କୋକସରା,୧୦।୯(ଦୁଷ୍ମନ୍ତ କୁମାର ପାଟ୍ଟଯୋଷୀ): ସ୍ବଳ୍ପ ବୃଷ୍ଟିପାତ ଯୋଗୁ ଚଳିତ ବର୍ଷ କଳାହାଣ୍ଡି ଜିଲା କୋକସରା ବ୍ଲକର ୨୨ଟି ପଞ୍ଚାୟତରେ ସମ୍ଭାବ୍ୟ ମରୁଡ଼ି ପରିସ୍ଥିତି ଉପୁଜିଛି। ଏନେଇ ଚାଷୀ ନିରାଶ ହୋଇପଡ଼ିଛନ୍ତି। ଏଭଳିସ୍ଥିତିରେ ଗମ୍ଭାରୀଗୁଡ଼ା ପଞ୍ଚାୟତ ବଙ୍ଗୋମୁଣ୍ଡା ଗାଁର ଚାଷୀମାନେ ବର୍ଷା ପାଇଁ ଇନ୍ଦ୍ର ଦେବତାଙ୍କ ସହ ଗ୍ରାମ ଦେବଦେବୀଙ୍କୁ ପୂଜାର୍ଚ୍ଚନା କରି ଶରଣାପନ୍ନ ହୋଇଛନ୍ତି।
ବଙ୍ଗୋମୁଣ୍ଡା ଗ୍ରାମର ଗୌନ୍ତିଆ ଡବଲ ମାଝୀ, ଗ୍ରାମ୍ୟ ପୂଜକ ହର ପ୍ରସାଦ ପୂଝାରି, ପୁରୁଷୋତ୍ତମ ନାଏକଙ୍କ ସହ ଚାଷୀମାନେ ଗାଁରେ ଏକ ବୈଠକ କରି ବର୍ଷା ପାଇଁ ଗ୍ରାମ ଦେବଦେବୀଙ୍କୁ ପୂଜା କରିବାକୁ ନିଷ୍ପତ୍ତି ନେଇଥିଲେ। ଏନେଇ ଶନିବାର ସାରୁ ଗାଁ ମୁଣ୍ଡରେ ଥିବା ଦେବୀଙ୍କ ପୀଠରେ ଗ୍ରାମବାସୀ ପୂଜାର୍ଚ୍ଚନା ଆରମ୍ଭ କରିଛନ୍ତି। ଗ୍ରାମ ଦେବୀ ମା’ ବସ୍ତରେନ ମାଉଳି, ମା’ ମାନପୁରିଆଣି, ମା ଠାକୁରାଣୀ, ହରିବୋଲ ଭିମା, ଜଙ୍ଗଲିଆ ଭିମା, ମା ଛୋଟି ଗଡ଼ିଆଣି, ମା ପୋଏରେନ ଦେବୀଙ୍କ ଲାଠି ଆସି ଗ୍ରାମର ମାଟି ଘର ନିକଟରେ ଏକତ୍ରିତ ହୋଇଥିଲେ। ପରେ ଗାଁ ପୂଝାରୀ ଦେବଦେବୀଙ୍କ ଲାଠକୁ ସ୍ବାଭଗତ କରି ରୀତିନୀତି ଅନୁସାରେ ପୂଜାର୍ଚ୍ଚନା ଆରମ୍ଭ କରିଥିଲେ। ପରବର୍ତ୍ତୀ ସମୟରେ ଦେବାଦେବୀଙ୍କ କାଲିଶି ଲାଗିଥିଲା। ଗ୍ରାମବାସୀଙ୍କ ବିଶ୍ୱାସ ଯେ, ଇନ୍ଦ୍ର ଦେବତାଙ୍କ ସହ ଗ୍ରାମ ଦେବଦେବୀଙ୍କୁ ପୂଜାର୍ଚ୍ଚନା କରି ସନ୍ତୁଷ୍ଟ କଲେ ଭଲ ବର୍ଷା ହେବ। ଏନେଇ ଶନିବାରଠାରୁ ପୂଜା ଆରମ୍ଭ ହୋଇଥିବା ବେଳେ ରବିବାର ମଧ୍ୟାହ୍ନରେ ଗାଁରେ ବର୍ଷା ହୋଇଛି। ପୂଜାର୍ଚ୍ଚନା ମଙ୍ଗଳବାର ପର୍ଯ୍ୟନ୍ତ ଚାଲିବ ବୋଲି କମିଟି ପକ୍ଷରୁ କୁହାଯାଇଛି। ବଙ୍ଗୋମୁଣ୍ଡାର ମଧୁସୂଦନ ବାଗ, ନାଥ ପୂଝାରୀ, ବିଶ୍ୱମ୍ବର ଦଳପତି, ଜଗନ୍ନାଥ ଦଳପତି, ସହଦେବ ପୂଝାରୀ ଗ୍ରାମବାସୀ ଦେବରାଜ ଦଳପତି, ଦୁର୍ଯ୍ୟୋଧନ ପୂଝାରୀ, ଘାସିରାମ ପୂଝାରୀ, ଝଯାଙ୍ଗ ଦଳପତି, ଦିବାକର ମାଝୀ ପ୍ରମୁଖ ସହଯୋଗ କରୁଛନ୍ତି।