ଜମ୍ମୁ,୨୩ ।୮: ଜମ୍ମୁ ସଂଭାଗର ଅରନିୟା ସେକ୍ଟରରେ ସୋମବାର ସକାଳେ ଏକ ଡ୍ରୋନ୍ ଦେଖାଯାଇଥିଲା । ଏହାର ସୂଚନା ପାଇବା ପରେ ପୋଲିସ ଓ ବିଏସ୍ଏଫ୍ ଟିମ୍ ସର୍ଚ୍ଚ ଅପରେଶନରେ ଲାଗି ପଡିଛନ୍ତି । ଜଣେ ଅଧିକାରୀଙ୍କ ସୂଚନା ଅନୁଯାୟୀ ସକାଳ ପ୍ରାୟ ୫ଟା ୩୦ରେ ଅନ୍ତରାଷ୍ଟ୍ରୀୟ ସୀମା ନିକଟରେ ଅରନିୟା ସେକ୍ଟରରେ ଆକାଶରେ ଲାଲ ଓ ହଳଦିଆ ରଙ୍ଗର ଆଲୋକ ଦେଖାଯାଇଥିଲା । ଏହାକୁ ଦେଖିବା କ୍ଷଣି ସେନା ତୁରନ୍ତ ୨୫ ରାଉଣ୍ଡ ଗୁଳି ଚଳାଇଥିଲେ । ଏହାପରେ ଡ୍ରୋନଟି ପାକିସ୍ତାନ ଆଡକୁ ଚାଲିଯାଇଥିଲା । ସୂଚନାଯୋଗ୍ୟ, ନିୟନ୍ତ୍ରଣ ରେଖା(ଏଲ୍ଓସି) ଓ ଅନ୍ତରାଷ୍ଟ୍ରୀୟ ସୀମା(ଆଇବି)ରେ ସୁରକ୍ଷାବଳଙ୍କ କଡା ପ୍ରହରୀ ଯୋଗୁ ପାକିସ୍ତାନ ସୀମା ଭିତରକୁ ପ୍ରବେଶ କରି ପାରୁ ନ ଥିବାରୁ ଡ୍ରୋନର ସାହାଯ୍ୟ ନେଉଛି ।