କୋଚି, ୧୨।୧୨: ଧୀରେ କିନ୍ତୁ ଅସାବଧାନ ହୋଇ ଗାଡ଼ି ଚଳାଇବା ମଧ୍ୟ ଅପରାଧ। ତେଣୁ ଧୀରେ ବେପରୁଆ ଭାବରେ ଗାଡି ଚଳାଇ ରକ୍ଷା ପାଇବା ପାଇଁ ଚିନ୍ତା କରିବା ଏକ ବଡ ଭୁଲ ବୋଲି କେରଳ ହାଇକୋର୍ଟ କହିଛନ୍ତି। ଏଭଳି ଗାଡି ଚଲାଇବା ଆଇପିସିର ଧାରା ୨୭୯ ଅନ୍ତର୍ଗତ ଦ୍ରୁତ ଗତିରେ ଏବଂ ବେପରୁଆ ଡ୍ରାଇଭିଂ ଭଳି ଅପରାଧ। ରାସ୍ତାରେ ଗାଡି ଚଳାଉଥିବା ବ୍ୟକ୍ତି ଏହାର ପରିଣାମ ପାଇଁ ଦାୟୀ ବୋଲି ହାଇକୋର୍ଟ କହିଛନ୍ତି।
ସାବରିମାଲାର ଟ୍ରେକିଂ ରାସ୍ତାରେ ଟ୍ରାକ୍ଟର ବ୍ୟବହାର ଉପରେ ହାଇକୋର୍ଟ ଶୁଣାଣି ସମୟରେ ଏଭଳି କହିଛନ୍ତି।
ହାଇକୋର୍ଟ କହିଛନ୍ତି ଯେ ଯଦି ଜଣେ ଡ୍ରାଇଭର ଧୀର କିନ୍ତୁ ଅସାବଧାନତା ଯୋଗୁ ଦୁର୍ଘଟଣା ଘଟାଏ, ତେବେ ସେ ତାଙ୍କ ଗତି କମ ବୋଲି କହି ସେଥିରୁ ରକ୍ଷା ପାଇପାରିବେ ନାହିଁ। ସମ୍ପ୍ରତି ଓଭର ସ୍ପିଡରେ ଗାଡି ଚଳାଇବା ପାଇଁ ବର୍ତ୍ତମାନ ୧୦୦୦ ଟଙ୍କା ଜରିମାନା ଲାଗୁ ହୋଇଥିବାବେଳେ ବିପଜ୍ଜନକ ଢ଼ଙ୍ଗରେ ଗାଡି ଚଳାଇବା ପାଇଁ ୫ ହଜାର ଟଙ୍କା ଜୋରିମାନା ଲାଗୁ କରାଯାଉଛି।
ଟ୍ରାଫିକ ନିୟମ ଅନୁଯାୟୀ, ବିନା ଲାଇସେନ୍ସରେ ଗାଡି ଚଳାଉଥିବା ଡ୍ରାଇଭର ଉପରେ ୫ ହଜାର ଟଙ୍କା, ଓଭରସାଇଜ ଗାଡି ପାଇଁ ୫ହଜାର ଟଙ୍କା, ମଦ୍ୟପାନ କରି ଡ୍ରାଇଭିଂ ପାଇଁ ୧୦ ହଜାର ଟଙ୍କା, ରେସିଂ ଏବଂ ଦ୍ରୁତ ଗତିରେ ଗାଡ଼ି ଚଳାଇବା ଲାଗି ୫ ହଜାର ଟଙ୍କା, ଓଭରଲୋଡିଂ କ୍ଷେତ୍ରରେ ୨୦ ହଜାର ଟଙ୍କାର ଜରିମାନା ଅବା ଟନ ପିଛା ୨ ହଜାର ଟଙ୍କା ବ୍ୟବସ୍ଥା ଅଛି।
ସେହିପରି ଦୁଇ ଚକିଆ ଯାନ ଉପରେ ଓଭରଲୋଡିଂ କ୍ଷେତ୍ରରେ ତିନିମାସ ପାଇଁ ଲାଇସେନ୍ସ ବାତିଲ କିମ୍ବା ୨୦୦୦ ଟଙ୍କାର ଜରିମାନା ଦେବାକୁୂ ପଡୁଛି ବୋଲି କୋର୍ଟ କହିଛନ୍ତି। ତେଣୁ ଧୀର କିନ୍ତୁ ଅସାବଧାନ ହୋଇ ଗାଡ଼ି ଚଳାଇଲେ ମଧ୍ୟ ଜରିମାନା ଆଦାୟ କରାଯିବ ବୋଲି ବିଚାରପତି ଅନୀଲ କେ. ନରେନ୍ଦ୍ରନ ଏବଂ ପି.ଜି. ଅଜିଥକୁମାରଙ୍କ ନେତୃତ୍ୱରେ ଗଠିତ ଖଣ୍ଡପୀଠ କହିଛନ୍ତି।