ବରଗଡ଼,୨୯।୮(ପ୍ରେମାନନ୍ଦ ଖମାରୀ):ବରଗଡ଼ ଜିଲା ଚାଷୀଙ୍କୁ ସମସ୍ୟା ପିଛା ଛାଡୁନାହିଁ। ଚଳିତ ଖରିଫ ଋତୁରେ ଏପର୍ଯ୍ୟନ୍ତ ସ୍ବାଭାବିକ ପରିମାଣଠାରୁ ଜିଲାରେ କମ୍ ବୃଷ୍ଟିପାତ ହୋଇଛି। ଫଳରେ ଜିଲାରେ ପୁଣି ମରୁଡ଼ି ଆଶଙ୍କା ପ୍ରକାଶ ପାଇଛି। ଏଭଳି ଆଶଙ୍କା କରି ଜିଲାର ବାରପାହାଡ଼ କୃଷକ ସଙ୍ଗଠନ ଜିଲାପାଳ ଜିଲାପାଳ ମୋନିଷା ବାନାର୍ଜୀଙ୍କୁ ଫେରାଦ ହୋଇଛି। ଜିଲାପାଳ ବାନାର୍ଜୀଙ୍କ ଉଦ୍ଦେଶ୍ୟରେ ସଙ୍ଗଠନ ଦେଇଥିବା ସ୍ମାରକପତ୍ରକୁ ଅତିରିକ୍ତ ଜିଲାପାଳ ମିର୍ଦ୍ଧା ଟପ୍ପୋ ଗ୍ରହଣ କରିଥିଲେ।
ଅମ୍ବାଭୋନା ବ୍ଲକର ଗୋଟିଏ ପାର୍ଶ୍ୱ ଜଙ୍ଗଲ ପାହାଡ଼ ଘେରା ହୋଇଥିବାବେଳେ ଅନ୍ୟପଟେ ମହାନଦୀ, ହୀରାକୁଦ ଜଳଭଣ୍ଡାର ରହିଛି। କିନ୍ତୁ ଏହି ବ୍ଲକ ଅଞ୍ଚଳର ଚାଷଜମିକୁ ଜଳଭଣ୍ଡାର ପାଣି ମାଡ଼ୁ ନ ଥିବାବେଳେ କିଛିବର୍ଷ ହେଲା ଠିକ୍ ଭାବେ ବୃଷ୍ଟିପାତ ହେଉନାହିଁ। ପ୍ରତି ଦୁଇ ତିନି ବର୍ଷ ବ୍ୟବଧାନରେ ମରୁଡ଼ି ହେଉଛି। ୨୦୨୧ ଖରିଫ ଋତୁରେ ଉକ୍ତ ବ୍ଲକ ସମ୍ପୂର୍ଣ୍ଣ ମରୁଡ଼ି ପ୍ରଭାବିତ ହୋଇଥିଲା। କିନ୍ତୁ ଚାଷୀମାନଙ୍କୁ ମରୁଡ଼ି କିମ୍ବା ଫସଲ ବୀମା ସହାୟତା ମିଳି ନ ଥିବା ଚାଷୀମାନେ ଅଭିଯୋଗ କରିଛନ୍ତି ।
ଅନ୍ୟପଟେ ଏଥର ପାଣିପାଗକୁ ଭରସା କରି ସେମାନେ ଚାଷକାର୍ଯ୍ୟ କରିଛନ୍ତି। କିନ୍ତୁ ବର୍ତ୍ତମାନ ଦୁର୍ବଳ ମୌସୁମୀ ଚାଷୀଙ୍କ ପାଇଁ ପୁଣି ଚିନ୍ତାର କାରଣ ପାଲଟିଛି। ଜୁନ ମାସରେ ଜିଲାର ସ୍ବାଭାବିକ ବୃଷ୍ଟିପାତ ପରିମାଣ ୨୦୫.୬ ମି.ମି ଥିବାବେଳେ ମାତ୍ର ୧୮୮ ମି.ମି ବୃଷ୍ଟିପାତ ହୋଇଛି। ସେହିପରି ଜୁଲାଇରେ ସ୍ବାଭାବିକ ବୃଷ୍ଟିପାତ ପରିମାଣ ୩୯୭.୨ ମି.ମି। ହେଲେ ଏହି ମାସରେ ଜିଲାରେ ୨୯୮ ମି.ମି ବୃଷ୍ଟିପାତ ହୋଇଛି। ଅଗଷ୍ଟ ମାସରେ ଜିଲାର ସ୍ବାଭାବିକ ବୃଷ୍ଟିପାତ ପରିମାଣ ୩୭୪.୪ମି.ମି ହୋଇଥିବାବେଳେ ଚଳିତ ମାସ ଏପର୍ଯ୍ୟନ୍ତ ୨୦୧ ମି.ମି ବୃଷ୍ଟିପାତ ହୋଇଛି। ଏଭଳି ଭାବେ ୩ ମାସରେ ଜିଲାରେ ୯୭୭.୨ ମି.ମି ବୃଷ୍ଟିପାତ ହେବା ସ୍ଥଳେ ୬୮୭ ମି.ମି ବୃଷ୍ଟିପାତ ହୋଇଛି।
ସ୍ବାଭାବିକ ପରିମାଣଠାରୁ ୩୦ପ୍ରତିଶତ କମ୍ ବୃଷ୍ଟିପାତ ହୋଇଥିବା ଯୋଗୁ ଜିଲାରେ ଆସନ୍ନ ମରୁଡ଼ି ସ୍ଥିତି ଉପୁଜିଛି। ଏହାକୁ ନେଇ ଚାଷୀମାନେ ଚିନ୍ତିତ ହୋଇ ପଡ଼ିଛନ୍ତି। ଏଭଳି ସ୍ଥିତିରେ ଫସଲ ବଞ୍ଚାଇବା ପାଇଁ ଯୁଦ୍ଧକାଳୀନ ଭିତ୍ତିରେ ଜମିକୁ ଜଳଯୋଗାଣ ବ୍ୟବସ୍ଥା କରିବାକୁ କୃଷକ ସଙ୍ଗଠନ ଦାବି କରିଛି। ନିରବଚ୍ଛିନ୍ନ ଭାବେ ବିଦ୍ୟୁତ ଯୋଗାଇବା ସହିତ ଅଚଳ ଉଠାଜଳସେଚନ ପ୍ରକଳ୍ପଗୁଡ଼ିକୁ ସଚଳ କରାଯିବା, ମେଗା ଜଳସେଚନ ପ୍ରକଳ୍ପକୁ ପୂର୍ଣ୍ଣ କାର୍ଯ୍ୟକ୍ଷମ କରାଯାଇ ଅଧିକରୁ ଅଧିକ ଜମିକୁ ପାଣି ମଡ଼ାଇବା ବ୍ୟବସ୍ଥା କରିବା, ରିହାତିରେ ଡିଜେଲ ପମ୍ପ ଏବଂ ଡିଜେଲ ଯୋଗାଇ ଦେବାକୁ ବାରପାହାଡ଼ କୃଷକ ସଙ୍ଗଠନ ସଭାପତି ଇଶାନ ଚନ୍ଦ୍ର ଭୋଇ, ସମ୍ପାଦକ ଅଭିମନ୍ୟୁ ପ୍ରଧାନ, ଅର୍ଜୁନ ସା, ପଞ୍ଚାନନ ପ୍ରଧାନ ପ୍ରମୁଖ ଦାବି କରିଛନ୍ତି।