ଥୁଆମୂଳ ରାମପୁର,୩।୧:(ଦୁର୍ଗା କୀର୍ତ୍ତି): କଳାହାଣ୍ଡି ଜିଲାର ସବୁଠୁ ପଛୁଆ ବ୍ଲକ ଭାବରେ ପରିଚିତ ଆଦିବାସୀ ଅଧୁଷିତ ଅଞ୍ଚଳ ଥୁଆମୂଳ ରାମପୁର ବ୍ଲକରେ ଅନେକ ସମସ୍ୟା ମଧ୍ୟରୁ ବିଶୁଦ୍ଧ ପାନୀୟ ଜଳ ଅନ୍ୟତମ । ବିଶୁଦ୍ଧ ପାନୀୟଜଳ ସକାଶେ ପୂର୍ବ ସରକାରଙ୍କ ବୃହତ ପ୍ରକଳ୍ପରୁ ଗ୍ରାମର ପ୍ରତ୍ୟେକ ଘରକୁ ସ୍ୱଚ୍ଛ ପାନୀୟ ଜଳ ଯୋଗାଇବା ଲକ୍ଷ ରଖି ବିପୁଳ ଅର୍ଥ ବିନିମୟରେ ହେଉଥିବା ଏହି ପ୍ରକଳ୍ପର ସ୍ଥାୟିତ୍ୱ ଉପରେ ଏବେଠୁ ଅନେକ ପ୍ରଶ୍ନ ଉଠୁଛି।
୨୦୨୨ ନଭେମ୍ବରରୁ ଆରମ୍ଭ ହୋଇଥିବା ଏହି କାମକୁ ମେଘା ଇଞ୍ଜିନିଅରିଙ୍ଗ ଲିମିଟେଡ଼ ନାମକ ଏକ ହାଇଦ୍ରାବାଦି କମ୍ପାନୀ କରୁଛି। ବ୍ଲକର ଗୋପୀନାଥପୁର ଗ୍ରାମ ପଂଚାୟତ ଅଧିନସ୍ଥ କମଳାଗୁଡା ଗ୍ରାମ ଇନ୍ଦ୍ରାବତୀ ଜଳଭଣ୍ଡାରରୁ ଜଳ ଉଠେଇ ଅଡ୍ରି ଗ୍ରାମର କଲୋନୀ ପଡାରେ ପ୍ରାୟ ସାତ ଏକର ସରକାରୀ ଜମିରେ ନିର୍ମାଣ ହେଉଛି ଏହି ଯୋଜନା।
ପ୍ରକଳ୍ପରୁ ବ୍ଲକର ୧୪ଟି ଗ୍ରାମ ପଂଚାୟତର ୧୦୦ରୁ ଉର୍ଦ୍ଧ ଗାଁକୁ ପାଇପ ଯୋଗେ ଜଳ ଯୋଗାଣର ବ୍ୟବସ୍ଥା ଅଛି। ଅଡ୍ରି ସମେତ ମାଲିଗାଁ, ଗୋପୀନାଥପୁର, ଡ଼ୁମେରପଦର, ତାଳଝାପି, ବାଗଡିଆଣି, ବଡ଼ଛତ୍ରଙ୍ଗ, ମହୁଲପାଟଣା, ଥୁଆମୂଳ ରାମପୁର, ଗୋପାଳପୁର, ସିନ୍ଧିପଦର, ଥୁଆମୂଳ, କାଣୀଗୁମା ଏବଂ ଗୁଣୁପୁରକୁ ୧୦୫ କୋଟି ୨୪ ଲକ୍ଷ୍ୟ ଟଙ୍କା ଅଟକଳରେ ମେଗା ପାନୀୟ ଜଳ ପ୍ରକଳ୍ପ ୱାଟର ଟ୍ରିଟମେଣ୍ଟ ପ୍ଲାଣ୍ଟ ସହ ଇମିଡ଼ିଏଟ ବୁଷ୍ଟର ପମ୍ପ ହାଉସ ବ୍ୟବସ୍ଥା ଅଛି।
ପ୍ରକଳ୍ପ ନିର୍ମାଣର ତିନି ବର୍ଷ ବିତିଯାଇଥିବା ବେଳେ ଗତ ନଭେମ୍ବର ମାସରେ କାର୍ଯ୍ୟ ଅବଧି ଶେଷ ହୋଇଛି। କିନ୍ତୁ ଟେଣ୍ଡରରେ ଚୁକ୍ତି ଅନୁଯାୟୀ କାମ ସରିନାହିଁ, କେବଳ ୩୦%କାମ ହୋଇଛିl ପ୍ରକାଶ ଥାଉକି ନିମ୍ନ ମାନର କାମ ଅଭିଯୋଗ ହେବା ପରେ ଏନେଇ ବିଭାଗୀୟ ଅଧିକାରୀ ଅଂଚଳକୁ ଆସି ବାରମ୍ବାର ଅଭିଯୋଗ କଲେ ସୁଦ୍ଧା କୌଣସି ସୁଫଳ ମିଳିପାରୁନାହିଁ ।
ଏମିତି କି ବିଭାଗୀୟ ସହକାରୀ ଯନ୍ତ୍ରିଙ୍କ ଆଦେଶକୁ ମଧ୍ୟ ଠିକା ସଂସ୍ଥା ମାନୁ ନ ଥିବା ଅସହାୟ ମଣୁଛନ୍ତି ଖୋଦ ସହକାରୀ ଯନ୍ତ୍ରି ମନ୍ମଥ ମୁର୍ମୁ। ଆଗକୁ ଖରା ଦିନ ମାଡି ଆସୁଥିବା ବେଳେ ଠିକା ସଂସ୍ଥା ମନ ମୁତାବକ କାର୍ଯ୍ୟ କରୁଥିବା ହେତୁ ଅଞ୍ଚଳ ବାସି ଦୁଃଖ ପ୍ରକାଶ କରିଛନ୍ତି। ସରକାରୀ ଯୋଜନାରେ ନିର୍ମିତ ପ୍ରକଳ୍ପର ଏହି ଭଳି ଅବସ୍ଥାକୁ ବିଭିନ୍ନ ମହଲରେ ନିନ୍ଦା ହେଉଥିବା ବେଳେ ଏହାର ସ୍ଥାଇତ୍ୟକୁ ନେଇ ପ୍ରଶ୍ନ ଉଠୁଛି ।
ଏନେଇ ବିଭାଗୀୟ ସହକାରୀ ଯନ୍ତ୍ରୀ ମନ୍ମଥ ମୂର୍ମୁଙ୍କୁ ପଚାରିବାରୁ ମେଘା ଇଞ୍ଜିନିଅରିଙ୍ଗ ଲିମିଟେଡ଼ ନାମକ ଟେଣ୍ଡର ପାଇଥିବା କମ୍ପାନୀ ବାହାର ରାଜ୍ୟ ହାଇଦ୍ରାବାଦର ଏବଂ ସେ ଏମିତି ଅନେକ କାମ ହାତକୁ ନେଇଛି ଓ ଆମ ବ୍ଲକ୍ ର କାମକୁ ଅବହେଳା କରୁଛି । ଜିଲ୍ଲାସ୍ତରୀୟ ବୈଠକରେ ଜିଲାପାଳ ମଧ୍ୟ ଅନେକଥର କାମ ଶେଷ କରିବାକୁ ନିର୍ଦ୍ଦେଶ ଦେଇଛନ୍ତି ହେଲେ ଟେଣ୍ଡର ପାଇଥିବା କମ୍ପାନୀ ବେଖାତିର କରି ମନଇଚ୍ଛା କାମ କରୁଛି ବୋଲି କହିଛନ୍ତି।
ତେଣୁ ପ୍ରକଳ୍ପ କେବେ ସରିବ କେବେ ଲୋକେ ଟୋପାଏ ପାଣି ପାଇବେ ତାହା ଅନିଶ୍ଚିତା ଭିତରେ ରହିଛି। ତେଣୁ ଠିକା ସଂସ୍ଥାର ଟେଣ୍ଡରକୁ ବାତିଲ କରିବା ସହ ଯଥା ସମ୍ଭବ ପ୍ରକଳ୍ପ ଶେଷ କରିବା ପାଇଁ ଅଞ୍ଚଳ ବାସି ଦାବି କରିଛନ୍ତି।