ଖଡ଼ିଆଳ,୨୩।୬(ସୁଜିତ୍ ପ୍ରଧାନ): ନୂଆପଡ଼ା ଜିଲା ଖଡ଼ିଆଳ ବ୍ଲକ ଗଡରାମୁଣ୍ଡା ଗ୍ରାମପଞ୍ଚାୟତ ସାଗୁନଡଙ୍ଗରି ଗ୍ରାମରେ ପିଇବା ପାଣିର ଉତ୍କଟ ସମସ୍ୟା ଦେଖାଦେଇଛି। ଗ୍ରାମରେ ବସୁଧା ଯୋଜନା ଫେଲ ମାରିଛି। ଗ୍ରାମରେ ଗତ କିଛି ବର୍ଷ ହେଲା ବସୁଧା ଯୋଜନାରେ ପାଇପ ଯୋଗେ ପିଇବା ପାଣି ଯୋଗାଇ ଦିଆଯାଇଛି। ସେଥି ପାଇଁ ଗ୍ରାମରେ ଏକ ପାଣି ଟାଙ୍କି ମଧ୍ୟ ନିର୍ମାଣ ହୋଇଛି। ଏହି ପାଣି କୁସମାଲ ନଦୀରୁ ଯୋଗାଣ ହେଉଛି। ହେଲେ ଯୋଗାଣ ହେଉଥିବା କୁସମାଲ ମୋଟର ପାଖରୁ କେବୁଲ ଚୋରି ହେଉଥିବାରୁ ପାଣି ଯୋଗାଣରେ ବ୍ୟାଘାତ ହେଉଛି। ଅଗାରୁ ଅନେକ ଥର ଏହି ପରି କେବୁଲ ଚୋରି ହୋଇଥିବା ବେଳେ ଗତ ୧୦ ଦିନରୁ ଅଧିକ ହେବ ପୁଣି ଥରେ କେବୁଲ ଚୋରି ହେବାରୁ ଗ୍ରାମରେ ପାଣି ଯୋଗାଣ ବନ୍ଦ ହୋଇଯାଇଛି। ୫ଶହରୁ ଊଦ୍ଧର୍ବ ଜନସଂଖ୍ୟା ଥିବା ଗ୍ରାମରେ କେବଳ ୨ଟି ନଳକୂପ ରହିଛି। ଏହି ନଳକୂପରେ ମଧ୍ୟ ପାଣି କମ ବାହାରୁଛି। ଫଳରେ ମହିଳାମାନେ ରାତି ୩ ଘଣ୍ଟା ସମୟରୁ ଆସି ନଳକୂପରେ ଜଗି ପାଣି ନେଉଛନ୍ତି। ନଳକୂପରେ ପ୍ରାୟ ୨୦ ମିନିଟରେ ଗୋଟିଏ ଗରିଆ ପାଣି ବାହାରୁଛି। ଶତାଧିକ ମହିଳାଙ୍କୁ ଗରାଏ ପାଣି ପାଇଁ ଘଣ୍ଟା ଘଣ୍ଟା ଅପେକ୍ଷା କରିବାକୁ ପଡୁଛି। ଫଳରେ ପୁରୁଷମାନେ ନିକଟସ୍ଥ ଗ୍ରାମରୁ ପାଣି ଆଣିଯାଉଛନ୍ତି। ଏ ବିଷୟରେ ଗଡରାମୁଣ୍ଡା ସରପଞ୍ଚ ବୃନ୍ଦାବନ ବାଗଙ୍କୁ ଯୋଗାଯୋଗ କରାଯିବାରୁ ଗ୍ରାମରେ ଗତ କିଛି ଦିନ କେବୁଲ ଚୋରି ହେବାରୁ ପାଣି ସମସ୍ୟା ରହିଥିଲା। ଏ ବିଷୟରେ ମୁଁ କନିଷ୍ଠ ଯନ୍ତ୍ରୀଙ୍କୁ ମଧ୍ୟ ଜଣାଇଥିଲି। ଗତ କିଛିଦିନ ହେଲା ଟ୍ୟାଙ୍କରରେ ମଧ୍ୟ ପାଣି ଯୋଗାଇ ଦେଉଥିଲି। ଶୀଘ୍ର କେବୁଲ ଲଗାଇ ପାଣି ଯୋଗାଣ କରି ଦିଆଯିବ ବୋଲି ପ୍ରତିଶ୍ରୁତି ଦେଇଥିଲେ।