କାବୁଲ,୧୯।୩ : ଦେଶରେ ମରୁଡ଼ି ସ୍ଥିତି ଅଣାୟତ୍ତ ହେବାରୁ ଆଫଗାନିସ୍ତାନ ମିଳିତ ଜାତିସଂଘର ଦ୍ୱାରସ୍ଥ ହୋଇ ସାହାଯ୍ୟ ପାଇଁ ଅନୁରୋଧ କରିଛି। ବାସ୍ତବରେ, ଯୁଦ୍ଧ ପ୍ରଭାବିତ ଦେଶରେ ମରୁଡ଼ି ପରିସ୍ଥିତି ସଙ୍କଟ ଜନକ ହୋଇଛି। ଆଫଗାନିସ୍ତାନ ଜାତିସଂଘକୁ ଗହମ ଯୋଗାଣ ସୁବିଧା ଯୋଗାଇବାକୁ କହିଛି।
ସ୍ଥାନୀୟ ନ୍ୟୁଜ ଏଜେନ୍ସି ଅନୁଯାୟୀ କୃଷି ଏବଂ ପଶୁପାଳନ ବିଭାଗ ପକ୍ଷରୁ ମିଳିତ ଜାତିସଂଘକୁ ସାହାଯ୍ୟ କରିବାକୁ ଆହ୍ବାନ ଦିଆଯାଇଛି। ଏହାଦ୍ୱାରା ୍ଆଫଗାନିସ୍ତାନର ଆର୍ଥିକ ସ୍ଥିତିକୁ ସୁଦୃଢ଼ କରିବାରେ ମଧ୍ୟ ସହାୟକ ହେବ ବୋଲି ବିଭାଗ କହିଛି। ବାସ୍ତବରେ, ଅଗଷ୍ଟ ୨୦୨୧ରେ ତାଲିବାନ ଦେଶରେ କ୍ଷମତା ଦଖଲ କରିବା ପରେ ଆଫଗାନିସ୍ତାନର ଅର୍ଥନୀତି ଓଲଟପାଲଟ ହୋଇଯାଇଥିଲା। ସେବେଠାରୁ ଦେଶ ଏକ ମାନବିକ ସଙ୍କଟରେ ପଡିଛି ଏବଂ ଲୋକମାନେ ଖାଦ୍ୟ ଅଭାବରେ ଦୟନୀୟ ଜୀବନ ବିତାଉଛନ୍ତି।
ଏହି ରିପୋର୍ଟରେ ଆଫଗାନିସ୍ତାନର କୃଷି ଏବଂ ପଶୁପାଳନର ଡେପୁଟି ହେଡ ମିରୱାଜ ହାଜିଜାଦା କହିଛନ୍ତି ଯେ ବର୍ତ୍ତମାନର ପରିସ୍ଥିତିରେ ଅନ୍ତର୍ଜାତୀୟ ସମ୍ପ୍ରଦାୟ ଏବଂ ଅନ୍ୟ ଦେଶ ଆଫଗାନିସ୍ତାନକୁ ସମର୍ଥନ କରିବା ଆବଶ୍ୟକ। ଜାରି ରହିଥିବା ଖାଦ୍ୟ ସଙ୍କଟ ସମ୍ପର୍କରେ ତାଲିବାନ ନେତୃତ୍ୱାଧୀନ କୃଷି ମନ୍ତ୍ରଣାଳୟର ମୁଖପାତ୍ର ମୁସବାହୁଦ୍ଦିନ ମୁସ୍ତେନ କହିଛନ୍ତି ଯେ ଜରୁରୀକାଳୀନ ପରିସ୍ଥିତି ପାଇଁ ଏକ ଲକ୍ଷ ଟନ ଗହମ କ୍ରୟ ପାଇଁ ବଜେଟ ଆବଣ୍ଟନ ପାଇଁ କୃଷି ମନ୍ତ୍ରଣାଳୟ କ୍ୟାବିନେଟକୁ ପଠାଇଛି।
ସମଗ୍ର ବିଶ୍ୱରୁ ମାନବିକ ସହାୟତା ପାଇବା ସତ୍ତ୍ୱେ ଆଫଗାନିସ୍ତାନର ଦାରିଦ୍ର୍ୟ, ପୁଷ୍ଟିହୀନତା ଏବଂ ବେକାରୀ ହାର ଦେଶରେ ସର୍ବୋଚ୍ଚ ସ୍ତରରେ ରହିଛି। ଆଫଗାନିସ୍ତାନର ପରିସ୍ଥିତି ବିଷୟରେ ବର୍ଣ୍ଣନା କରି କୁଟବୁଦ୍ଦିନ ୟାକୁବି ନାମକ ଜଣେ ବିଶ୍ଳେଷକ କହିଛନ୍ତି, ଆଫଗାନିସ୍ତାନକୁ ପ୍ରତିବର୍ଷ ଛଅରୁ ଆଠ ନିୟୁତ ମେଟ୍ରିକ ଟନ ଗହମ ଦରକାର। ବର୍ତ୍ତମାନ ଘରୋଇ ଉତ୍ସରୁ ପ୍ରାୟ ପାଞ୍ଚ ନିୟୁତ ମେଟ୍ରିକ ଟନ ଯୋଗାଇ ଦିଆଯାଉଛି ଏବଂ ଅବଶିଷ୍ଟ ଆମଦାନୀ ହେଉଛି।