କେନ୍ଦ୍ରାପଡ଼ା ଅଫିସ, ୨୧ା୩:ଖରା ପାଇଁ ନଦୀ ନାଳ ଶୁଖିଲା ପଡ଼ିଛି। ଅଚଳ ନଳକୂପର ମରାମତି ହେଉନାହିଁ। ଗ୍ରାମକୁ ଏବେ ବି ପାଇପ ଯୋଗେ ପାନୀୟ ପାଣି ଯୋଗାଇ ଦିଆଯାଇନାହିଁ। ଏପରି ବହୁ ଅଭିଯୋଗ କେନ୍ଦ୍ରାପଡ଼ା ଜିଲା ପ୍ରଶାସନ ପକ୍ଷରୁ ସୋମବାର ଆୟୋଜିତ ପଲ୍ଲୀରେ ପ୍ରଶାସନ ଶିବିରରେ ପହଞ୍ଚତ୍ଛି। ଭୂଗର୍ଭ ଜଳ ଲୁଣିଆ ହେଉଥିବାରୁ ଜିଲାବାସୀ ପାଣିର ଅଭାବକୁ ନେଇ ଚିନ୍ତାରେ ଅଛନ୍ତି। ମହାକାଳପଡ଼ା ବ୍ଲକ ବଡ଼ଦାଣ୍ଡୁଆ ବ୍ଲକର ଗ୍ରାମବାସୀ ଜନଶୁଣାଣି ଶିବିରରେ ପ୍ରଶାସନିକ ଅଧିକାରୀଙ୍କୁ ଭେଟି ଗ୍ରାମର ପାନୀୟ ଜଳ ସମ୍ପର୍କରେ ଅଭିଯୋଗ କରିଛନ୍ତି।
ବଡ଼ଦାଣ୍ଡୁଆ ଗ୍ରାମର ସରିତା ହାଲ୍ଦାର କହିଛନ୍ତି, ଗ୍ରାମରେ ୩ଟି ନଳକୂପ ଅଛି। ତେବେ ଖରାଦିନ ଆରମ୍ଭରୁ ଏହା ଅଚଳ ହୋଇପଡ଼ିଛି। ଏ ନେଇ ବିଭାଗୀୟ ଅଧିକାରୀଙ୍କୁ ସୂଚନା ଦିଆଯାଇଥିଲେ ମଧ୍ୟ ନଳକୂପ ମରାମତି ହୋଇପାରୁନାହିଁ। ପିଇବା ପାଣି ଆଣିବାକୁ ପ୍ରାୟ ୧ କିଲୋମିଟର ଯିବାକୁ ପଡୁଛି। ଜିଲା ପ୍ରଶାସନ ପକ୍ଷରୁ ନଳକୂପ ମରାମତି ସହ ଟ୍ୟାଙ୍କରରେ ପାଣି ଯୋଗାଇବାକୁ ସେ ଦାବି କରିଛନ୍ତି। ସେହିପରି ରାଜନଗର ବ୍ଲକ ବଗପାଟିଆର ଅନ୍ୟତମ ଅଭିଯୋଗକାରୀ ସୁଦର୍ଶନ ଦାସ କହିଛନ୍ତି, ୭ ନଳକୂପରୁ ୪ଟି ଅଚଳ ହୋଇଛି। ଅବଶିଷ୍ଟ ୩ଟିରେ ପାଣି ପାଇଁ ବିବାଦ ସୃଷ୍ଟି ହେଉଛି। ପାଣି ପାଇଁ ମେଳି ହେଉଥିବାରୁ ଗ୍ରାମ କଳହକୁ ରୋକି ହେଉନାହିଁ ବୋଲି ସେ ପ୍ରକାଶ କରିଛନ୍ତି। ପାଟକୁରା ଗ୍ରାମର ସଦାଶିବ ଭୋଇ କହିଛନ୍ତି, ସ୍ଥାନୀୟ ଅଞ୍ଚଳରେ ବିଦ୍ୟୁତ୍ କାଟ ଅସହ୍ୟ ହୋଇଛି। ଫଳରେ ଜଗନ୍ନାଥପୁର, ପୁନ୍ଦାଳୋ, ଆଖୁଆ, ନରସିଂହପୁର, ବେଡାରି, ଜଗଦଳପୁର ଆଦି ଗ୍ରାମରେ ପାଇପ ପାଣି ଆବଶ୍ୟକ ମୁତାବକ ପହଞ୍ଚତ୍ ପାରୁନାହିଁ। ଗୋଖାପଡ଼ାର ପ୍ରକାଶ ଚନ୍ଦ୍ର ଦାସ କହିଛନ୍ତି, ମହାକାଳପଡ଼ା ଓ ମାର୍ଶାଘାଇ ବ୍ଲକ ଅଞ୍ଚଳର ଲୁଣା ଜଳ ସମସ୍ୟାର ସମାଧାନ ପାଇଁ ମେଗା ପାନୀୟ ଜଳ ପ୍ରକଳ୍ପ ୨୦୧୮ ମସିହାରୁ ନିର୍ମାଣାଧୀନ ଅଛି। ଏହି ପ୍ରକଳ୍ପ ୨୦୨୦ ସୁଦ୍ଧା ସରିବା ପାଇଁ ଠିକା ସଂସ୍ଥା ସହ ଚୁକ୍ତି ହୋଇଥିଲେ ମଧ୍ୟ ଅଦ୍ୟାବଧି ନିର୍ମାଣ କାର୍ଯ୍ୟ ସରିନାହିଁ। ନଳକୂପଗୁଡ଼ିକ ମରାମତି ହେଉ ନ ଥିବାରୁ ପାନୀୟ ଜଳ ସ୍ଥାନୀୟ ଅଞ୍ଚଳ ପାଇଁ ସମସ୍ୟା ସୃଷ୍ଟି କରିଛି।
ରାଧାକାନ୍ତ ମହାନ୍ତି କହିଛନ୍ତି, ଜିଲାର ରାଜକନିକା, ଆଳି, ରାଜନଗର ଓ ମହାକାଳପଡ଼ା ବ୍ଲକ ଅଞ୍ଚଳସ୍ଥ ଭୂତଳ ଜଳ ଲୁଣା ହୋଇଥିବା ନେଇ ରାଜ୍ୟ ଓ କେନ୍ଦ୍ର ଭୂତଳ ଜଳ ବୋର୍ଡ ୨୦୧୭ ମସିହାରେ ରିପୋର୍ଟ ଦେଇଛି। ଏଥିସହ ଜିଲାର ଅବଶିଷ୍ଟ ୫ ବ୍ଲକ ଅଞ୍ଚଳର ଭୂତଳ ଜଳ ଲୁଣାସ୍ତର ବଢ଼ୁଥିବା ଏହି ରିପୋର୍ଟରେ ଉଲ୍ଲେଖ ଅଛି। ଜିଲାର ପାନୀୟ ଜଳ ସମସ୍ୟା ସମାଧାନ ଆବଶ୍ୟକ। ୧୭,୦୩୮ ନଳକୂପ ମଧ୍ୟରୁ ମାତ୍ର ୪୦୦ଟି ନଳକୂପ ଅଚଳ ହୋଇଥିବା ଜିଲା ପ୍ରଶାସନ ପକ୍ଷରୁ ସୂଚନା ମିଳୁଛି। ମାତ୍ର ଏଥିରେ ବାସ୍ତବତା ନାହିଁ। ପ୍ରାୟ ୮ ହଜାରରୁ ଊର୍ଦ୍ଧ୍ୱ ନଳକୂପ ଅଚଳ ହୋଇଥିବା ଏକ ବେସରକାରୀ ସଂସ୍ଥା ଆକଳନ କରିଥିବା ସେ ସୂଚନା ଦେଇଛନ୍ତି। ଏ ସମ୍ପର୍କରେ ଏଡିଏମ୍ ପୀତାମ୍ବର ସାମଲଙ୍କୁ ପଚାରିବାରେ ପାନୀୟ ଜଳ ସମସ୍ୟାର ସମାଧାନ ପାଇଁ ପ୍ରଶାସନିକ ସ୍ତରର ବୈଠକ ସରିଛି। ଗ୍ରାମ୍ୟ ଜଳ ଯୋଗାଣ ବିଭାଗକୁ ପ୍ରତ୍ୟେକ ଗ୍ରାମରେ ପାନୀୟ ଜଳ ଯୋଗାଣ ବ୍ୟବସ୍ଥା ପାଇଁ ନିର୍ଦ୍ଦେଶ ଦିଆଯାଇଛି। କୌଣସି ଗ୍ରାମରେ ପାନୀୟ ଜଳ ଯୋଗାଣରେ ଅସୁବିଧା ଥିଲେ ଟ୍ୟାଙ୍କର ଯୋଗେ ଜଳ ପରିବହନ ହେବ ବୋଲି ସେ କହିଛନ୍ତି।