ଆଳି,୧୨ା୫(ଡି.ଏନ.ଏ.): କଟକ-ଚାନ୍ଦବାଲି ରାସ୍ତାର ବିଭିନ୍ନ ଛକ ଏବେ ବୁଲାଗୋରୁଙ୍କ କବ୍ଜାରେ। ଏହି ଛକ ସ୍ଥାନଗୁଡିକରେ ମାଳମାଳ ବୁଲାଗୋରୁଙ୍କ ଅବାଧ ଚଳପ୍ରଚଳ ଯୋଗୁ ଗାଡି ଚାଳକମାନେ ଅସୁବିଧାର ସମ୍ମୁଖୀନ ହେଉଥିବା ଦେଖିବାକୁ ମିଳିଛି। କେନ୍ଦ୍ରାପଡ଼ା ଜିଲା ଆଳି ବ୍ଲକର ପ୍ରବେଶପଥ ପତ୍ରପୁର ସେତୁ ନିକଟରୁ ଗଡ଼ଗଡି ସେତୁ ପର୍ଯ୍ୟନ୍ତ ରାସ୍ତାର ପତ୍ରପୁର, ସିଙ୍ଗିରିବଜାର, ଚଣ୍ଡୀବଜାର, ନିଆଳହାଟ, ଡାକବଙ୍ଗଳା ଛକ, ଆଳି ନୂଆବଜାର, ମିଲ୍ ବଜାର, ବାଳକାଟି ଛକ ଏବେ ମାଳମାଳ ବୁଲାଗୋରୁଙ୍କ ଯୋଗୁ ରାସ୍ତା ଜାମ ହୋଇଯାଉଛି। ବୁଲା ଗୋରୁ ବିଲରୁ ଚରିବୁଲି ସିଧାସଳଖ ରାଜରାସ୍ତାକୁ ଚାଲି ଆସୁଛନ୍ତି। ରାସ୍ତାରେ ଲଢେଇ କରି ବା ସହ ଶୋଇ ରହୁଛନ୍ତି। ଗୋରୁ ରାସ୍ତାରେ ଶୋଇ ରହୁଥିବାରୁ ଯାନବାହନ ଚଲାଇବା କଷ୍ଟକର ହୋଇପଡିଛି। ଏପରି କି ଅନେକ ଚାରିଚକିଆ ବାହନ ଅନେକ ସମୟ ଧରି ରାସ୍ତାରେ ଅଟକି ରହୁଛନ୍ତି।
ଏହି ରାସ୍ତାଟି ସବୁ ସମୟରେ ଚଳଚଞ୍ଚଳ ରହିଥାଏ। ଏହି ରାସ୍ତାରେ ଦୈନିକ ହଜାର ହଜାର ଯାନବାହନ ଚଳାଚଳ କରିଥାଏ। ଦୁଇଚକିଆଠାରୁ ଆରମ୍ଭ କରି ମାଲବାହୀ ଗାଡି ଦୈନିକ ଏହି ରାସ୍ତାରେ ଯାତାୟାତ କରୁଥିବା ବେଳେ ବିଭିନ୍ନ ଛକରେ ବୁଲା ଗୋରୁଙ୍କ ଅବାଧ ଚଳପ୍ରଚଳ ଗାଡି ଚାଳକମାନଙ୍କ ପାଇଁ କାଳ ସାଜିଛି। କେତେବେଳେ ଗାଡି ଦୁର୍ଘଟଣାରେ ଗୋରୁ ଆହତ ହେଉଛନ୍ତି ତ କେତେବେଳେ ଗାଡି ଚାଳକ ଆହତ ହେଉଥିବା ଦେଖିବାକୁ ମିଳୁଛି। ହେଲେ ବ୍ଲକ ପ୍ରଶାସନ କି ପୋଲିସ ଏଥିପ୍ରତି ଦୃଷ୍ଟି ଦେଉନାହାନ୍ତି। ଗୋରୁ ମାଲିକମାନେ ମଧ୍ୟ ସଚେତନ ହେଉନାହାନ୍ତି। ତେଣୁ ପ୍ରଶାସନ ପକ୍ଷରୁ ସଚେତନତା ଓ କାଞ୍ଜିଆହୁଦା କରି ଗୋରୁଙ୍କୁ ଅଟକ ରଖାଗଲେ ମାଲିକମାନଙ୍କ ଚେତା ପଶିବ। ତେଣୁ ପ୍ରଶାସନ ଏଥିପ୍ରତି ଦୃଷ୍ଟି ଦେଇ ତୁରନ୍ତ ପଦକ୍ଷେପ ନେବାକୁ ସାଧାରଣରେ ଦାବି ହେଉଛି।