯାଇଥିଲା। ଏହି ସମୀକ୍ଷା ବୈଠକରେ ଗ୍ରାମ୍ୟ ଉନ୍ନୟନ, କ୍ଷୁଦ୍ର ଜଳସେଚନ, ଜିଇଡି, ବିଦ୍ୟୁତ୍, ଉଦ୍ୟାନ ଓ ଉଠା ଜଳସେଚନ ଆଦି ବିଭାଗର କର୍ମକର୍ତ୍ତାମାନେ ଯୋଗ ଦେଇଥିଲେ। ଅନ୍ୟମାନଙ୍କ ମଧ୍ୟରେ ଜିଲା ଗ୍ରାମ୍ୟ ଉନ୍ନୟନ ସଂସ୍ଥାର ପ୍ରକଳ୍ପ ନିର୍ଦ୍ଦେଶକ
ଦିଲୀପ କୁମାର ସାହୁ ଉପସ୍ଥିତ ଥିଲେ।