ଭୁବନେଶ୍ୱର,୧୬।୩(ବ୍ୟୁରୋ): ପେନ୍ସନ, ବୀମା, ସାମାଜିକ ସୁକ୍ଷା ଆଦି ୧୦ ଦଫା ଦାବି ନେଇ ଷ୍ଟିୟରିଂ ଛାଡି ରାସ୍ତାକୁ ଓହ୍ଲାଇଛନ୍ତି ଡ୍ରାଇଭର। ଫଳରେ ଯାତ୍ରୀବାହୀ ବସ୍ ସମେତ ମାଲ୍ ପରିବହନ କରୁଥିବା ସମସ୍ତ ଗାଡ଼ି ଚଳଚଳ ଏକ ପ୍ରକାର ଠପ୍ ହୋଇଯାଇଛି। ଏପରି କି ମାର୍କେଟରୁ ଅତ୍ୟାବଶ୍ୟକ ସାମଗ୍ରୀ କମିବା ସାଙ୍ଗକୁ ତେଲ ପରିବହନ ହୋଇପାରୁ ନ ଥିବା ବେଳେ ତେଲର ଅଭାବ ଯୋଗୁ ଟାଙ୍କିଗୁଡିକ ବନ୍ଦ ହେବାରେ ଲାଗିଛି।
ଅନ୍ୟପକ୍ଷେ ଡ୍ରାଇଭର ମହାସଂଘର ଆନ୍ଦୋଳନ ଯୋଗୁ ସାଧାରଣ ଲୋକେ ହଇରାଣ ହେଉଥିବା ବେଳେ ପେଟ୍ରୋଲ ଟାଙ୍କି ମାଲିକ କ୍ଷତିଗ୍ରସ୍ତ ହେଉଛନ୍ତି। ତେଣୁ ସରକାର ଖୁବ ଶୀଘ୍ର ଏହାର ସମାଧାନ କରିବା ଉଚିତ ବୋଲି ଦାବି ହେଉଛି। ଏଭଳିସ୍ଥିତିରେ ପେଟ୍ରୋଲ, ଡିଜେଲ ମିଳୁ ନ ଥିବା ବେଳେ ଯେଉଁ କିଛି ସ୍ଥାନରେ ମିଳୁଛି ସେଠାରେ ଲୋକଙ୍କ ଭିଡ ଜମିଛି । ତେଲ ସରିଯିବା ଭୟରେ ପେଟ୍ରୋଲ ଟାଙ୍କିରେ ବର୍ତ୍ତମାନ ଗାଡିଗୁଡିକର ଲମ୍ବା ଲାଇନ ଦେଖିବାକୁ ମିଳିଛି
ଅନ୍ୟପକ୍ଷେ ଜନସାଧାରଣଙ୍କୁ ବିଚଳିତ ନ ହେବାକୁ ନିବେଦନ କରିଛନ୍ତି ଉତ୍କଳ ପେଟ୍ରୋଲିୟମ ଡିଲର ସଂଘର ସାଧାରଣ ସମ୍ପାଦକ ସଞ୍ଜୟ ଲାଠ। ଡିପୋରେ ତେଲ ମହଜୁଦ ରହିଛି କିନ୍ତୁ ଗାଡିଗୁଡିକ ଆସୁ ନ ଥିବାରୁ ଏଭଳି ସମସ୍ୟା ଉପୁଜିଥିବା ସେ କହିଛନ୍ତି। ଆନ୍ଦୋଳନକୁ ନଜରରେ ରଖି ଅଧିକ ମାଲ ଷ୍ଟକ ରଖାଯାଇଛି। କେହି ବି ଛାନିଆ ହୋଇ ଆବଶ୍ୟକତାଠାରୁ ଅଧିକ ପେଟ୍ରୋଲ କିଣନ୍ତୁ ନାହିଁ। ଯେତେକି ଆବଶ୍ୟକ ସେତିକି କିଣନ୍ତୁ। ଗୁରୁବାର ପର୍ଯ୍ୟନ୍ତ ଷ୍ଟକ ଥିବା ବେଳେ ଲୋକେ ଛାନିଆ ହୋଇ ଅଧିକ କିଣିଲେ ଏହା ନିର୍ଦ୍ଧାରିତ ସମୟ ପୂର୍ବରୁ ଶେଷ ହୋଇଯାଇପାରେ। ଏନେଇ ସରକାର ଡ୍ରାଇଭରଙ୍କ ସହ ଆଲୋଚନ କରି ସମାଧାନ କରିବା ଉଚିତ ବୋଲି ସେ ପ୍ରକାଶ କରିଛନ୍ତି।