ବ୍ରହ୍ମପୁର,୧୯।୧୦(ସୁବାସ ଚନ୍ଦ୍ର ପାଢ଼ୀ): ବ୍ରହ୍ମପୁର ଅତିରିକ୍ତ ଜିଲା ଦୌରା ଜଜ୍-୧ ଡ. ଇନ୍ଦୁ ଶର୍ମାଙ୍କ କୋର୍ଟରେ ବହୁ ଚର୍ଚ୍ଚିତ ଗାଡ଼ି ଡ୍ରାଇଭର ହତ୍ୟା ମାମଲାର ବିଚାର ଆରମ୍ଭ ହୋଇଛି। ହତ୍ୟା ମାମଲାର ତଦନ୍ତକାରୀ ଅଧିକାରୀ ତଥା ତତ୍କାଳୀନ ଦିଗପହଣ୍ଡି ଥାନା ଏସ୍ଆଇ ଦେବାଶିଷ ମହାନ୍ତି ଗୁରୁବାର କୋର୍ଟରେ ହାଜର ହୋଇ ନିଜ ବୟାନ ରଖିଛନ୍ତି। ଯାହାକି କୋର୍ଟରେ ରେକର୍ଡ କରାଯାଇଛି। ପୂର୍ବରୁ ଏହି ମାମଲାରେ କୋର୍ଟରେ ଅଭିଯୋଗ ପତ୍ର ଦାଖଲ କରିଥିବା ତତ୍କାଳୀନ ଦିଗପହଣ୍ଡି ଥାନା ଅଧିକାରୀ ଆଦିତ୍ୟ କୁମାର ସେଠୀ ହାଜର ହୋଇ ୧୮ତମ ସାକ୍ଷୀ ଭାବେ ନିଜ ବୟାନ ଦେଇସାରିଛନ୍ତି। ଏହି ମାମଲାର ପରବର୍ତ୍ତୀ ଶୁଣାଣି ଆସନ୍ତା ୩୧ ତାରିଖ ପାଇଁ କୋର୍ଟ ପକ୍ଷରୁ ଦିନ ଧାର୍ଯ୍ୟ ହୋଇଛି।
ମାମଲାର ବିବରଣୀରୁ ପ୍ରକାଶ, ୨୦୧୬ରେ ଦିଗପହଣ୍ଡି ଥାନା ଅଧୀନ ଅନଙ୍ଗପୁର ଗ୍ରାମର ଆର୍. ସୁନୀଲ ରେଡ୍ଡୀଙ୍କୁ ୨ଜଣ ଅଜଣା ଯୁବକ ସାକ୍ଷାତ୍ କରିଥିଲେ। ଜଣେ ଅଫିସରଙ୍କ ବଦଳି ହୋଇଛି। ତାଙ୍କର ଆସବାବପତ୍ର ଭୁବନେଶ୍ୱର ନେବା ପାଇଁ ତାଙ୍କୁ କହିଥିଲେ। ପରେ ସୁନୀଲ ନିଜ ପିକ୍ଅପ୍ ଭ୍ୟାନ୍ ଧରି ସେମାନେ କହିଥିବା ଜାଗାକୁ ଯାଇଥିଲେ। ସେଠାରେ ଘରର କେତେକ ଆସବାବପତ୍ର ଉକ୍ତ ଗାଡ଼ିରେ ରଖିଥିଲେ। ସେମାନେ ଉକ୍ତ ଗାଡି ନେଇ ଜତୀୟ ରାଜପଥ -୧୬ ପୁକୁଡିବନ୍ଧ ଜଙ୍କଶନ ନିକଟରେ ସୁନୀଲଙ୍କୁ ନିଶାଯୁକ୍ତ ମୃଦୁ ପାନୀୟ ପିଇବାକୁ ଦେଇଥିଲେ। ପରେ ସେ ଅଚେତ ହୋଇପଡିଥିଲେ। ସେମାନେ ଗାଡି ଧରି ଜାତୀୟ ରାଜପଥ ଭୁବନେଶ୍ୱର ଅଭିମୁଖେ ଯାଇଥିଲେ। ଅନ୍ୟପକ୍ଷେ ଦୀର୍ଘଦିନ ଧରି ସୁନୀଲ ଘରକୁ ଫେରି ନ ଥିବା ବେଳେ ତାଙ୍କ ମୋବାଇଲ ସୁଇଚ୍ ଅଫ ରହିଥିଲା। ସୁନୀଲଙ୍କ ଭାଇ ଏନେଇ ଦିଗପହଣ୍ଡି ଥାନାରେ ଅଭିଯୋଗ କରିଥିଲେ।
ପୋଲିସ ଏ ସଂକ୍ରାନ୍ତରେ ଏକ ମାମଲା ରୁଜୁ କରିବା ସହ ଜାତୀୟ ରାଜପଥ ଟୋଲଗେଟରେ ଲାଗିଥିବା ସିସି ଟିଭି ଫୁଟେଜ ଓ ସୁନୀଲଙ୍କ ମୋବାଇଲ ଟ୍ରାକିଂ କରି ଅଭିଯୁକ୍ତମାନଙ୍କୁ ଧରିବାରେ ସକ୍ଷମ ହୋଇଥିଲା। ମୁଖ୍ୟ ଅଭିଯୁକ୍ତ ଅନୁଗୋଳର ଲୋକନାଥ ପ୍ରଧାନ ଓରଫ ପାଣ୍ଡା ଓ ତାଙ୍କ ସହଯୋଗୀଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ଲୋକନାଥଙ୍କୁ ଜେରା ବେଳେ ସେମାନେ ସୁନୀଲଙ୍କୁ ମୃଦୁ ପାନୀୟରେ ନିଶା ଦେଇ ଅଚେତ ପରେ ତାଙ୍କୁ ହୁମା ନିକଟ ଏକ କଲଭର୍ଟ ପାଖରେ ହତ୍ୟା କରି ଫୋପାଡ଼ି ଦେଇଥିଲେ। ପରେ ଅଭିଯୁକ୍ତମାନେ ଗାଡ଼ି ଧରି ଚମ୍ପଟ ମାରିଥିଲେ ବୋଲି ସ୍ବୀକାର କରିଥିଲେ। ଲୋକନାଥ ଗିରଫ ପରଠାରୁ ଏଯାବତ ମଣ୍ଡଳକାରାଗାରରେ ବିଚାରାଧୀନ ବନ୍ଦୀ ଭାବେ ରହିଛନ୍ତି। ସରକାରଙ୍କ ପକ୍ଷରୁ ସ୍ବତନ୍ତ୍ର ପିପି ଭାବେ ଜ୍ଞାନ ରଞ୍ଜନ ଜେନା ମକଦ୍ଦମା ପରିଚାଳନା କରୁଛନ୍ତି।