ଭୁବନେଶ୍ୱର,୨୮।୭(ସତ୍ୟଜିତ୍ ରାଉତ):ପାରିବାରିକ କଳହ ପାଇଁ ରାଜଧାନୀରେ ଆଉ ଜଣଙ୍କ ଜୀବନ ଯାଇଛି। ଜଣେ ବ୍ୟକ୍ତି ତାଙ୍କ ସ୍ତ୍ରୀଙ୍କୁ ଭିଡିଓ କଲ୍ କରି ଗାମୁଛାରେ ଫ୍ୟାନ୍ ଦ୍ୱାରା ଝୁଲି ଆତ୍ମହତ୍ୟା କରିଛନ୍ତି। ମୃତକ ହେଲେ ଖୋର୍ଦ୍ଧା ଜିଲା ଜଙ୍କିଆ ଥାନା ଅନ୍ତର୍ଗତ ଘୁଣ୍ଠୁଣୀ ଅଞ୍ଚଳର ଅଭିମନ୍ୟୁ ସାମନ୍ତରାୟ (୩୩)। ନୟାପଲ୍ଲୀ ଥାନା ଅନ୍ତର୍ଗତ ଏକ ମାର୍ବଲ ଦୋକାନର ରେଷ୍ଟ୍ ରୁମ୍ରୁ ଗୁରୁବାର ସକାଳୁ ସାଇଣ୍ଟିଫିକ୍ ଟିମ୍ ଉପସ୍ଥିତିରେ ପୋଲିସ ଅଭିମନ୍ୟୁଙ୍କ ମୃତଦେହ ଜବତ କରିଛି। ବୁଧବାର ବିଳମ୍ବିତ ରାତିରେ ଅଭିମନ୍ୟୁ ଆତ୍ମହତ୍ୟା କରିଥିବା କୁହାଯାଉଛି। କ୍ୟାପିଟାଲ ହସ୍ପିଟାଲରେ ବ୍ୟବଚ୍ଛେଦ ପରେ ମୃତଦେହକୁ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ଏନେଇ ପୋଲିସ ଏକ ଅପମୃତ୍ୟୁ ମାମଲା (ନଂ. ୬୪/୨୦୨୩) ରୁଜୁ କରି ତଦନ୍ତ ଜାରି ରଖିଛି।
ସୂଚନା ଅନୁଯାୟୀ, ଅଭିମନ୍ୟୁ ୪ବର୍ଷ ତଳେ ନିଜ ଗାଁରେ ବିବାହ କରିଥିଲେ। ସେହି ସମୟରେ ପରିବାରରେ ଝଗଡ଼ା ହୋଇଥିଲା ଓ ତାଙ୍କ ସାନଭାଇ ବିଷ ଖାଇ ଆତ୍ମହତ୍ୟା କରିଥିଲେ। ଏହାପରେ ପରିବାରରେ ଝଗଡ଼ା ଲାଗିରହିବାରୁ ଉକ୍ତ ଦମ୍ପତି ଘର ଛାଡ଼ି ବାହାରେ ରହିଥିଲେ। ହେଲେ ଏହାପରେ ଅଭିମନ୍ୟୁ ଓ ତାଙ୍କ ସ୍ତ୍ରୀଙ୍କ ମଧ୍ୟରେ ଝଗଡ଼ା ହେଉଥିଲା। ଏଥିପାଇଁ ତାଙ୍କ ସ୍ତ୍ରୀ ବାପଘରେ ଯାଇ ରହିଥିଲେ। ଗତ ବର୍ଷ ପଞ୍ଚାୟତ ନିର୍ବାଚନ ସମୟରେ ଏପରିକି ଅଭିମନ୍ୟୁଙ୍କ ବିରୋଧରେ ସ୍ତ୍ରୀ ଯୌତୁକ ନିର୍ଯାତନା ଅଭିଯୋଗ ଆଣିଥିଲେ। ସ୍ଥାନୀୟ ପୋଲିସ ଅଭିମନ୍ୟୁଙ୍କୁ ଗିରଫ କରି ଜେଲ ପଠାଇଥିଲା। ୩ ମାସ ପରେ ସେ ଜାମିନ୍ରେ ଆସିଥିଲେ। ପରେ ତାଙ୍କ ସ୍ତ୍ରୀ ଖୋର୍ଦ୍ଧା କୋର୍ଟରେ ଛାଡ଼ପତ୍ର ପାଇଁ ଆବେଦନ କରିଥିଲେ। ଏହାକୁ ନେଇ ଅଭିମନ୍ୟୁ ମାନସିକ ଚାପରେ ରହୁଥିଲେ। ଅଭିମନ୍ୟୁ କିଛି ମାସ ହେଲା ଭୁବନେଶ୍ୱର ଇସ୍କନ ମନ୍ଦିର ନିକଟସ୍ଥ ଏକ ମାର୍ବଲ ଦୋକାନରେ ନିୟୋଜିତ ଥିବା ଜଣେ ମାଲିକଙ୍କ ମାଲବୁହା ଅଟୋ ଚଲାଉଥିଲେ। ସେ ଉକ୍ତ ଦୋକାନର ରେଷ୍ଟ ରୁମ୍ରେ ରହୁଥିଲେ। ବୁଧବାର ବିଳମ୍ବିତ ରାତିରେ ସେ ସ୍ତ୍ରୀଙ୍କୁ ଭିଡିଓ କଲ୍ କରି ଆତ୍ମହତ୍ୟା କରୁଥିବା କହିଥିଲେ। ସକାଳେ ସ୍ଥାନୀୟ ରୁମ୍ରେ ରହୁଥିବା ଅନ୍ୟ କର୍ମଚାରୀମାନେ ଘର ଫାଙ୍କରେ ତାଙ୍କ ଝୁଲନ୍ତା ମୃତଦେହ ଦେଖି ପୋଲିସକୁ ଖବର ଦେଇଥିଲେ। ପୋଲିସ ପହଞ୍ଚି ବନ୍ଦ ରୁମ୍ର କାନ୍ଥ ଭାଙ୍ଗି କବାଟ ଭିତର ପାଖ ତାଲା ଭାଙ୍ଗି ମୃତଦେହ ଜବତ କରିବା ସହ ବ୍ୟବଚ୍ଛେଦ ପାଇଁ କ୍ୟାପିଟାଲ ହସ୍ପିଟାଲକୁ ନେଇଥିଲା। ଅନ୍ୟପକ୍ଷରେ କ୍ୟାପିଟାଲ ହସ୍ପିଟାଲରେ ଅଭିମନ୍ୟୁଙ୍କ ଭଉଣୀ ଓ ସମ୍ପର୍କୀୟମାନେ ପହଞ୍ଚିଥିଲେ। ଭଉଣୀଙ୍କ କାନ୍ଦରେ ସ୍ଥାନୀୟ ଅଞ୍ଚଳ ଫାଟିପଡ଼ିଥିଲା। ସେଠାରେ ଶୋକାକୁଳ ପରିବେଶ ସୃଷ୍ଟି ହୋଇଥିଲା।