![](https://www.dharitri.com/wp-content/uploads/2024/03/iii.jpg)
କଣାସ,୧୮।୩(ବିଭୂତି ଭୂଷଣ ତ୍ରିପାଠୀ): କଣାସ ବ୍ଲକ ଚିଲିକା ଉପକୂଳରେ ଅବସ୍ଥାପିତ ହୋଇଥିବାରୁ ବର୍ଷ ତମାମ ଏଠାରେ ପାନୀୟ ଜଳ ସମସ୍ୟା ଲାଗିରୁହେ। ରୌଦ୍ରତାପ ସମୟରେ ଜଳ ସମସ୍ୟା ଉତ୍କଟ ରୂପ ଧାରଣ କରେ। ସେଥିପାଇଁ ବ୍ଲକ ପ୍ରଶାସନ ପକ୍ଷରୁ ଏପ୍ରିଲ ୧ରୁ ଜୁନ୍ ୩୦ ପର୍ଯ୍ୟନ୍ତ ଅନେକ ପଞ୍ଚାୟତରେ ଟ୍ୟାଙ୍କର ଯୋଗେ ପାନୀୟ ଜଳ ଯୋଗାଇ ଦିଆଯିବା ସହ ହାତଗଣତି କେତୋଟି ପଞ୍ଚାୟତରେ ପାଇପ୍ ଯୋଗେ ଜଳ ଯୋଗାଇବା ପ୍ରକଳ୍ପମାନ ନିର୍ମାଣ କରାଯାଇଛି। ପାଣ୍ଡିଆକେରା ପଞ୍ଚାୟତର ପାଣ୍ଡିଆକେରାଠାରେ ଦୟାନଦୀରେ ପାଇପ ଜଳ ଯୋଗାଣ ପ୍ରକଳ୍ପ ନିର୍ମାଣ କରାଯାଇ ପାଣ୍ଡିଆକେରା, ବାଙ୍କତଳ, ବଗିପଡ଼ା, ଘରଛିଆ, ଗଡ଼ମାଟିଆପଡ଼ା, ନାନାକେରା, ଶିମିଳିପାଟଣା ଗ୍ରାମକୁ ପାଇପ ଜଳ ଯୋଗାଣ କାର୍ଯ୍ୟ ଚାଲୁଥିଲା। ହେଲେ ୮ ଦିନ ହେଲା ପାଇପ ଜଳ ପ୍ରକଳ୍ପ ଅଚଳ ହୋଇପଡ଼ିବାରୁ ପାଇପ ଜଳ ଯୋଗାଣ ବନ୍ଦ ରହିଛି। ଗ୍ରାମବାସୀ ପାନୀୟଜଳ ପାଇଁ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଏ ସମ୍ପର୍କରେ ଜଳ ଯୋଗାଣ ବିଭାଗ ସହକାରୀ ଯନ୍ତ୍ରୀ ରଞ୍ଜନ ସାମନ୍ତରାୟଙ୍କୁ ପଚାରିବାରେ, ମଟରଟିର କାପାସିଟର ଖରାପ ଥିବାରୁ ଜଳଯୋଗାଣ ବନ୍ଦ ରହିଛି। ଦିନେ ଦୁଇ ଦିନ ଭିତରେ ମଟରଟି କାମ କରାଯାଇ ଜଳ ଯୋଗାଣ କାର୍ଯ୍ୟ ଆରମ୍ଭ ହେବ। ଅନ୍ୟପଟେ ନଦୀକୂଳବାସୀ ଗରା, ବାଲ୍ଟି ଧରି ଦୟାନଦୀରୁ ଦୂଷିତ ପାଣିକୁ ବ୍ୟବହାର ପାଇଁ ଆଣୁଥିବା ଦେଖିବାକୁ ମିଳିଛି।